جەتى جۇتتىڭ ءبىرى – ءورت بيىل بيلىكتى دە, بۇقارانى دا بيدايشا قۋىردى. ەلدىڭ تۇكپىر-تۇكپىرىندە جۇرتتىڭ وزەگىن كۇيىك, ءوڭىرىن ءورت شالعان ايماق از ەمەس. اسىرەسە قىركۇيەكتەگى جالاڭداعان جالىن بۇقارانىڭ بەيۋاقىتتا كورگەن بەيمازا تۇسىندەي ەدى. وڭىردەگى ورتتەر جاي كەتكەن جوق. ءورت ءسوندىرۋ قىزمەتىن سىناپ, ەلگە ەسەسى كەتكەن تۇستارىن ەسكەرتىپ كەتتى.
ارقانىڭ ميداي دالاسىنداعى ازىن-اۋلاق ورمانىن ورتتەن قورعاپ قالۋ وزەكتىلىگى دە كەيىنگى جىلدارى كۇشەيىپ كەلەدى. وڭىردە تامىز-قىركۇيەكتەگى دالا ورتتەرى ءتىلسىز جاۋعا قالاي توسقاۋىل قويۋ كەرەكتىگىن اڭعارتتى.
قاراعاندى وبلىسىنىڭ توتەنشە جاعدايلار دەپارتامەنتىنىڭ دەرەگىنشە, بيىل وبلىستا 332 تابيعي ءورت بولىپتى. ونىڭ باسىم بولىگى قارقارالى جانە بۇقار جىراۋ اۋداندارىنىڭ اۋماعىندا تىركەلگەن.
– وبلىستاعى تابيعي ورتتەرگە ىستىق اۋا رايى, قاتتى جەل, جاۋىن-شاشىننىڭ جوقتىعى, نايزاعاي ىقپال ەتتى. سونداي-اق كەيبىر جاعدايلاردا ابايسىزدىق, اۋىل شارۋاشىلىعى تەحنيكاسىنىڭ اقاۋى, وسىمدىكتەردى باقىلاۋسىز ورتەۋ سياقتى ارەكەتتەر دە ءتىلسىز جاۋدىڭ تارالۋىنا اكەلىپ سوقتى, – دەدى وبلىستىق توتەنشە جاعدايلار دەپارتامەنتى باستىعى مۇرات قاتپانوۆ.
قازىر ءورت ءسوندىرۋ ورمان ستانساسىن اشۋ ماڭىزدى ءىس بولىپ وتىر. وسىعان وراي ايماقتا الداعى ۋاقىتتا قاراعاندى جانە اقتوعاي ورمان شارۋاشىلىقتارىندا وسىنداي ستانسانىڭ بەسەۋىن اشۋ جوسپاردا تۇر. وبلىستا بۇدان بۇرىن ءتورت ورمان ستانساسى ىسكە قوسىلعان ەدى. دەپارتامەنت وكىلدەرى مۇنداي ستانسالاردىڭ ورتپەن كۇرەستە تيىمدىلىگىن ايتادى. ءوڭىر باسشىلىعى دا بۇلاردى ىسكە قوسۋعا مۇددەلى.
مۇرات قاتپانوۆتىڭ بايانداۋىنشا, سوڭعى بەس جىلدا وبلىستا 45 ءورت ءسوندىرۋ بەكەتى قۇرىلعان. بەكەتتەر 50 مىڭعا جۋىق ادام تۇراتىن 82 ەلدى مەكەندە ورنالاسقان.
ءورت كەزىندە ەل ىشىنەن جاساقتالاتىن ەرىكتىلەردىڭ ماتەريالدىق-تەحنيكالىق جابدىقتالۋى دا كۇن تارتىبىندە تۇر. ۇلتتىق ساياباقتار مەن ورمانداردا ورتكە قارسى مونيتورينگ جۇيەسى ىسكە قوسۋ ۇسىنىلىپ وتىر. «سونىمەن قاتار جەر پايدالانۋشىلاردى قورعانىس جولاقتارىن جىرتۋعا مىندەتتەۋ دە وسى كۇرەستە قاجەت قادام», دەيدى قۇزىرلى ورىن ماماندارى.
جەرگىلىكتى بيلىك ءورت ءسوندىرۋ ورمان ستانسالارىنىڭ ازدىعىن جاسىرمايدى. ورمان شارۋاشىلىقتارىنىڭ تەحنيكامەن قامتىلۋى دا ۋاقىت تالابى.
– جالپى, وڭىردە ءورت ءسوندىرۋ ورمان ستانسالارى جەتىسپەيدى. ورمان شارۋاشىلىعى مەكەمەلەرى, ۇلتتىق تابيعي پاركتەرگە ارنايى تەحنيكا, قاجەتتى قۇرال-جابدىقتار قاجەت. بۇل قاجەتتىلىك جازدا, اسىرەسە تامىز-قىركۇيەك ايلارىنداعى جاعدايدا ايقىن سەزىلدى, – دەدى قاراعاندى وبلىسىنىڭ اكىمى جەڭىس قاسىمبەك توتەنشە جاعدايدىڭ الدىن الۋ جانە جويۋ كوميسسياسى وتىرىسىندا.
سول سەبەپتى دە ايماق باسشىسى قوسىمشا ورمان ءورت ءسوندىرۋ ستانسالارىن قۇرۋ ماسەلەلەرىن پىسىقتاۋدى قۇزىرلى ورىندارعا قاتاڭ تاپسىرىپ وتىر. ال اۋدان اكىمدەرىنە ەرىكتى ءورت ءسوندىرۋ جاساقتارى ءۇشىن قۇرال-جابدىقتار ساتىپ الۋعا بيۋدجەتتەن قاراجات قاراستىرۋ مىندەتى جۇكتەلەدى.
قاراعاندى وبلىسى