قاراعاندى وبلىسىنىڭ ۆەتەرينارلارى ەندى جاياۋ جۇرمەيدى. كاسىبي مەرەكەلەرى قارساڭىندا ولارعا كولىك بەرىلدى. رەسمي ۇيىمداردىڭ دەرەگىنشە, ۆەتەرينارلاردىڭ سوڭعى ون جىلداعى تاقىمدارىنا باسقان تەمىر تۇلپارلارى وسى ەكەن. ءار قاراشانىڭ ءۇشىنشى جەكسەنبىسىندە اتالىپ وتەتىن اۋىل شارۋاشىلىعى, تاماق جانە قايتا وڭدەۋ ونەركاسىبى قىزمەتكەرلەرى كۇنىنە وراي بۇل ءتاۋىر تارتۋ بولدى.
Chevrolet سobalt جانە Chevrolet Nexia كولىكتەرى – «سارىارقااۆتوپروم» وتاندىق ءوندىرۋشىنىڭ ءونىمى. بۇل كولىكتەر وبلىستاعى جەتى اۋدان مەن بالقاش, قاراعاندى قالالارىنىڭ ۆەتستانسالارىنا بۇيىردى. قاراعاندى وبلىسى ۆەتەريناريا باسقارماسىنىڭ باسشىسى قايىربەك تۇرسىنبەكوۆ 2012 جىلدان بەرى كولىكتىڭ جاڭارماعانىن, قولدا بارىنىڭ 17 پايىزى توزعانىن مالىمدەدى.
– قىزمەتتىك اۆتوكولىك 2012 جىلدان بەرى جاڭارتىلمادى. ماشينالاردىڭ 17 پايىزعا جۋىعى جارامسىز. جاڭا كولىك جەدەل ارەكەت ەتۋ ءۇشىن اسا قاجەت. كولىك بارلىق ستانساعا بەرىلدى. اۋرۋ تاراعان, نە مال قىرىلعاندا شۇعىل تۇردە زەرتحاناعا ساراپتاماعا تالداۋ اپارۋ قاجەتتىگى تۋىنداپ, وندايدا كولىكتەر جولدا بۇزىلعان جاعدايلار دا بولدى. ال سىناماعا الىنعان ساراپتامالىق ماتەريال تەك 4-5 ساعاتقا عانا جارامدى. سوندىقتان كولىك تە جۇمىستىڭ ساپالى ورىندالۋىنا اسەر ەتەدى, – دەيدى ق.تۇرسىنبەكوۆ.
بۇگىنگى تاڭدا ايماقتاعى 672 قىزمەتكەردىڭ جالاقىسى 50 پايىزعا وسكەن. ۆەتەرينارلاردى قولداۋ ءۇشىن وبلىستىق بيۋدجەتتەن قاراجات تا بولىنگەنىن اتادى ءوڭىر باسشىلىعى.
– ءبىزدىڭ جۇمىستى كولىكسىز ەلەستەتۋ استە مۇمكىن ەمەس. اۋداننىڭ اۋماعى ۇلكەن. وساكاروۆكانىڭ ءبىر شەتىنە 120-150 شاقىرىم, ەكىنشى ءبىر شەتىنە 100 شاقىرىم جول جۇرۋگە تۋرا كەلەدى. الدىن الۋ, دياگنوستيكا شارالارىن ىسكە اسىرعاندا كولىكتىڭ قاجەتتىلىگى قاتتى سەزىلەدى. ال مىنا جاڭا كولىكتەر بىزگە قىزمەتتىك مىندەتىمىزدى ساپالى جانە ۋاقتىلى ورىنداۋعا مۇمكىندىك بەرەدى, – دەيدى وساكاروۆ اۋدانىنىڭ باس ۆەتەرينارى يۋري سەرگەەۆ.
قاراعاندى وبلىسى