قازاقستان رەسپۋبليكاسىنىڭ پرەزيدەنتتىگىنە كانديدات سالتانات تۇرسىنبەكوۆا رەسپۋبليكالىق پسيحيكالىق دەنساۋلىق عىلىمي-پراكتيكالىق ورتالىعىنىڭ پاۆلودار قالاسىنداعى فيليالىندا بولدى.
ورتالىقتا ىشىمدىك پەن ەسىرتكىگە تاۋەلدى ازاماتتار وڭالتۋدان وتەدى. «مەنى وسى ماسەلەنى جاقسى بىلەتىن ادام رەتىندە قابىلداعاندارىڭىزدى قالايمىن. ويتكەنى بۇل ماسەلە جاقىن ادامدارىمنىڭ دا ومىرىندە بولدى. بارشا قازاقستاندىقتاردىڭ باسىندا مۇنداي كەلەڭسىز جاعداي ەشقاشان بولماعانىن قالايمىن. پاۆلودارداعى ورتالىققا وسى سەبەپپەن كەلدىم. ارينە, ءبىزدىڭ ايماقتىق شتاب زاۋىت, اۋرۋحانا سەكىلدى مەكەمەلەردى ۇسىندى. بىراق مەن سىزدەردىڭ ماسەلەلەرىڭىزگە بەيجاي قاراي المايمىن, ەلدەگى ەسىرتكى مەن ىشىمدىكتىڭ تارالۋىنا بايلانىستى احۋالدى وزگەرتكىم كەلەدى», دەدى ول.
س.تۇرسىنبەكوۆا الەمدىك جانە وتاندىق ستاتيستيكانى ەسكە سالدى. «الەمدە پسيحواكتيۆتى زاتتاردى بەلسەندى تۇردە قولداناتىن شامامەن 275 ميلليون ادام بار. ەسىرتكى جىل سايىن 500 مىڭنان استام ادامنىڭ ولىمىنە سەبەپكەر بولادى. 19 ميلليون حالقى بار قازاقستان ءۇشىن ەسىرتكى تۇتىنۋدىڭ از عانا كورسەتكىشى ۇلتتىق قاۋىپسىزدىككە ۇلكەن قاۋىپ توندىرەدى. دەنساۋلىق ساقتاۋ مينيسترلىگىنىڭ مالىمەتىنشە, ەلىمىزدە 18,5 مىڭنان استام ناشاقور تىركەلگەن. ونىڭ ىشىندە 1,5 مىڭ ايەل بار», دەدى كانديدات.