بۇگىن ۇقك شەكارا قىزمەتى الماتى وبلىسى بويىنشا دەپارتامەنتىنىڭ ساپىنا الىنعان «كۇز-2022» شاقىرىلىمىنىڭ ساربازدارى وتان الدىندا انت قابىلدادى. اتالعان دەپارتامەنتتىڭ رايىمبەك اۋدانى بويىنشا شەكارا باسقارماسىندا وتكەن راسىمگە 500-گە تارتا سارباز بەن ولاردىڭ الىستان ات ارىلتىپ جەتكەن اتا-انا, تۋعان-تۋىستارى مەن دوستارى قاتىستى.
جىلداعى داستۇرگە ساي, بيىلعى راسىمگە دە ساربازدار ۇلكەن دايىندىقپەن كەلدى. بۇل رەتتە ەر ازاماتتاردىڭ ومىرىندە ءبىر-اق رەت بولاتىن ماڭىزدى وقيعا – وتانىنا ادال قىزمەت ەتۋگە انت بەرەتىن ءسات تۋدى.
وسى جىلدىڭ كۇزىندە اسكەر ساپىنا شاقىرىلعان ساربازداردىڭ اراسىندا اسكەردەن كەيىن شەكارا قىزمەتىندە قالىپ, اسكەري قىزمەتىن كەلىسىمشارت نەگىزىندە جالعاستىرعىسى كەلەتىندەر از ەمەس. انت قابىلداۋشىلاردىڭ اراسىنان ۇقك شەكارا اكادەمياسىنا وقۋعا ءتۇسىپ, بولاشاقتارىن ەل شەبىمەن بايلانىستىرعىسى كەلەتىن ساربازدار دا بار.
انت قابىلداۋ ءراسىمى ۇقك شەكارا قىزمەتى الماتى وبلىسى بويىنشا دەپارتامەنتىنىڭ باستىعى پولكوۆنيك الىبەك كايۋپوۆتىڭ بۇيرىعىمەن اشىلدى.
ايتۋلى شاراعا اتا-انالارمەن بىرگە شەكارا قىزمەتىنىڭ ارداگەرلەرى دە قاتىسىپ, جاس ساربازداردىڭ الداعى قىزمەتتەرىنە ساتتىلىك تىلەدى. شەكارانىڭ شەتىنە جاۋدىڭ تابانىن تيگىزبەۋ ءۇشىن «كۇن وتىرماعان, ءتۇن ۇيىقتاماعان» تونىكوك باستاعان باتىر بابالارىمىزدىڭ ءىزباسارلارى – شەكاراشىلار ەكەنىن ايتا كەلىپ, «وتان قورعاۋشى» دەگەن قاستەرلى ماماندىققا سىزات تۇسىرمەۋگە شاقىردى.
ماڭىزدى شارانىڭ سوڭىندا شەكارا باسقارماسىنىڭ ارناۋلى ماقساتتاعى ۇتقىر ءىس-قيمىلدار توبىنىڭ سايىپقىراندارى قالىڭ جۇرتشىلىقتىڭ نازارىنا شەكارا بۇزۋشىلاردى قۇرىقتاۋ وپەراتسياسىنان ساحنالىق كورسەتىلىم ۇسىندى. سونداي-اق سايدىڭ تاسىنداي ىرىكتەلگەن اسكەري قىزمەتشىلەر قويان-قولتىق ۇرىستان تاماشا ونەر كورسەتتى.
تامارا داۋلەتباەۆا,
ۇقك شەكارا قىزمەتىنىڭ زاپاستاعى پودپولكوۆنيگى