استانا. 30 مامىر. ەۋرازيالىق ەكونوميكالىق وداقتىڭ قۇرىلۋى تەك ەكونوميكالىق سيپاتتا عانا ەمەس, سونىمەن قاتار رەسەي, بەلارۋس جانە قازاقستان ەلدەرىنىڭ تاۋەلسىزدىكتەرى تۇرعىسىنان العاندا دا اسا ماڭىزدى بولىپ تابىلادى. رەسەي مەملەكەتتىك دۋماسىنىڭ ونەركاسىپ جونىندەگى كوميتەتى توراعاسىنىڭ ءبىرىنشى ورىنباسارى ۆلاديمير گۋتەنەۆتىڭ سوزىنە سىلتەمە جاساعان ريا «نوۆوستي» وسىنى ماعلۇم ەتتى.
بارشاعا بەلگىلى, كەشە رەسەي, بەلارۋس جانە قازاقستان مەملەكەتتەرىنىڭ پرەزيدەنتتەرى كەشە, بەيسەنبى كۇنى استانادا 2015 جىلدىڭ 1 قاڭتارىنان باستاپ ىسكە كىرىسەتىن ەاەو (ەۋرازيالىق ەكونوميكالىق وداق) قۇرۋ جونىندەگى كەلىسىمگە قول قويدى.
«ەاەو قۇرۋ جونىندەگى كەلىسىمگە قول قويۋ – تەك رەسەي, قازاقستان جانە بەلارۋس مەملەكەتتەرىنىڭ عانا ەمەس, سونداي-اق رەسەيدىڭ جاقىن شەڭبەرىنە كىرەتىن الەمدەگى كوپتەگەن ەلدەردىڭ تاريحىنداعى كوپتەن كۇتكەن وراسان زور وقيعان. سولتۇستىك اتلانتيكانىڭ وزىنە ءتان ەكى ءجۇزدى ستاندارت ۇستانىپ وتىرعان قازىرگى گەوساياسات جاعدايىندا مۇنداي تىعىز ينتەگراتسيالى فورماتتى بەكىتىپ الۋ ەكونوميكا تۇرعىسىنان عانا ەمەس, سونىمەن قاتار ءبىزدىڭ بارلىق ەلدەرىمىزدىڭ تاۋەلسىزدىكتەرى تۇرعىسىنان دا اسا ماڭىزدى قادام بولىپ تابىلادى», - دەدى جۋرناليستەرگە گۋتەنەۆ.
ول عىلىمعا جانە ءوندىرىسىنىڭ كۇردەلىلىگىنە تاۋەلدىلىگىنە بايلانىستى نارىق كولەمىن انىقتاپ الۋدى دا ۇسىندى.
«ءبىز ءوزىمىزدىڭ اۆتوموبيل ونەركاسىبىمىزدى جاساپ الۋىمىزعا دا بولادى. بىراق ونىڭ رىنوگى كەم دەگەندە 60-80 ميلليون (ادام) بولۋى كەرەك. ءوز جەڭىل ونەركاسىىمىزدى جاساپ الۋىمىزعا دا بولادى. الايدا, ونىڭ نارىعى 30 ميلليوننان كەم بولماسىن. ال قۋاتتى كەمە جاساۋ جانە عارىش كەشەنىن جاساۋ ءۇشىن كەم دەگەندە 250-300 ميلليون ادامدىق نارىعىمىز بولماسا, سىرتقى ەكسپانسياعا قاۋقارسىز بولامىز», - دەدى دەپۋتات.
بۇدان بۇرىن حابارلانعانداي, مۇنداي وداقتى قۇرۋ وعان قاتىسۋشى ەلدەردى ينتەگراتسيانىڭ جاڭا بيىك دەڭگەيىنە كوتەرە تۇسۋگە جول اشاتىنى ايتىلدى. ەندى جوعارىداعى ءۇش ەل ءوز ارالارىندا ەركىن ساۋدا-ساتتىق, كاپيتال مەن جۇمىس كۇشىنىڭ قوزعالىسىنا, ەكونوميكانىڭ ەنەرگەتيكا, ونەركاسىپ, اۋىل شارۋاشىلىعى ترانسپورت دەپ اتالاتىن ءتۇيىندى سالالارىندا ۇيلەسىمدى ساياساتتى جۇزەگە اسىرۋعا كەپىلدىك بەرۋگە مىندەتتەمە الىپ وتىر. وسىلايشا 170 ميلليون ادامى بار تمد كەڭىستىگىندە دامۋدىڭ جاڭا قۋاتتى ەكونوميكالىق ورتالىعىنا اينالاتىن اسا ءىرى جالپى نارىق قالىپتاستىرۋ اياقتالىپ كەلەدى.
دەپۋتاتتىڭ پىكىرىنشە, رەسەي, بەلارۋس جانە قازاقستان ەلدەرىنىڭ بىرىگۋى, سونداي-اق كەلەشەكتە بۇل وداققا باسقا دا مەملەكەتتەردىڭ, - ولاردىڭ اراسىندا بۇرىن كەڭەستىك شەڭبەرگە كىرمەگەندەرى دە بار - كىرۋ ىقتيمالدىلىعى العا قويىلعان بۇل مىندەتتەردى كەرەمەت ورىنداپ شىعۋعا مۇمكىندىك بەرەدى.
مۇرات ايتقوجا.
دەرەككوز: ريا نوۆوستي
فوتو: ريا نوۆوستي. ميحايل كليمەنتەۆ.