قاراعاندى وبلىسىندا جۇك ۆاگوندارى رەلستەن شىعىپ 1000-عا جۋىق ادام ەۆاكۋاتسيالاندى, دەپ حابارلايدى Egemen.kz توتەنشە جاعدايلار دەپارتامەنتىنىڭ ءباسپاسوز قىزمەتىنە سىلتەمە جاساپ.
«قۇلايعىر جانە قارامۇرىن ستانتسيالارىنان 963 جولاۋشى ەۆاكۋاتسيالاندى», دەلىنگەن حابارلامادا.
ەسكە سالايىق, قاراعاندى وبلىسىنىڭ اباي اۋدانىندا جۇك ۆاگوندارىنىڭ رەلستەن شىعىپ كەتۋىنە بايلانىستى جولاۋشىلار پويىزدارى توقتاعان بولاتىن.
ەۆاكۋاتسياعا جەرگىلىكتى اتقارۋشى ورگاندار مەن توتەنشە جاعدايلار دەپارتامەنتىنىڭ 28 ادامى مەن 17 تەحنيكاسى جۇمىلدىرىلدى.
«قازاقستان تەمىر جولى» ءباسپاسوز قىزمەتى حابارلاعانداي, قاراعاندى وبلىسىنىڭ اكىمدىگىمەن بىرلەسىپ 516 پويىز جولاۋشىسىن قاراعاندى, استانا قالالارىنا اۆتوبۋسپەن جەتكىزۋ ۇيىمداستىرىلعان.