ءبىز جاڭارعان قازاق ەلىندە جاڭاشا ءومىر ءسۇرىپ جاتىرمىز. قازاقستاننىڭ جاڭارۋى وسىندا تۇراتىن بارلىق حالىقتىڭ, ياعني ەتنوستىڭ بىرلىككە دەگەن جاڭاشا ۇستانىم قالىپتاستىرۋىنان كورىنەدى.
جانە دە ءبىز بۇل جاڭارۋدى وي-سانامىز بەن ەل-جۇرت, وتانىمىزعا دەگەن ەرەكشە كوزقاراس, سۇيىسپەنشىلىگىمىز بەن ەل اراسىنداعى ىنتىماق-بىرلىكتىڭ تەڭ دارەجەدە ساقتالۋىنا قوسار ۇلەسىمىزدىڭ جاڭاشا قالىپتاسۋى دەپ تە سەزىنۋگە ءتيىسپىز. اسىرەسە ساۋاتتىلىعىمىزدى, مادەنيەتىمىز بەن ىسكەرلىك قابىلەتىمىزدى ارتتىرا وتىرىپ, وتانىمىزدىڭ ءوسىپ-وركەندەۋىنە سۇبەلى ۇلەسىمىزدى قوسۋ ءۇشىن بار كۇش-جىگەرىمىز بەن قايراتىمىزدى تولىق پايدالانا ءبىلۋىمىز كەرەك. جان-جاعىمىزعا بۇرىنعىداي ەمەس, ەندىگى جەردە جاڭاشا تالاپپەن قاراپ, ساراپتاي الۋىمىز دا اسا قاجەت.
مىسالى, ەرتەڭگى سايلاۋعا وسى ۋاقىتقا دەيىنگى: «بارساق تا, بارماساق تا ەرىكتىمىز», دەگەن ەسكىشە كوزقاراستى وزگەرتىپ, ءاربىرىمىز: «جوق, مەن – قازاقستان رەسپۋبليكاسىنىڭ ءتول ازاماتىمىن. سوندىقتان دا قانداي ءبىر سايلاۋعا بولسىن قاتىسىپ, ەلىمنىڭ جاڭارا, جاسارا تۇسۋىنە ءوز ۇلەسىمدى قوسۋىم كەرەك. وسى سەبەپتى مەنىڭ سايلاۋعا قاتىسۋىم وتە ماڭىزدى», دەگەن ۇلكەن بەتبۇرىسپەن, جاڭاشا لەپ, جاڭاشا قۇلشىنىس, ەرىك-جىگەرمەن پرەزيدەنتتىك سايلاۋدا ءبىر كىسىدەي داۋىس بەرسەك, بۇل ءبىزدىڭ جاڭارىپ, قالىپتاسا باستاعانىمىزدىڭ ايعاعى بولماق.
سايلاۋعا ەرەكشە تاڭداۋمەن بارۋ دا ماڭىزعا يە. ءيا, ءبىز پرەزيدەنتتىكتەن ۇمىتكەرلەردىڭ قاي-قايسىسىنا بولسا دا داۋىس بەرۋگە قۇقىلىمىز. بىراق بۇل جەردە تاڭداي ءبىلۋ دەگەن بار. مۇنىڭ ماڭىزى وتە جوعارى. ولاي بولسا, مەن ءوزىم ءبىرىنشى كەزەكتە ادامي ويلاۋ جۇيەسى بەرىك قالىپتاسقان, ءوز وتانىن ەرەكشە سۇيە ءبىلىپ, حالقىنا بارىنشا جانى اشيتىن جانە قامقور بولا بىلەتىن جان-جاقتى قابىلەتتى دە ىسكەر, سونىمەن بىرگە وزگە مەملەكەتتەرمەن دە قالاي سىيلاسىپ, ءبىرىن ءبىرى قۇرمەتتەي بىلۋگە ابدەن جاتتىققان, جۇرەگى تازا دەپ سانايتىن ۇمىتكەرىمە داۋىس بەرەتىن بولامىن.
سونداي-اق بارشا قازاقستان حالقىن دا ءبىر كىسىدەي جۇمىلا ءوز سايلاۋ ۋچاسكەلەرىنە بارىپ, وزدەرى تاڭداعان كانديداتقا داۋىس بەرۋگە شاقىرامىن.
سەرىكباي تۇرجان,
بايدىبەك اۋدانىنىڭ قۇرمەتتى ازاماتى, ەڭبەك ارداگەرى
تۇركىستان وبلىسى