قازاقستان رەسپۋبليكاسى پرەزيدەنتتىگىنە كانديدات سالتانات تۇرسىنبەكوۆا ءسابيت مۇقانوۆ اتىنداعى سولتۇستىك قازاقستان وبلىستىق امبەباپ عىلىمي كىتاپحاناندا جەرگىلىكتى حالىقپەن كەزدەسۋ وتكىزدى.
كەزدەسۋدە ەلىمىزدەگى ايەلدەر كاسىپكەرلىگىن دامىتۋ تۋرالى ويلار ايتىلدى. ۇمىتكەر مەملەكەتتىك ورگانداردىڭ دەرەكتەرى مەن زەرتتەۋلەرىنە سىلتەمە جاساي وتىرىپ, ستاتيستيكانى جاريالادى.
ايەلدەر كاسىپكەرلىگى شوب سەكتورىنداعى جۇمىس ورىندارىنىڭ 31,4 پايىزىن قامتاماسىز ەتەدى. 2020 جىلعى مالىمەتتەرگە سايكەس, قازاقستاندا ايەلدەر باسقاراتىن كاسىپورىنداردىڭ ۇلەسى 28,3 پايىزدى قۇرادى. ولاردىڭ كوپشىلىگى شاعىن جانە ورتا بيزنەس وكىلدەرى, ولار وسى سەكتورداعى جۇمىس ورىندارىنىڭ 31,4%-ىن جانە ەلدىڭ جالپى ىشكى ءونىمىنىڭ شامامەن 14,6%-ىن قامتاماسىز ەتەدى.
س.تۇرسىنبەكوۆا شاعىن بيزنەس پەن جەكە كاسىپكەرلەردى سالىقتان تولىعىمەن بوساتۋدى ۇسىناتىنىن ايتتى. «كاسىپكەرلەردىڭ اياققا تۇرۋىنا مۇمكىندىك بەرۋىمىز كەرەك. ولار ورتا دەڭگەيگە جەتكەندە جەڭىلدەتىلگەن سالىق سالۋ قازىردىڭ وزىندە بار. ءىرى بيزنەسكە, اسىرەسە ويىن بيزنەسىنە, كەرىسىنشە, سالىقتى ارتتىرۋ كەرەك», دەدى ول.
سونداي-اق جينالعاندار كانديداتتان سايلاۋالدى باعدارلاماسى تۋرالى سۇرادى. اتاپ ايتقاندا, جيىندا ايەلدەردىڭ زەينەت جاسىن تومەندەتۋ, سوت رەفورماسى جانە ەكونوميكاداعى وزگەرىستەر تۋرالى ءسوز بولدى.