قازاقستان رەسپۋبليكاسى پرەزيدەنتتىگىنە كانديدات سالتانات تۇرسىنبەكوۆا وسكەمەن قالاسىنىڭ تۇرعىندارىمەن كەزدەسۋ كەزىندە ايماقتاعى كۇن تارتىبىنەن تۇسپەي كەلە جاتقان وزەكتى ماسەلەنىڭ ءبىرى – اۋانىڭ لاستانۋىنا قاتىستى ويىن اشىق ءبىلدىردى.
س.تۇرسىنبەكوۆانىڭ ايتۋىنشا, شىعىس قازاقستان وبلىسىندا ورنالاسقان وسكەمەن, ريددەر جانە زىريان قالالارى اۋانىڭ لاستانۋى بويىنشا الدىڭعى قاتاردا تۇر.
ەكولوگتەر شىعىس قازاقستان وبلىسىنىڭ وزەندەرىن جوعارى جانە ورتاشا لاستانۋ دەڭگەيى بار سۋ اعىندارى قاتارىنا جاتقىزاتىنىن اتاپ ءوتتى. سۋ ساپاسىنىڭ بۇزىلۋىنا اۋىر مەتالدار قاتتى اسەر ەتەدى. شەنەۋنىكتەر مۇنداي پروبلەمالاردىڭ بار ەكەنىن مويىندايدى, بىراق جاعدايدى جويۋعا قاراجات جەتكىلىكسىز ەكەنىن ايتادى.
«ەلىمىزدىڭ شىعىسى – سەمەي يادرولىق سىناق پوليگونى تراگەدياسىنىڭ «ماڭگىلىك مۇراگەرى», ونىڭ زارداپتارى ءالى كۇنگە دەيىن حالقىمىزدى الاڭداتىپ كەلەدى. ءارتۇرلى مالىمەتتەر بويىنشا, قازاقستاندا 1,5 ميلليوننان استام ادام سىناقتاردان زارداپ شەككەن, 300 مىڭ شارشى شاقىرىم جەر لاستانعان. بۇل – وراسان زور كورسەتكىش. جەرگىلىكتى تۇرعىندار مەن تۋريستەر كەيدە وسى اۋماقتا ورنالاسقان كولدەردە شومىلادى, اتوم كولىنىڭ بالىعىن تۇتىنادى», دەدى كانديدات.