قازاقستان رەسپۋبليكاسى پرەزيدەنتتىگىنە جالپىۇلتتىق سوتسيال-دەموكراتيالىق پارتياسى اتىنان كانديدات نۇرلان اۋەسباەۆ اقمولا وبلىسى شورتاندى كەنتىندە سايلاۋشىلارمەن كەزدەستى.
ءىس-شارا بارىسىندا جينالعان قاۋىمعا ءوزىنىڭ سايلاۋالدى باعدارلاماسىنىڭ باسىم باعىتتارى جونىندە بايانداپ بەردى. تۇرعىندار وزدەرىن الاڭداتقان ساۋالدارعا تۇشىمدى جاۋاپ الدى.
قاجەتتى ينفراقۇرىلىم جوقتىعى سەكىلدى قازاقستاننىڭ بىرقاتار وڭىرىنە ءتان ماسەلە شورتاندىدا دا وزەكتى. نۇرلان اۋەسباەۆتىڭ پىكىرىنشە, جاعدايدى تۇزەتۋ ءۇشىن جەرگىلىكتى ءوزىن-ءوزى باسقارۋدى كۇشەيتۋ كەرەك. كانديدات بارلىق دەڭگەيلى دەپۋتاتتاردى ءبىر مانداتتىق وكرۋگتەردەن عانا سايلاۋ قاجەت دەپ ەسەپتەيدى. سول كەزدە عانا حالىق قالاۋلىلارى سايلاۋالدى باعدارلاماسىندا ايتقان ۋادەلەرىندە تۇرىپ, جاۋاپكەرشىلىكتى سەزىنەتىن بولادى.
«بيلىكتە دە وزگەرىستەر بولۋى قاجەت. قازاقستان پارلامەنتتىك-پرەزيدەنتتىك باسقارۋ ۇلگىسىنە وتۋگە ءتيىس. بۇل دەگەنىمىز, پرەزيدەنتتىڭ وكىلەتتىكتەرى تولىقتاي قايتا قاراستىرىلادى. مەملەكەتتى باسقارۋداعى باستى ءرول پارلامەنتكە تيەسىلى بولۋى كەرەك. زاڭ شىعارۋشى ورگاندى قايتا جاساقتاۋ قاجەت. دەپۋتاتتاردىڭ 50%-ى پارتيا تىزىمدەرى بويىنشا سايلانۋى قاجەت. حالىق قالاۋلىلارىنىڭ تەڭ جارتىسى ءبىر مانداتتىق وكرۋگتەردەن قۇرالۋعا ءتيىس», دەيدى ۇمىتكەر.