استانا. 30 مامىر. رەسەي مەملەكەتتىك دۋماسىنىڭ سپيكەرى سەرگەي نارىشكين ەۋرازيالىق ەكونوميكالىق وداقتىڭ پوستكەڭەستىك كەزەڭ تاريحىنداعى ۇلكەن ءبىر بەتبۇرىستى قادام بولىپ تابىلاتىنىن ايتتى. بۇل تۋرالى ريا «نوۆوستي» حابارلادى. بۇدان بۇرىن ءمالىم ەتىلگەندەي, رەسەي, بەلارۋس جانە قازاقستان مەملەكەتتەرىنىڭ پرەزيدەنتتەرى كەشە, بەيسەنبى كۇنى استانادا 2015 جىلدىڭ 1 قاڭتارىنان باستاپ ىسكە كىرىسەتىن ەاەو (ەۋرازيالىق ەكونوميكالىق وداق) قۇرۋ جونىندەگى كەلىسىمگە قول قويدى. وسىلايشا, 170 ميلليون ادامى بار تمد كەڭىستىگىندە دامۋدىڭ جاڭا قۋاتتى ەكونوميكالىق ورتالىعىنا اينالاتىن اسا ءىرى جالپى نارىق قالىپتاستىرۋ اياقتالىپ كەلەدى.
«استانادا ەۋرازيالىق ەكونوميكالىق وداق قۇرۋ جونىندەگى كەلىسىمگە قول قويىلۋىن ەشبىر اسىرىپ ايتپاي-اق ونىڭ پوستكەڭەستىك كەزەڭ تاريحىنداعى ەڭ ءبىر شەشۋشى قادام بولىپ وتىرعانىن اتاپ وتۋگە بولادى. قازاقستان پرەزيدەنتى نۇرسۇلتان نازارباەۆتىڭ بۇل يدەياسى ارادا 20 جىل وتكەندە ناقتىلى قۇقىقتىق پىشىنگە ەنگەلى تۇر», - دەدى نارىشكين جۋرناليستەرگە.
«الەم رىنوگىندا قالىپتاسىپ وتىرعان كۇردەلى احۋالدى ەسكەرە كەلگەندە, اتالمىش شەشىمنىڭ ەۋرازيالىق ەكونوميكالىق وداق ەلدەرىنىڭ دامي تۇسۋلەرىنە جاڭا مۇمكىندىكتەر الىپ بەرەتىنىنە سەنىمدىمىن», - دەپ اتاپ ءوتتى ول.
مەملەكەتتىك دۋمانىڭ توراعاسى سونىمەن بىرگە ءوز كەزەگىندە ءۇش ەل پارلامەنتىنىڭ كەدەن وداعى مەن ءبىرتۇتاس ەكونوميكالىق كەڭىستىك شەڭبەرىندەگى زاڭنامالاردىڭ ۇيلەسىمدى جۇمىس جاساۋلارىنا ايتارلىقتاي ۇلەس قوسقاندارىن دا ايتىپ ءوتتى. «بۇل جۇمىستار, ءسوز جوق, جالعاسىن تاباتىن بولادى», - دەدى سپيكەر سوڭىندا.
مۇرات ايتقوجا.
دەرەككوز: ريا «نوۆوستي».
فوتو: ريا «نوۆوستي». ميحايل كليمەنتەۆ.