باس پروكۋراتۋرا قازاقستاندىقتارعا ۇندەۋ جولدادى

«الەۋمەتتىك جەلىلەردە سوت تىيىم سالعان ۇيىمنىڭ 2022 جىلعى 20 قاراشادا زاڭسىز ميتينگىلەردى وتكىزۋگە, قاتىسۋعا جانە وزگە دە قۇقىققا قايشى ارەكەتتەر جاساۋعا شاقىرۋلار تاراپ كەتتى. ۇلتتىق جانە حالىقارالىق قۇقىققا سايكەس, تەرروريزمدى نەمەسە زورلىق-زومبىلىق ەكسترەميزمدى ناسيحاتتايتىن وسىنداي ۇيىمداردىڭ كەز كەلگەن قىزمەتىنە تىيىم سالىنعانىن اتاپ وتەمىن», دەدى جاندوس ومىراليەۆ.

ونىڭ ايتۋىنشا, مۇنداي اكتسيالاردىڭ ۇيىمداستىرىلۋى «قازاقستان رەسپۋبليكاسىندا بەيبىت جينالىستار, ميتينگىلەر, شەرۋلەر, پيكەتتەر مەن دەمونستراتسيالار ۇيىمداستىرۋ جانە وتكىزۋ ءتارتىبى تۋرالى» زاڭىنا قايشى كەلەدى (5-باپتىڭ 6-تارماعى, 14-باپتىڭ 1-تارماعىنىڭ 2-تارماقشاسى).

ەگەر اكتسيالار مەملەكەتتىڭ قاۋىپسىزدىگىنە نۇقسان كەلتىرۋگە, باسقا دا قىلمىستىق ارەكەتتەر جاساۋعا باعىتتالعان بولسا, ولاردى جۇرگىزۋگە دە جول بەرىلمەيدى (زاڭنىڭ 14-بابىنىڭ 1-تارماعىنىڭ 1-تارماقشاسى).

«بۇل بەيبىت جينالىستاردى ۇيىمداستىرۋ مەن وتكىزۋدىڭ نەگىزگى قاعيداتتارىنىڭ ءبىرى - ولاردىڭ زورلىق-زومبىلىقسىز سيپاتى مەن زاڭدىلىعىنا, سونداي-اق قوعامدىق ءتارتىپتى, دەنساۋلىقتى ساقتاۋدى, باسقا ادامداردىڭ قۇقىقتارى مەن بوستاندىقتارىن قورعاۋدى قامتاماسىز ەتۋگە بايلانىستى (زاڭنىڭ 3-بابى). اتالعان زاڭسىز ارەكەتتەردى جاساۋمەن ۇشتاسقان تىيىم سالىنعان ۇيىمداردىڭ شاقىرۋلارى, ۇيىمداستىرۋى جانە ولارمەن ۇيىمداستىرىلعان اكتسيالارعا قاتىسقانى ءۇشىن اكىمشىلىك (اقبتك-ءنىڭ 488-بابى) جانە قىلمىستىق جاۋاپتىلىق (قك-ءنىڭ 179-بابى (بيلىكتى كۇشتەپ باسىپ الۋعا شاقىرۋ), 405-بابى (سوت تىيىم سالعان ۇيىمداردىڭ قىزمەتىنە قاتىسۋ)) كوزدەلگەن», دەلىنگەن ۇندەۋدە.

بۇل رەتتە, باس پروكۋروردىڭ ورىنباسارى قۇقىق قورعاۋ ورگاندارى قازاقستان رەسپۋبليكاسىنىڭ زاڭناماسىن بۇزاتىن ادامدارعا زاڭدا كوزدەلگەن شارالاردى قابىلدايتىنىن جانە كەز كەلگەن قۇقىق بۇزۋشىلىقتاردىڭ جولىن كەسەتىنىن ەسكە سالدى.

«17 قاراشادا ۇلتتىق قاۋىپسىزدىك كوميتەتىنىڭ قىزمەتكەرلەرى پروكۋراتۋرا ورگاندارىنىڭ ىقپالداستىعىمەن جەتى ادامنان تۇراتىن قىلمىستىق توپ قىزمەتىنىڭ جولىن كەستى. ولاردىڭ بيلىكتى كۇشتەپ باسىپ الۋ ماقساتىندا قارۋ-جاراق پەن تۇتاندىرعىش قوسپالاردى پايدالانا وتىرىپ, جاپپاي تارتىپسىزدىكتەر مەن مەملەكەتتىك جانە قۇقىق قورعاۋ ورگاندارىنىڭ عيماراتتارىنا, تىرشىلىكتى قامتاماسىز ەتۋ وبەكتىلەرىنە شابۋىلدار جاساۋدى, ولاردىڭ قىزمەتكەرلەرىن ءولتىرۋدى جوسپارلاۋعا, سونداي-اق دايىنداۋعا قاتىستىلىعى تۋرالى قۇجاتتىق دالەلدەر الىندى. سونداي-اق ۇستالعان ادامداردىڭ تۇرعىلىقتى جەرى بويىنشا زاتتاي دالەلدەمەلەر دە الىندى. قىلمىستىق كودەكستىڭ 179-بابىنىڭ 2-بولىگى (ادامدار توبىنىڭ بيلىكتى كۇشتەپ باسىپ الۋىنا جاريا تۇردە شاقىرۋ) جانە 272-بابىنىڭ 1-بولىگى (جاپپاي تارتىپسىزدىكتەردى ۇيىمداستىرۋ) بويىنشا سوتقا دەيىنگى تەرگەپ-تەكسەرۋ باستالدى. وسىعان بايلانىستى باس پروكۋراتۋرا ازاماتتاردى سوت تىيىم سالعان ۇيىمدار مەن ولاردىڭ ارتىندا تۇرعان ادامداردىڭ ارانداتۋىنا ەرمەۋدى, ولاردىڭ زاڭسىز ارەكەتتەرىنە قاتىسۋدان باس تارتۋدى جانە زاڭدى مۇلتىكسىز ساقتاۋدى الدىن الا ەسكەرتەدى», دەدى جاندوس ومىراليەۆ.