عىلىم جانە جوعارى ءبىلىم مينيسترلىگىنىڭ 2022 جىلعى 2 قاراشاداعى بۇيرىعىمەن «ۇزدىك عىلىمي قىزمەتكەر» جىل سايىنعى سىيلىعىن بەرۋ قاعيداسىنا وزگەرىستەر مەن تولىقتىرۋلار ەنگىزىلدى, دەپ حابارلايدى Egemen.kz.
بۇيرىققا سايكەس, بايقاۋعا قاتىسۋ ءۇشىن قۇجاتتاردى قابىلداۋ مەرزىمى حابارلاندىرۋ جاريالانعان كۇننەن باستاپ 30 كۇننەن 20 كۇنگە دەيىن قىسقارتىلدى.
سونداي-اق قۇجاتتارى مەملەكەتتىك قۇپيالاردى نەمەسە «قىزمەت بابىندا پايدالانۋ ءۇشىن» جانە «قۇپيا» دەگەن بەلگىسى بار تاراتىلۋى شەكتەۋلى قىزمەتتىك اقپاراتتاردى قامتيتىن ۇمىتكەرلەر ولاردى مەملەكەتتىك قۇپيالار تۋرالى زاڭنامادا بەلگىلەنگەن تارتىپپەن ۋاكىلەتتى ورگانعا ۇسىنادى.
سىيلىق بەرۋگە ۇمىتكەردىڭ عىلىمي جەتىستىكتەرىن باعالاۋ مىناداي كورسەتكىشتەردى قامتيدى:
قازاقستان رەسپۋبليكاسىندا تانىلعان عىلىمي دارەجەنىڭ بولۋى;
ۋاكىلەتتى ورگان بەرگەن عىلىمي اتاعىنىڭ بولۋى;
تاڭدالعان عىلىمي باعىت بويىنشا عىلىمي جوبالار مەن باعدارلامالارعا باسشىلىق ەتۋ;
تاڭدالعان عىلىمي باعىت بويىنشا عىلىمي ناتيجەلەر مەن (ماقالالار نەمەسە شولۋلار, وتاندىق جانە شەتەلدىك مونوگرافيالار, مونوگرافياداعى تاراۋ, پاتەنتتەر, ەنگىزۋلەر جانە ت.ب.) ونىڭ ساپالى بولۋى;
تاڭداۋلى عىلىمي باعىت بويىنشا بەدەلدى حالىقارالىق رەتسەنزيالاناتىن جۋرنالداردا جەتەكشى شەتەلدىك عالىمدارمەن بىرلەسكەن اۆتورلىقپەن ماقالالاردىڭ بولۋى;
سوڭعى جىلى ججوكبۇ-دا كەمىندە ءبىر ءپاندى نەمەسە بىرنەشە پاندەردى وقىتۋ;
فيلوسوفيا دوكتورى (PhD) نەمەسە سالا دوكتورى عىلىمي دارەجەسىن العان كادرلاردى دايىنداۋ;
وندىرىسكە ەنگىزۋ ءۇشىن عىلىمي جانە عىلىمي-تەحنيكالىق قىزمەتتىڭ راستالعان ناتيجەلەرى;
عىلىمي زەرتتەۋلەردىڭ ساپاسىن, ناتيجەلىلىگىن جانە اسەرىن ارتتىرۋعا باعىتتالعان قوعامدىق جۇمىس.
سونىمەن قاتار بۇيرىقتا سىيلىق ءبىر ادامعا كەلەسى ون جىل ىشىندە ءبىر رەتتەن ارتىق بەرىلمەيتىنى, سوڭعى ون جىلداعى «جوعارى وقۋ ورنىنىڭ ۇزدىك وقىتۋشىسى» اتاعىنىڭ يەگەرلەرى بۇل كونكۋرسقا قاتىسپايتىنى جازىلعان.
ۇمىتكەرلەر كوميسسيانىڭ شەشىمىنە قازاقستان رەسپۋبليكاسىنىڭ اكىمشىلىك راسىمدىك-پروتسەستىك كودەكسىندە كوزدەلگەن تارتىپپەن شاعىمدانا الادى.
بۇيرىق 2022 جىلعى 26 قاراشادا كۇشىنە ەنەدى.