جولاۋشى تاسىمالى جۇيەگە كەلسە

قوعامدىق كولىكتەرگە ارنالعان ارنايى جولاقتار جاسال­عانىمەن, تۇرعىندار ۇزىن-سونار كەپتەلىستە ۇزاق ۋاقىت بويى ايالدامادا تۇرۋعا ءماجبۇر. وسى­نى العا تارتقان پرەزيدەنت: «قا­زىر الماتىدا جولاۋشى تاسى­ما­لىنىڭ نەگىزگى ۇلەسى اۆتوبۋستار مەن تروللەيبۋستارعا تيەسىلى. سونى­مەن قاتار باعدارلىق جەلى جەتكىلىكتى تۇردە ءتيىمدى ۇيىم­داس­تىرىلماعان», دەي وتىرىپ, قالالىق باعدارلاردىڭ كوبى وتە ۇزىن ەكەنىن, قالا جانە قالا ماڭىنداعى قوعامدىق كولىك­تەر ءبىر-بىرىمەن ناشار باي­لا­نىسقانىن, تاسىمالداۋ ءۇشىن ىڭعايلى كولىك توراپتارى جوق ەكەنىن اتاپ كورسەتتى. بۇل جاع­داي­دى تەز ارادا وزگەرتۋ ءۇشىن قوعامدىق كولىكتەردىڭ تار­تىم­دىلىعىن دايەكتى تۇردە ارت­تىرىپ, سونىمەن بىرگە جەكە كولىكتەردى پايدالانۋدى قىس­قارتۋدى ىنتالاندىرۋ كەرەكتىگىن ايتتى. بۇل رەتتە مەتروپوليتەن جەلىسىن كەڭەيتۋدى جالعاستىرا بەرۋ قاجەتتىگىنە توقتالدى. بۇل – الەمدىك تاجىريبەدە بار دۇرىس شەشىم. ويتكەنى تىرشىلىگى قايناپ جاتقان الىپ مەگاپوليستەگى كولىك قوزعالىسىن بىردەن ازايتۋ مۇمكىن ەمەس. سوندىقتان ازاماتتاردى وسى باستاماعا ىنتالاندىرۋ ءۇشىن مەترو بەكەتتەرىنىڭ الەۋەتىن كۇشەيتكەن ابزال. مەترو بەكەتتەرى قالانىڭ كەز كەلگەن نۇكتەسىن ءبىر-بىرىمەن بايلانىس­تىراتىنداي دەڭگەيگە جەتسە, تۇرعىندار كولىكتەن گورى وزدەرى ءۇشىن ءتيىمدى مەترونى تاڭدار ەدى.

پرەزيدەنت مەكتەپتەر مەن با­لاباقشالارعا كولىكپەن كە­دەرگىسىز بارۋ ماسەلەسىنە نازار اۋدارۋ كەرەكتىگىن ايتتى. سەبەبى تاڭەرتەڭ, تۇستە جانە كەشكى ۋاقىتتا قالا جولدارىنداعى كولىك كەپتەلىسىنە اتالعان نىسان­دارعا باراتىندار دا اسەرىن تيگىزىپ وتىر. جول مەن كولىك سالاسىنداعى بۇل پروبلەمانى ەڭسەرىپ, ءتيىمدى شەشىمدەر ازىرلەۋ ىسىنە تۇرعىندار مەن تاۋەلسىز ساراپشىلاردى بەلسەندى تارتۋ قاجەت. پرەزيدەنتتىڭ بۇل يدەيا­سى جۇيەلى جۇزەگە اسار بولسا جولداعى قاۋىپسىزدىك پەن ءومىر ساپاسىندا وڭ ۇردىستەر قالىپتاسار ەدى.

ماۋلەن سىباش,

«كومەك» قايىرىمدىلىق جوباسىنىڭ جەتەكشىسى, ۆولونتەر