ۇكىمەت مەملەكەتتىك قارىزداردىڭ ءوسۋىن جانە وعان قىزمەت كورسەتۋ شىعىندارىن تەجەپ وتىرۋدىڭ ماڭىزدىلىعىن ەسكەرۋى قاجەت. بۇل تۋرالى سەناتور باقتىباي شەلپەكوۆ ايتتى, دەپ حابارلايدى Egemen.kz.
«مەملەكەتتىڭ سىرتتان تارتىلاتىن زايمدار مەن نەسيەلەردىڭ ەكونوميكانىڭ وندىرىستىك, كاسىپكەرلىك سەكتورىن ينۆەستيتسيامەن قامتاماسىز ەتۋ ماقساتىندا الىناتىنى بەلگىلى. بۇل شارالار سىرتتان قارىز الۋ كولەمىن ارتتىرۋدى عانا ەمەس, ەكونوميكانىڭ تۇراقتىلىعىن دا ساقتايدى جانە ونى دامىتۋى دا ءتيىس. ول تۋرالى ايتىلعان, «كرەديت پەن زايم تۇرىندە تارتىلعان شەتەلدىك ينۆەستيتسيانى ەكونوميكانىڭ ناقتى سەكتورلارىن دامىتۋ باعىتىندا پايدالانۋ, كەز كەلگەن ەلدە ءوزىنىڭ وندى ناتيجەسىن بەرەدى جانە ەكونوميكالىق دامۋدى قامتاماسىز ەتەدى» دەگەن عىلىمي نەگىزدەر دە بارشىلىق», دەدى سەناتور ءوزىنىڭ بايانداماسىندا.
ونىڭ ايتۋىنشا, سىرتتان كەلگەن قاراجات مەملەكەتتىڭ تۇراقتى ەكونوميكالىق دامۋىن قامتاماسىز ەتە المايتىن بولسا, ول تەك قانا سىرتقى قارىزدىڭ ۇنەمى جوعارى قارقىندا وسە بەرۋىنە جانە بولاشاقتا ونى وتەۋگە بايلانىستى كۇردەلى پروبلەمالاردىڭ تۋىنداۋىنا اكەلىپ سوعادى.
«وسى ورايدا, قارىزداردى تارتۋ تاجىريبەسىن جالعاستىرا وتىرىپ, ۇكىمەت, مەملەكەتتىك قارىزداردىڭ ءوسۋىن جانە وعان قىزمەت كورسەتۋ شىعىندارىن تەجەپ وتىرۋدىڭ ماڭىزدىلىعىن ەسكەرۋى قاجەت», دەدى ب.شەلپەكوۆ.
سويتسە دە, سىرتقى قارىزدىڭ ەلدىڭ ەكونوميكالىق قاۋىپسىزدىگىنە اسەر ەتەتىن باستى قاتەرلەردىڭ قاتارىندا سانالعانىمەن, الەمنىڭ كوپتەگەن دامىعان ەلدەرىنىڭ تاجىريبەسىنە اينالعان قاتىناستار, وعان ءبىر جاقتى قاراۋعا بولمايتىنى دا انىق.
«كەلىسىمدە قارىز قاراجاتى 2,5 پايىز جەڭىلدىكپەن جانە 11, 5 جىل وتەۋ مەرزىمىنە بەرىلەتىنى جانە تارتىلاتىن قارىزعا قىزمەت كورسەتۋ قارجى مينيسترلىگىنە جۇكتەلەتىنى بەلگىلەنگەن. تارتىلاتىن قارىز قاراجاتى بەلگىلەنگەن بيۋدجەت تاپشىلىعى جاعدايىندا وتە ماڭىزدى, قاراجات مەملەكەتتىڭ الەۋمەتتىك جانە باسقا دا باسىم ماقساتتارىنا باعىتتالعان بيۋدجەت شىعىستارىن قولداۋعا مۇمكىندىك بەرەدى», دەپ قوستى سەناتور.
ءسوز سوڭىندا, ول اتالعان زاڭ جوباسىن تولىقتاي قولدايتىنىن, سونداي-اق ارىپتەستەرىن دە قولداۋعا شاقىراتىنىن ايتتى.