استانا قالاسىنىڭ اكىمى التاي كولگىنوۆ Instagram پاراقشاسىندا سپورت نىساندارىنىڭ قۇرىلىسى مەن سول جاعالاۋدان سالىناتىن تاعى ءبىر وقۋشىلار سارايى تۋرالى ءمالىم ەتتى, دەپ حابارلايدى Egemen.kz.
- ەلوردادا بالالار مەن قالا تۇرعىندارىنا ارنالعان بىرقاتار سپورت جانە دەمالىس ورتالىعىن سالىپ جاتىرمىز. مىسالى الماتى اۋدانىندا («قازاقستان» سپورت سارايى جانىندا) جەكە ينۆەستيتسيالار ەسەبىنەن كوپفۋنكتسيونالدى بالالار مەن جاسوسپىرىمدەرگە ارنالعان سپورت ورتالىعىنىڭ قۇرىلىسى ءجۇرىپ جاتىر. سپورت ورتالىعىنىڭ بازاسىندا فۋتبول الاڭدارى, سول سياقتى ۇستەل تەننيسىنە, دزيۋدوعا, پارادزيۋدوعا, حورەوگرافياعا جانە ت.ب. ارنالعان زالدار بولادى, - دەپ جازدى ەلوردا اكىمى.
سونداي-اق اتالمىش كوپفۋنكتسيونالدى سپورت ورتالىعىنىڭ بازاسىندا سپورتشىلاردى وڭالتۋعا ارنالعان دارىگەرلىك-دەنە شىنىقتىرۋ ديسپانسەرى بولادى.
انىقتالعانداي, جەكە ينۆەستيتسيالار سوماسى - 5,5 ملرد تەڭگە. سپورت ورتالىعىن 2023 جىلى اشۋ جوسپارلانىپ وتىر.
- سول سياقتى قالادا جەكە ينۆەستيتسيالار ەسەبىنەن ۇستەل تەننيسى ورتالىعىن («الاۋ» مۇز سارايىنىڭ جانىندا) اشامىز. سونىمەن قاتار قالانى ارالاۋ بارىسىندا جاڭا وقۋشىلار سارايىنىڭ (ەسىل اۋدانى, تۇران داڭعىلى) قۇرىلىسىمەن تانىستىم. وقۋشىلار سارايىنىڭ قۇرىلىسى دا جەكە ينۆەستيتسيالار ەسەبىنەن ءجۇرىپ جاتىر. وقۋشىلار سارايىنىڭ جالپى اۋدانى شامامەن 6,5 مىڭ شارشى مەتردى قۇرايدى. ونىڭ بازاسىندا باسسەين, سول سياقتى گيمناستيكا, سپورتتىق-بال بيلەرى زالدارىن, شاحمات, روبوتوتەحنيكا جانە IT-باعدارلامالاۋ كابينەتتەرىن جانە ت.ب. اشۋ جوسپارلانىپ وتىر. وڭ جاعالاۋدا وقۋشىلار سارايى بار. قالا تۇرعىندارىنىڭ ءوتىنىشى بويىنشا سول جاعالاۋدا وقۋشىلار سارايىنا ارنالعان ورىن ءبولىندى. 2023 جىلى وقۋشىلار سارايىن اشۋدى جوسپارلاپ وتىرمىز, - دەپ جازدى كولگىنوۆ.
قالا اكىمىنىڭ ايتۋىنشا, بوكس, جەكپە-جەك ونەرى ورتالىقتارى, جەكپە-جەك زالى, سپورتشىلارعا ارنالعان مەديتسينالىق ورتالىق اشىلدى. «جاستار» سارايىندا, «تولقىن» سك جانە ت.ب. جوندەۋ جۇمىسى جۇرگىزىلدى. «قازاقستان» سپورت كەشەنىندە قايتا قۇرۋ جانە جاڭعىرتۋ جۇمىسى ءجۇرىپ جاتىر. ء«وندىرىس» جانە «كوكتال-2» ەلدى مەكەندەرىندە دەنە شىنىقتىرۋ-ساۋىقتىرۋ كەشەندەرى اشىلدى. ولاردا سپورتتىڭ 10 ءتۇرى بويىنشا 1 مىڭعا جۋىق بالا جاتتىعادى.
- قالا تۇرعىندارىنىڭ سپورتپەن شۇعىلدانىپ, بوس ۋاقىتىن پايدالى وتكىزە الۋى ءۇشىن سپورت جانە دەمالىس ورتالىقتارىنىڭ جەلىسىن ارى قاراي دا كەڭەيتەتىن بولامىز. سپورت ورتالىقتارى بۇقارالىق سپورتتى دامىتۋعا جانە بالالار مەن جاسوسپىرىمدەر سپورتىنا قولداۋ كورسەتۋگە مۇمكىندىك بەرەدى, - دەپ جازدى ەلوردا اكىمى.