17-18 قاراشادا استانادا اقپارات جانە قوعامدىق دامۋ مينيسترلىگى پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيامەن بىرلەسىپ, بۇۇ-ايەلدەر قۇرىلىمىنىڭ تەحنيكالىق قولداۋ كورسەتۋىمەن «قازاقستان دامۋىنىڭ جاڭا ساتىسىنداعى وتباسىلىق-دەموگرافيالىق جانە گەندەرلىك ساياسات» اتتى حالىقارالىق عىلىمي كونفەرەنتسيا وتكىزۋدە, دەپ حابارلايدى Egemen.kz.
كونفەرەنتسيا الاڭى قازاقستان, چەحيا, شۆەيتساريا, ءۇندىستان جانە اقش عالىمدارى مەن ساراپشىلارىن, سونداي-اق پارلامەنت دەپۋتاتتارىن, ورتالىق جانە جەرگىلىكتى اتقارۋشى ورگانداردىڭ, ۇەۇ جانە حالىقارالىق ۇيىمداردىڭ وكىلدەرىن بىرىكتىردى.
كونفەرەنتسيادا بالالىق شاقتىڭ قاۋىپسىزدىگىن قامتاماسىز ەتۋ, گەندەرلىك تەڭدىك, باقىتتى وتباسى مودەلىن قالىپتاستىرۋ, دەموگرافيالىق دامۋ پەرسپەكتيۆالارى, تۇرمىستىق زورلىق-زومبىلىققا قارسى ءىس-قيمىل ماسەلەلەرى تالقىلاندى. وسى تاقىرىپتاردىڭ ارقايسىسىنا جەكە سەسسيا ارنالعان.
پرەزيدەنت اكىمشىلىگى باسشىسىنىڭ ورىنباسارى, قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا كونفەرەنتسيانى اشتى.
«قازاقستان ءۇشىن وتباسى ينستيتۋتى مەملەكەتتىڭ ماڭىزدى تىرەگى جانە وتباسى ساياساتى ۇلتتىق دامۋ ستراتەگياسىنىڭ اجىراماس بولىگى. ۇكىمەتتىڭ الدىنا جىل سايىن انا مەن بالانى قورعاۋ, وتباسىنىڭ ءال-اۋقاتى سالاسىنداعى زاڭنامالىق جانە ينستيتۋتسيونالدىق مۇمكىندىكتەردى كەڭەيتۋ بويىنشا مىندەتتەر قويىلادى. ءبىز ءۇشىن گەندەرلىك تەڭدىك سالاسىنداعى ءوز تاجىريبەمىزدى باسقا ەلدەردىڭ عىلىمي-ساراپتامالىق قوعامداستىعىمەن ءبولىسۋ, سونداي-اق بىرلەسكەن جوبالارعا قاتىسۋ ماڭىزدى.
قازىرگى اۋقىمدى الەم بىزگە كوپتەگەن جاڭا سىناقتارمەن كۇن ءتارتىبىن بەلگىلەيدى. بۇگىنگى تاڭدا عالىمدار مەن ساراپشىلاردىڭ قاتىسۋىمەن وتباسىنىڭ تاربيەلىك رولىنە, دەموگرافيالىق دامۋىنا, ادامنىڭ ءومىر ساپاسىنا اسەر ەتەتىن گەندەرلىك تەڭدىككە بايلانىستى كۇردەلى ماسەلەلەردى شەشۋدىڭ جولدارىن تابۋ وتە ماڭىزدى», دەپ ۇلتتىق كوميسسيانىڭ باسشىسى عالىمدار مەن ساراپشىلاردى كۇردەلى ماسەلەلەردى شەشۋ جولدارىن تابۋعا شاقىردى.
كونفەرەنتسيا اياسىندا قازاقستاننىڭ سوڭعى ءۇش جىلداعى وتباسىلىق جانە گەندەرلىك ساياسات سالالارىنىڭ تاجىريبەلەرى ۇسىنىلدى.
اتاپ ايتقاندا, ءبىزدىڭ ەلىمىزدە ءال-اۋقات يندەكسى ازىرلەندى. مەكتەپتەگى پسيحولوگيالىق قىزمەتتەردىڭ بىرىڭعاي ەرەجەلەرى جۇمىس ىستەيدى. وڭىرلەردە بالا قۇقىقتارى جونىندەگى ۋاكىلدەر تاعايىندالدى.
قازاقستان رەسپۋبليكاسىندا وتباسىلىق جانە گەندەرلىك ساياساتتى دامىتۋدىڭ 2030 جىلعا دەيىنگى تۇجىرىمداماسى وزەكتەندىرىلدى. ناتيجەسىندە تۇرمىستىق زورلىق-زومبىلىقتىڭ الدىن الۋ جانە ايەلدەردىڭ ءرولىن قامتاماسىز ەتۋ جونىندەگى نورماتيۆتىك بازا ايتارلىقتاي نىعايتىلدى.
مەملەكەتتىك وتباسىلىق ساياساتتى ىسكە اسىرۋ, وتباسىلىق ساياسات سالاسىنداعى تەندەنتسيالارعا مونيتورينگ پەن جۇيەلى تالداۋدى جۇزەگە اسىرۋ ءۇشىن ۇكىمەتتىڭ جاۋاپكەرشىلىگى ارتتىرىلدى. ءتيىستى فۋنكتسيالار اقپارات جانە قوعامدىق دامۋ مينيسترلىگىنىڭ بەيىندىك كوميتەتىنە بەرىلدى.
مەملەكەتتىك وتباسىلىق ساياساتتى قالىپتاستىرۋ مەن تالداۋدىڭ ينستيتۋتسيونالدىق نەگىزى دامۋدا. وتباسى ينستيتۋتىن زەرتتەۋ ورتالىعى قۇرىلدى.
«قازاقستاندىق وتباسىلار», «وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى» ۇلتتىق باياندامالار ۇنەمى جاريالانىپ تۇرادى. حالىقارالىق ۇيىمداردىڭ قولداۋىمەن ۇلتتىق زەرتتەۋلەر كەشەنى جۇرگىزىلۋدە.
وسى جىلى قازاقستان دۇنيەجۇزىلىك ەكونوميكالىق فورۋمنىڭ گەندەرلىك تەڭدىك بويىنشا كورسەتكىشتەرىن جاقسارتىپ, 80-ءشى ورىننان (2021 جىل) 65-ءشى ورىنعا (2022 جىل) دەيىن كوتەرىلگەندىگىن ساراپشىلار اتاپ ءوتتى.
كونفەرەنتسيا قورىتىندىسى بويىنشا عىلىمي نەگىزدەلگەن ساراپتامالىق تالداۋ ازىرلەنەدى. ول ۇكىمەت پەن جەرگىلىكتى باسقارۋ ورگاندارىنىڭ قۇرىلىمدارىنا جەتكىزىلەدى.