وسىدان ءبىر ايدان ءسال استام ۋاقىت بۇرىن پرەزيدەنت نۇرسۇلتان نازارباەۆ «سامۇرىق-قازىنا» ۇلتتىق ءال-اۋقات قورى» اكتسيونەرلىك قوعامى باسقارماسىنىڭ توراعاسى ومىرزاق شوكەەۆتى قابىلداعان. وندا ەلباسىمىز اكتسيونەرلىك قوعامدى ترانسفورماتسيالاۋ, ياعني وزگەرتۋ, قايتا جاڭارتۋ باعدارلاماسىن ازىرلەۋدى تاپسىرعان بولاتىن. بۇل جۇمىستىڭ مەرزىمى قىركۇيەككە دەيىن دەپ بەلگىلەنىپ, باعدارلامانى قوردىڭ بارلىق كورپوراتيۆتىك ورگاندارىندا تالقىلاۋ جانە ۇكىمەت قاراۋىنا ەنگىزۋ مىندەتتەلگەن. سونىمەن قاتار, پرەزيدەنت الداعى كەزدە قور بىرقاتار ورتا جانە شاعىن كومپانيالارىن ساتۋدى بارىنشا اشىق جانە ءادىل نارىقتىق باعا بويىنشا جۇرگىزۋى ءتيىس ەكەندىگىن اتاپ وتكەن ەدى.
پرەزيدەنت تاپسىرماسى قالاي ورىندالۋدا؟
بۇل سۇراققا جاۋاپ ىزدەۋدىڭ الدىندا «ترانسفورماتسيا» سوزىنە بايلانىستى از-كەم ايتپاسا بولمايتىنداي. لاتىننىڭ «transformatio» ءسوزىنىڭ ءمانى ورىس تىلىندەگى ادەبيەتتەردە «پرەوبرازوۆانيە, پرەۆراششەنيە» دەپ تۇسىندىرىلەدى. سوعان ساي 31 تومدىق تەرمينولوگيالىق سوزدىكتىڭ فيلوسوفيا مەن ساياساتتانۋعا ارنالعان 23-ءشى تومىندا ول ءسوزدىڭ قازاقشا بالاماسى «وزگەرۋ» دەپ الىنىپتى. بىزدىڭشە, «وزگەرۋ» «ترانسفورماتسيا» ۇعىمىن تولىق بەرە المايتىن سياقتى. عىلىمدا ترانسفورماتسيا دەپ ترانسفورماتوردىڭ كومەگىمەن قۋاتتىڭ نەمەسە نىساننىڭ قاسيەتىن وزگەرتۋدى ايتادى. ەكونوميكاعا قاتىستىرىپ سويلەگەندە ترانسفورماتسيا جاڭا تۇرگە اۋىسۋدى بىلدىرەدى. سوندىقتان, سۇحبات ماتىنىندە ءساتتى بالاماسى قازىرشە تابىلا قويماعان (بارلىق سوزگە بالاما تابۋ مىندەت تە ەمەس) بۇل تەرميندى حالىقارالىق قولدانىستاعى كۇيىندە پايدالانۋدى ءجون كورىپ وتىرمىز.
مەملەكەت باسشىسى تاپسىرماسىنىڭ ورىندالۋ بارىسىن ءبىلۋ ءۇشىن ءبىز «سامۇرىق-قازىنا» اكتسيونەرلىك قوعامىنىڭ تاۋەلسىز ديرەكتورى سەر ريچارد ەۆانسقا بىرنەشە ساۋال قويعان ەدىك.
سۇحباتتاسىمىز تۋرالى قىسقاشا مالىمەت بەرە كەتەيىك.
سەر ريچارد گارري ەۆانس – تانىمال بريتاندىق مەملەكەتتىك قىزمەتكەر جانە بيزنەسمەن. ول 1942 جىلى انگليادا تۋعان. ريچارد ەۆانس – قازاقستاندىق ەير استانا اۆياكومپانياسىنىڭ نەگىزىن سالۋدا ماڭىزدى ءرول اتقارعان ادام. 2006-2008 جىلداردا «سامۇرىق» مەملەكەتتىك اكتيۆتەردى باسقارۋ جونىندەگى قازاقستاندىق حولدينگى» اكتسيونەرلىك قوعامى ديرەكتورلار كەڭەسىنىڭ ءتوراعاسى بولدى. ۇكىمەتتىڭ 2008 جىلعى 17 قازانداعى №962 قاۋلىسىمەن «سامۇرىق-قازىنا» اكتسيونەرلىك قوعامىنىڭ ديرەكتورلار كەڭەسى قۇرامىنا تاۋەلسىز ديرەكتور رەتىندە سايلانعان.
– سەر ريچارد, تاياۋ بولاشاقتا ەلدىڭ ەكونوميكالىق ءومىرىندە ەلەۋلى وزگەرىستەر جۇزەگە اسىرىلماقشى. BNews.kz «سامۇرىق-قازىنا» اكتسيونەرلىك قوعامىندا ترانسفورماتسيالاۋ باعدارلاماسى بويىنشا جاڭعىرتۋ جونىندەگى كەڭەس قۇرىلعانىن جازدى. بيزنەستى ترانسفورماتسيالاۋ باعدارلاماسىنىڭ ءبىرىنشى كەزەڭىنە باسقارۋشى حولدينگپەن بىرگە «قازاقستان تەمىر جولى» ۇلتتىق كومپانياسى, «قازمۇنايگاز» ۇلتتىق كومپانياسى, «قازپوشتا» اكتسيونەرلىك قوعامدارى قوسىلىپ وتىر ەكەن. وسى ورايدا قولعا الىنعان شارۋالاردى اڭگىمەلەسەڭىز دەيمىز؟
– قازاقستان ەكونوميكاسىنىڭ لوكوموتيۆى سانالاتىن, ەل قازىناسىنىڭ باسىم بولىگىن باسقارىپ وتىرعان «سامۇرىق-قازىنا» ۇلتتىق ءال-اۋقات قورىنداعى كەز كەلگەن وزگەرىس قوعام تاراپىنان ۇلكەن قىزىعۋشىلىق تۋدىرادى. سەبەبى, حالىقتىڭ ءال-اۋقاتىنىڭ جاقسارۋى, ەكونوميكالىق تۇراقتىلىق پەن دامۋ الەمدەگى ەڭ ءىرى حولدينگتەردىڭ ساناتىنا كىرەتىن ۇلتتىق ءال-اۋقات قورىنىڭ احۋالىنا تىكەلەي بايلانىستى. بۇل كۇندەرى ەلىمىزدەگى 500-گە جۋىق ءتۇرلى سالاداعى كاسىپورىنداردىڭ باسىن بىرىكتىرىپ وتىرعان قوردا 300 مىڭنان استام ادام جۇمىس ىستەيدى.
تاياۋدا «سامۇرىق-قازىنا» باسشىلىعى قوردىڭ كومپانيالار توبىنىڭ تاۋەلسىز ديرەكتورلارى مەن توپ-مەنەدجەرلەرىمەن كەزدەسۋ وتكىزىپ, مەملەكەت باسشىسىنىڭ تاپسىرماسى بويىنشا جاسالىپ جاتقان ترانسفورماتسيالاۋ باعدارلاماسىن تالقىلادى. مەملەكەت باسشىسىنىڭ تاپسىرماسى بويىنشا قولعا الىنعان بۇل باعدارلاما قوردىڭ بۇگىنگى, بولاشاقتاعى قىزمەتىنىڭ وزەگىنە اينالماق.
– بۇقارالىق اقپارات قۇرالدارىنان سول كەزدەسۋدە ترانسفورماتسيالاۋ باعدارلاماسى مەن ونىڭ بولاشاعى ەگجەي-تەگجەيلى ءسوز بولعانىن وقىپ, كورىپ جاتىرمىز. باعدارلامانىڭ بولاشاعى تۋرالى نە ايتاسىز؟
– قور كومپانيالارىنىڭ بيزنەس توپتارىن ترانسفورماتسيالاۋ باعدارلاماسى ەكونوميكالىق جاڭارۋلاردىڭ قوزعاۋشىسى بولادى, كومپانيا توپتارىنا كىرىستى ارتتىرۋعا, جوعارى تەحنولوگيالى, ءتيىمدى دە تابىستى جوبالاردىڭ سانىن كوبەيتىپ, ساپاسىن جاقسارتۋعا مۇمكىندىك بەرەدى. جالپى, ترانسفورماتسيا دەگەنىمىز – العا جىلجۋ ءۇشىن قاجەتتى وتىن. ءبىز ۇزاق جولدىڭ باس جاعىندا تۇرمىز, ترانسفورماتسيا اياسىندا ديرەكتورلار كەڭەسى اكتسيونەرلەردەن تۇسەتىن سيگنالداردى ەنشىلەس كومپانيالاردىڭ باسشىلارىنا جەتكىزەتىن كوپىر بولۋعا ءتيىستى ەكەندىگىن جاقسى تۇسىنەمىز. مەملەكەتتىك ورگاندار – ءبىزدىڭ ينتەگرالدىق ارىپتەستەرىمىز. قازىرگى تاڭدا مينيسترلىكتەرگە ولاردىڭ بۇل ۇدەرىستەن سىرت قالا المايتىنىن نەمەسە باقىلاۋشى كۇيىندە بولمايتىنىن جەتكىزۋىمىز كەرەك.
بيىلعى جىلدان باستاپ «سامۇرىق-قازىنا» اكتسيونەرلىك قوعامى ءوز قىزمەتى مەن وزىنە قاراستى كاسىپورىنداردى ترانسفورماتسيالاۋ ىسىنە كىرىستى. بۇل ماقساتتا قور مەن ونىڭ كومپانيالارىن ترانسفورماتسيالاۋ باعدارلاماسى جاسالدى. قور باسشىلىعى مەن توپ-مەنەدجمەنتى باعدارلامانىڭ بولاشاعىنا زور سەنىممەن قارايدى.
– باعدارلامانى جۇزەگە اسىرۋدا مەملەكەتتىك ورگانداردىڭ ءرولى زور ەكەنى بەلگىلى.
– بۇل جەردە تاعى دا اشىقتىق, ادىلدىك ماسەلەسى كۇن تارتىبىنە شىعادى. مەملەكەت ەكونوميكاسىنا جاۋاپتى مينيسترلىكتەردىڭ ترانسفورماتسياسى, جوسپارى تۋرالى, ولاردىڭ كوممەرتسيالىق سەكتورمەن, ۇلتتىق كومپانيالارمەن قالاي جۇمىس ىستەيتىنى تۋرالى اقپاراتتى كومپانيالار مەن بيزنەس قاۋىمداستىق قانا ەمەس, قوعام دا ناقتى ءبىلىپ وتىرۋعا ءتيىس.
جىل باسىندا قازاقستان رەسپۋبليكاسىنىڭ پرەزيدەنتى ن.نازارباەۆ الەمدەگى ەكونوميكالىق, قارجىلىق كەڭىستىكتە بولىپ جاتقان سان قيلى وزگەرىستەردەن وتاندىق كومپانيالاردىڭ دا تىس قالا المايتىنىن, ولاردىڭ نارىقتاعى جاڭا تەحنولوگيالىق, قارجىلىق احۋالعا مەيلىنشە ەرتەرەك بەيىمدەلۋى قاجەتتىگىن ەسكەرتكەن بولاتىن. پرەزيدەنتتىڭ 2050 جىلعا قاراي دامىعان 30 ەلدىڭ قاتارىنا كىرۋ جونىندەگى تاپسىرماسىنىڭ ۇدەسىنەن شىعۋدىڭ توتە جولى دا وسىنداي وڭ وزگەرىستەردەن باستالادى.
بۇگىنگى تاڭدا الەمدىك, حالىقارالىق ءىرى كومپانيالاردىڭ بارلىعى دا ترانسفورماتسيالىق جاڭارۋ مەن جاڭعىرۋدى باسىنان كەشىرىپ وتىر. الەمدىك ەكونوميكاداعى, قارجى نارىعىنداعى زور وزگەرىستەر ولاردىڭ الدىنا جاڭا باسىمدىقتار مەن مىندەتتەر قويدى. حالىقارالىق وزىق ءتاجىريبەنى مەڭگەرگەن, الەمدىك نارىقتاعى باسەكەگە قابىلەتتى حولدينگكە اينالۋ ءۇشىن قازاقستاندىق كومپانيالارعا دا وسىنداي وزگەرىستەر قاجەت.
ءبىر قۋانتارلىعى, باعدارلاما جوباسى «سامۇرىق-قازىنانىڭ» ديرەكتورلار كەڭەسىنىڭ وتىرىستارىندا, كەڭەس مۇشەلەرى, ساراپشىلار اراسىندا, قوعامدا ابدەن تالقىلاندى. سونىڭ ناتيجەسىندە جوباعا مەملەكەت باسشىسىنىڭ جولداۋى مەن تاپسىرمالارىنان تۋىندايتىن باستى مىندەتتەردىڭ بارلىعى ەنگىزىلگەن.
– ناقتى ايتقاندا, ترانسفورماتسيا قانداي ماقساتتاردى كوزدەيدى؟
– مىنا ماقساتتاردى بولە ايتار ەدىم. ولار – ينۆەستيتسيالىق قىزمەتكە كوزقاراستى وزگەرتۋ; ءناتيجە كۇتىلەتىن نەگىزگى قىزمەت كورسەتكىشتەرى بويىنشا ماقساتتى ايقىنداپ الۋ; بيزنەس-ۇردىستەرگە, اكتيۆتەردى جەكەشەلەندىرۋ مەن قايتا قۇرۋ ىسىنە رەينجينيرينگ جاساۋ; سالالىق كوماندالاردى جاساقتاپ, دامىتۋ; ديرەكتورلار كەڭەسىنە تالاپتى كۇشەيتۋ; نەگىزگى قۇجاتتاردى, ونى ساياساتتار دەپ اتاپ ءجۇرمىز, جاساپ, جەتىلدىرۋ جانە وسى كەشەندى وزگەرىستەردى باسقارۋ.
ارينە, تۇبەگەيلى وزگەرىستەر جاساۋ وڭاي شارۋا ەمەس. وسى جولدا, ءتىپتى, كەيبىر ولقىلىقتار دا بولۋى مۇمكىن. ءبىز ترانسفورماتسيا ءار مەملەكەتتىڭ ءوز ەرەكشەلىكتەرىنە, ۇلتتىق مۇددەلەرى مەن باسىمدىقتارىنا ساي جاسالۋى قاجەتتىگىن ەستەن شىعارماۋىمىز كەرەك.
قازىرگى تاڭدا ءبىزدىڭ كومپانيالار دا ايتارلىقتاي تابىستارعا قول جەتكىزىپ وتىر. بىراق بۇعان توقمەيىلسۋگە بولمايدى. ەگەر ءبىز وڭىرلىك, جاھاندىق دەڭگەيدە باسەكەگە قابىلەتتى بولعىمىز كەلسە, بۇگىننەن باستاپ تۇبەگەيلى وزگەرۋگە ءتيىسپىز. ءبىز ءۇشىن وزگەرىستەر – ءۇلكەن سىن. ترانسفورماتسيالاۋ – ۇزاققا سوزىلاتىن, بىراق تۇبىندە ءوز جەمىسىن بەرەتىن ءۇردىس, جاڭا مادەنيەت, جاڭا فيلوسوفيا. بيزنەستى جۇرگىزۋدىڭ جاڭا ساتىسى – ۇنەمى جەتىلىپ وتىرۋدىڭ, حالىقتى جۇمىلدىرۋدىڭ, الەمدىك دەڭگەيدە ساپالى جۇمىس ىستەۋدىڭ مادەنيەتى.
باعدارلاماعا ۇلكەن ءۇمىت ارتىلىپ, زور جاۋاپكەرشىلىك جۇكتەلىپ وتىر. بۇل باعدارلاما «سامۇرىق-قازىنا» قورىنىڭ ودان ءارى دامۋىنا ۇلكەن ىقپال ەتەرى ءسوزسىز. باعدارلامانىڭ بولاشاعى زور دەپ ويلايمىن.
«سامۇرىق-قازىنا» قورىن ترانسفورماتسيالاۋ باعدارلاماسى ءبىر رەتكى شارا ەمەس. وسى ءۇردىستىڭ باسىندا قوردىڭ ديرەكتورلار كەڭەسى تۇر. وسى كەڭەس باعدارلامانى جۇزەگە اسىرۋ بارىسىندا اكتسيونەر مەن ەنشىلەس كومپانيالار اراسىنداعى التىن كوپىرگە اينالۋى ءتيىس.
بۇگىنگى تاڭدا الەمدىك, حالىقارالىق ءىرى كومپانيالاردىڭ بارلىعى دا ترانسفورماتسيالىق جاڭارۋ مەن جاڭعىرۋدى باسىنان كەشىرىپ وتىر. سەبەبى, الەمدىك ەكونوميكاداعى, قارجى نارىعىنداعى زور وزگەرىستەر ولاردىڭ الدىنا دا جاڭا باسىمدىقتار مەن مىندەتتەر قويدى. حالىقارالىق وزىق تاجىريبەنى مەڭگەرگەن, الەمدىك نارىقتاعى باسەكەگە قابىلەتتى حولدينگكە اينالۋ ءۇشىن بىزگە دە وسىنداي وزگەرىستەر قاجەت.
– ول ءۇشىن ەڭ الدىمەن نە كەرەك؟
– بىزگە ءبىرتۇتاس, كاسىبي ۇجىم مەن پراگماتيكالىق, وزىق كوزقاراس كەرەك. تاۋەلسىز ديرەكتورلارمەن كەزدەسۋ كەزىندە مەنىڭ كوڭىلىمە «ءتۇرلى كوزقاراستار بىرلىگى» دەگەن ءبىر ءسوز قاتتى ۇنادى. مىنە, ءبىزدىڭ تابىستى جۇمىسىمىزدىڭ كەپىلى وسىنداي قاعيدالارعا سۇيەنۋى ءتيىس.
ارينە, ءبىزدىڭ ۇلتتىق كومپانيالاردىڭ بارلىعى دا ۇيىمداستىرۋ قۇرىلىمى, جۇمىس مادەنيەتى, كوزقاراس قالىبى تۇرعىسىنان ترانسفورماتسيانىڭ العاشقى ساتىسىندا تۇر. وسى تۇرعىدان العاندا ءارتۇرلى كوزقاراستاردىڭ, ۇستانىمداردىڭ بولۋى دا زاڭدى. وزگەرىستەر ءار كومپانيانىڭ ەرەكشەلىگىنە قاراي جۇرگىزىلۋى كەرەك. الايدا, ءبىز ترانسفورماتسيانىڭ بەلگىلەنگەن باعدارلاما اياسىندا جۇرگىزىلۋى قاجەتتىگىن ءاردايىم باسشىلىققا الىپ وتىرۋىمىز كەرەك. بۇل – ءبارىمىزدىڭ ورتاق ءىسىمىز.
– باعدارلاماعا ديرەكتورلار كەڭەسىنىڭ ءار مۇشەسى, كومپانيا باسشىلارى مەن قىزمەتكەرلەرى بەلسەنە قاتىسۋ قاجەت دەيسىز عوي...
– ءدال سولاي. ترانسفورماتسيا قوردىڭ ءوز ىشىندە نەمەسە قور ارقىلى عانا جاسالمايدى. ونىڭ تابىستى بولۋى ءۇشىن بىرلەسكەن ءىس-قيمىل, ديالوگ پەن وزگە دە ءتيىمدى كوممۋنيكاتسيالىق تاسىلدەرگە سۇيەنگەن ۇمتىلىس جانە بارلىق تاراپتىڭ قىزىعۋشىلىعى قاجەت.
– كەزدەسۋدە بيزنەس ۇردىستەردىڭ باسىم بولىگى ءالى دە ەسكى كوزقاراسپەن جۇرگىزىلىپ جاتقانى ءبىرنەشە مارتە ايتىلىپتى. ترانسفورماتسيا وتكەننىڭ جۇگىنەن قۇتىلۋدىڭ جولى ما؟
– جوق, بۇل جەردە وزگە تەزيستى قولدانعان ءجون شىعار. ترانسفورماتسيا دەگەنىمىز – توقتاۋسىز العا باسۋدىڭ كەپىلى. ءبىزدىڭ قولىمىزدا باعدارلامانىڭ جول كارتاسى بولۋى ءتيىس. جانە جول كارتاسى ءوزىمىز ءۇشىن عانا ەمەس, قىزىعۋشىلىق تانىتقان وزگە تاراپتارعا دا, قوعامعا دا تۇسىنىكتى بولۋى كەرەك. ترانسفورماتسيا باعدارلاماسى «ءبىزدىڭ الدىمىزعا قويعان ناقتى ماقساتىمىز نە, قايدا بارامىز جانە قانداي جولمەن بارامىز؟» دەيتىن سۇراقتارعا جاۋاپ ىسپەتتەس. سوندىقتان اتالعان قۇجات وتە مۇقيات جاسالىپ جاتىر. مۇندا قور باسشىلىعى مەن كومپانيالار توبى جەتەكشىلەرىنىڭ جاۋاپكەرشىلىگى دە قاراستىرىلعان. وسى رەتتە باسقارما توراعاسى ومىرزاق شوكەەۆ مىرزانىڭ باعدارلامانى ورىنداۋ مەن ونىڭ جاۋاپكەرشىلىگى تۋرالى ناقتى ۇستانىمى ءبارىمىز ءۇشىن دە ماڭىزدى سيگنال بولىپ وتىر.
– باعدارلامانىڭ لايىقتى جۇزەگە اسۋىنا دەگەن سەنىمىڭىز قۋانتادى. بىراق ترانسفورماتسيا كەزىندە كۇتپەگەن ولقىلىقتاردىڭ ورىن الۋى دا مۇمكىن عوي. ونداي قاۋىپ جوق پا؟
– ترانسفورماتسيا – زور, كەشەندى جوبا. ونى لايىقتى ىسكە اسىرۋ ءۇشىن الدىن الا ۇلكەن دايىندىق كەرەك. ءبىر عانا باعدارلاما جاساپ قويۋ ازدىق ەتەدى. كومپانيالار جۇمىسىنداعى وسال تۇستارىمىزدى ىزدەپ تاۋىپ, ولاردى جويۋدىڭ ءتيىمدى جولدارىن قاراستىرۋىمىز قاجەت. كەز كەلگەن ءىرى جوبا وراسان قارجىنى تالاپ ەتەدى. وسى قارجىنى ءتيىمدى يگەرۋ, جوبالىق باسقارۋ قابىلەتىمىزدى ارتتىرۋ كەرەك. مىسالى, تاجىريبە كورسەتكەندەي, ءبىز ينۆەستيتسيالىق جوبالاردىڭ بيۋدجەتىن كوپ جاعدايدا ءوسىرىپ الامىز نەمەسە جۇمىس كەستەسىنەن كەش قالىپ جاتامىز. مۇنداي ولقىلىقتارعا جول بەرمەۋ ءۇشىن باسشىدان قىزمەتكەرگە دەيىن ارقاشان وقۋعا, ۇيرەنۋگە, ىزدەنۋگە قۇلقى بولۋى ءتيىس.
– قور باسشىسى ءومىرزاق ءشوكەەۆ بيزنەستى ترانسفورماتسيالاۋدىڭ سەگىز باعىتىن اتادى. ءسىزدىڭشە, سونىڭ ىشىندە قاي باعىتتار ەرەكشە ماڭىزعا يە؟
– الداعى بىرنەشە اپتا ءىشىندە ءبىز EVA (economic value added – ەكونوميكالىق قوسىمشا قۇن) ستراتەگيالىق كورسەتكىشتەرى بويىنشا جۇمىسىمىزدى اياقتايمىز. بۇل جۇمىس كومپانيالاردىڭ قۇنىن ارتتىرۋداعى باستى ولشەم بولماق. ماۋسىمنىڭ اياعىندا بارلىق كومپانيالارداعى ديرەكتورلار كەڭەسىنىڭ ماقۇلداۋىن الامىز دەپ كۇتىپ وتىرمىز. ءبىزدىڭ ويىمىزشا, تەك EVA ولشەمدەرىمەن شەكتەلىپ قالۋعا بولمايدى. باعدارلاماعا الەۋمەتتىك تۇراقتىلىق رەيتينگىن دە ەنگىزۋگە ءتيىسپىز.
سونىمەن قاتار, ءبىز ءوز قىزمەتىمىزدە تەك ەكونوميكالىق ءبولىككە بايلانىپ قالماۋىمىز كەرەك. مىسالى, قور مەن ونىڭ ەنشىلەس كومپانيالارى قىزمەتىنىڭ اشىق, جاريا بولۋى ماڭىزدى, باسقا دا باسىمدىق بەرەتىن ماسەلەلەر كوپ.
– راسىندا, الەۋمەتتىك تۇراقتىلىق رەيتينگى ادام تاعدىرىمەن تىكەلەي بايلانىستى عوي. وسى رەتتە قىزمەتكەرلەردى بارلىق سالاداعى جۇمىستارعا كەڭىنەن تارتۋ قانشالىقتى ءتيىمدى؟
– وعان كۇمانىم جوق. تابىسقا جەتۋدىڭ كىلتى بارلىق قىزمەتكەرلەردىڭ, قىزىعۋشىلىق تانىتقان تاراپتاردىڭ جان-جاقتى, بىرلەسىپ جۇمىس ىستەۋىندە جاتىر. ءبىر كىسىدەي جۇمىلىپ قىزمەت جاساماساق ترانسفورماتسيا بەرەتىن مۇمكىندىكتەرگە تولىققاندى قول جەتكىزە المايمىز.
مەملەكەتتىك ورگاندار – ءبىزدىڭ ەڭ نەگىزگى ارىپتەستەرىمىزدىڭ ءبىرى. ولارعا دا ءتۇسىندىرىپ, جەتكىزۋىمىز كەرەك, مينيسترلىكتەر بۇل كەشەندى شارۋاعا تەك باقىلاۋ جاساپ وتىرماۋى نەمەسە تىس قالماۋى قاجەت. ولار ءبىزدىڭ باستى ارىپتەستەرىمىز بولعاندىقتان بىرلەسكەن ءىس-قيمىل عانا بارشامىزدى تابىسقا جەتكىزەدى.
– باعدارلامانىڭ ورىندالۋىنا ەل باسشىلىعى تاراپىنان باقىلاۋ جاساۋ, قولداۋ كورسەتۋ جاعى قالاي؟
– قوردىڭ ديرەكتورلار كەڭەسىنىڭ توراعاسى – قازاقستان رەسپۋبليكاسىنىڭ پرەمەر-ءمينيسترى كارىم ءماسىموۆ. ءبىزدىڭ جاقىندا ءوتكەن كەزدەسۋىمىزگە كەڭەس مۇشەلەرى – قازاقستان رەسپۋبليكاسى پرەزيدەنتىنىڭ كومەكشىسى ەربول ورىنباەۆ, ەكونوميكا جانە بيۋدجەتتىك جوسپارلاۋ ءمينيسترى ەربولات دوساەۆ قاتىستى. ولار باعدارلامانىڭ قور ءۇشىن عانا ەمەس, جالپى مەملەكەت ءۇشىن ماڭىزدىلىعىن جاقسى ءتۇسىنىپ وتىر. سول سەبەپتى ءبىز ۇكىمەت پەن مەملەكەتتىك ورگاندار تاراپىنان ءاردايىم قولداۋ كۇتەمىز.
«سامۇرىق-قازىنا» ۇلتتىق ءال-اۋقات قورىن ترانسفورماتسيالاۋ باعدارلاماسى قازىرگى ۋاقىتتا قىزۋ ىسكە اسىرىلۋدا. كەشەندى ءىس-شارالاردىڭ بارلىعى دا ەلباسىنىڭ 2050 جىلعا دەيىنگى دامۋ ستراتەگياسىندا ايقىنداپ بەرىلگەن مىندەتتەردى ورىنداۋ ماقساتىندا اتقارىلىپ جاتىر. بۇل ماقساتتى لايىقتى ىسكە اسىرۋ ءوز كۇشىنە سەنەتىن جانە جاۋاپكەرشىلىكتەن قاشپايتىن, مەملەكەتشىل, جوعارى كاسىبي مامانداردىڭ عانا قولىنان كەلەرى انىق.
سۇحباتتاسقان
ساۋىتبەك ابدراحمانوۆ.