ارنايى ەكونوميكالىق ايماققا كەلگەن ينۆەستيتسيانىڭ يگىلىگىن كورەر كۇندى كۇتكەلى كوپ جىل. ينفراقۇرىلىمى ساي ايماقتار ينۆەستيتسيا قۇيۋعا ىقىلاستىلاردى جاتسىنعان جوق. سۇراعان ورنىن بەرىپ, ەكونوميكاعا ۇلەس قوساتىن جوبالارعا ەسىگىن ايقارا اشقالى دا ءبىراز ۋاقىت بولدى. قاراعاندىداعى «سارىارقا» ارنايى ەكونوميكالىق ايماعىندا ىسكە اسۋعا ءتيىس سونداي جوبانىڭ ءبىرى – «Sillumin of Qazaqstan» جشس-نىڭ اليۋميني جانە بيمەتالل رادياتورلار ءوندىرىسى.
جوبا جەتەكشىسى نۇرسۇلتان جۇمابەكتىڭ ايتۋىنشا, زاۋىت 2022-2024 جىلدار ارالىعىندا بوي كوتەرەدى. قازىرگى تاڭدا جەرگە قاتىستى جۇمىستار باستالعان. ياعني زاۋىت سالۋدىڭ العاشقى قادامدارى جاسالعان. جوباعا سايكەس زاۋىت قۇرىلىسى ءۇش كەزەڭنەن تۇرادى. ونىڭ ءبىرىنشى كەزەڭى 2024 جىلدارعا مەجەلەنگەن ەكەن. بۇيىرسا, 2024 جىلدىڭ اقپانىندا زاۋىت اشىلادى دەگەن جوسپار بار. ودان كەيىنگى ەكى كەزەڭدە زاۋىتتىڭ قۋاتىن ارتتىرۋعا نەگىزدەلگەن ءوندىرىستى ۇلعايتۋ كوزدەلەدى. ول دا كەزەڭ-كەزەڭىمەن ىسكە اسپاق.
– جوبانىڭ قۇنى 17 ملرد 710 ملن تەڭگە شاماسىندا. ءبىرىنشى كەزەڭدە «V Manegment» كومپانياسىنىڭ قاراجاتى 1,7 ملرد تەڭگە بولسا, 14,1 ملرد تەڭگە نەسيەگە الىنادى. نەسيەنىڭ بەلگىلى ءبىر پايىزى «دامۋ» قورى ارقىلى سۋبسيديالانادى. جوبانىڭ ءوزىن-ءوزى اقتاۋ مەرزىمى – 6 جىل. جوبا ىسكە قوسىلعاندا 183 ادام جۇمىسقا الىنادى. قۋاتتىلىعى – ءبىرىنشى كەزەڭدە جىلىنا 3,3 ملن سەكتسيا, – دەيدى ن.جۇمابەك.
كومپانيا باسشىسى ءبىرىنشى كەزەكتە اكىمشىلىك-تۇرمىستىق كەشەن, ءوندىرىس, ينجەنەرلىك جۇيەلەر سالىناتىنىن ايتادى. زاۋىت جەرگىلىكتى تۇرعىنداردى جۇمىسپەن قامتيتىن بولادى.
مۇنداعى اليۋميني جانە بيمەتالدى رادياتورلار شىعارۋ ءوندىرىسى بىرنەشە تسيكلدى. ياعني ءاليۋمينيدى بالقىتىپ, قۇيۋدان باستاپ, جيناپ, بوياپ, قاپتاپ شىعارۋعا دەيىنگى بارلىق ءوندىرىس زاۋىتتا جۇزەگە اسىرىلادى. قىسىممەن قۇيۋ تەحنولوگياسى قولدانىلادى.
– ۋتيليزاتسياعا تۇسكەن كولىكتەردەگى ءاليۋمينيدى قايتا قورىتىپ, بالقىتۋ ارقىلى رادياتور قۇيىلادى. ودان سوڭ جيناقتالىپ, بويالىپ, قاپتالىپ, نارىققا شىعارعانعا دەيىنگى پروتسەستىڭ ءبارى زاۋىت ىشىندە اتقارىلادى, – دەيدى كومپانيا باسشىسى.
وسىلايشا, وندىرىستەگى ءونىم شىعارۋ بىرنەشە ساتىنى قامتيدى. ءۇش كەزەڭ تولىق ىسكە اسقاندا جىلىنا 8 ملن سەكتسيا رادياتور نارىققا شىعادى. جوبا ەكونوميكاعا شيكىزاتتىق ەمەس ەكسپورتتى دامىتۋعا ۇلەس قوسۋدى دىتتەيدى. سول ارقىلى ەلدىڭ ونەركاسىپ الەۋەتىندە جاڭا كلاستەر قۇرۋدى ماقسات ەتەدى. كومپانيا باسشىلىعىنىڭ مالىمدەۋىنشە, زاۋىتتىڭ «سارىارقا» ارنايى ەكونوميكالىق ايماعىندا العان جەر تەلىمىنىڭ اۋقىمى – 6 گەكتار. زاۋىتتىڭ ءۇش كەزەڭىندە دە قۇرىلىس جۇمىسىنا تارتىلاتىن ادام سانى جۇزگە جۋىق.
– زاۋىت جۇمىسىنا نەگىزىنەن جەرگىلىكتى تۇرعىندار تارتىلادى. زاۋىت تاراپىنان وقىتىپ, مامانداردى دايىنداۋعا دەن قويامىز. كەي ماماندار ۇيرەتۋ ءۇشىن رەسەيدەن كەلەدى, – دەيدى ن.جۇمابەك.
جالپى, قازىر اليۋميني رادياتورلار جىلۋ جۇيەسىندە كەڭىنەن قولدانىلىپ ءجۇر. بۇلاردىڭ وزگە رادياتورلارعا قاراعاندا بىرقاتار ارتىقشىلىعى بار. ايتالىق, بىرىنشىدەن اليۋميني رادياتورلار باسقالارعا قاراعاندا باعاسى جاعىنان ءسال ارزانداۋ تۇسەتىنى جاسىرىن ەمەس. سونىمەن قاتار جىلۋ بولۋىندە وزگەلەردەن وزىقتىعى تاعى بار. وعان قوسا, سالماعى جەڭىل. دەرەكتەرگە سۇيەنسەك, ونىڭ ءبىر سەكتسياسىنىڭ سالماعى 1,5 كگ كولەمىندە. سونىڭ وزىندە 15 سەكتسيالى ۇزىن باتارەيا بار-جوعى 15 كيلو بولادى. بۇل ءوز كەزەگىندە تاسىمالداۋ مەن مونتاجداۋدا قيىندىق تۋدىرمايدى. ال رادياتورداعى ىستىق سۋدىڭ گرادۋسىن 130 گرادۋسقا دەيىن كوتەرۋگە مۇمكىندىك بەرەدى. ءاليۋمينيدىڭ جىلۋ وتكىزگىشتىگى وتە جوعارى. ءبىر سەكتسيانىڭ 150-200 ۆت جىلۋ ەنەرگياسىن وتكىزە الاتىن مۇمكىندىگى بار. سونىمەن بىرگە ەستەتيكالىق بەينەسى, ساپالى بويالۋى دا ءباسىن جوعارى قىلادى.
قاراعاندى وبلىسى