قوستانايداعى «اگروماشحولدينگ KZ» زاۋىتى بيىل 900-دەن استام «Essil» كومباينى مەن «Lovol» تراكتورلارىن قۇراستىرىپ شىعاردى. سوڭعى جىلدارى وتاندىق ءوندىرىستىڭ جەرگىلىكتى ۇلەسىن ارتتىرۋعا دەن قويىپ وتىرعان ءىرى كاسىپورىندا تاياۋدا اۋىلشارۋاشىلىق تەحنيكالارى كابينالارىن دانەكەرلەپ شىعاراتىن تاعى ءبىر جەلى ىسكە قوسىلدى.
زاۋىت باسشىلارىنىڭ ايتۋىنشا, دانەكەرلەۋ تسەحى ازىرشە «Lovol» تراكتورلارىنىڭ كابينالارىن جاساپ شىعارادى.
– ءبىز بۇل جوبانى جۇزەگە اسىرۋ ءۇشىن بىلتىر قىس بويى دايىندىق جۇرگىزدىك. ءوندىرىس الاڭىن دايىنداپ, ونى قاجەتتى قۇرىلعىلارمەن جابدىقتاۋدىڭ وزىنە كوپ ۋاقىت شىعىندادىق. ونىڭ سىرتىندا, جاڭا جەلىدە جۇمىس ىستەيتىن مامانداردى شەتەلگە وقۋعا جىبەرىپ, كاسىبي بىلىكتىلىگىن ارتتىرۋ, تاجىريبە ۇشتاۋ كۋرستارىن ۇيىمداستىردىق. ناتيجەسىندە, قازىر دانەكەرلەۋ تسەحى توقتاۋسىز جۇمىس ىستەپ تۇر. تاۋلىگىنە 10 كابينا شىعارادى, – دەيدى كاسىپورىننىڭ تەحنيكالىق دامۋ جونىندەگى ديرەكتورى ۆلاديمير ۆولوۆودەنكو.
«اگروماشحولدينگ KZ» اق اۋماعىنداعى اۋىلشارۋاشىلىق تەحنيكالارى ءوندىرىسىنىڭ وتاندىق ۇلەسىن ارتتىرۋعا باعىتتالعان لوكاليزاتسيالىق ورتالىقتا مەتالدى لازەرمەن كەسۋ, يۋ, مايىستىرۋ, سىرلاۋ جانە دانەكەرلەۋ ورىندارى مەن كابينالاردىڭ پلاستيك بولشەكتەرىن, ءدان سەبەتىن تەحنيكالار مەن ولارعا قاجەت قوسالقى بولشەكتەردى جاسايتىن, سونداي-اق توراپتار مەن تەرموشۋ وقشاۋلاعىشتاردى شىعاراتىن قۇراستىرۋ كونۆەيەرلەرى مەن اۆتوماتتاندىرىلعان جەلىلەر ورناتىلعان. زاۋىت بۇل قۇرىلعىلاردىڭ ءبارىن «ونەركاسىپتى دامىتۋ قورى» اق-نىڭ قارجىلاي قولداۋىمەن ساتىپ الىپ وتىر. لوكاليزاتسيالىق ورتالىقتىڭ الداعى ماقساتى – اۋىلشارۋاشىلىق تەحنيكالارىنا ارنالعان قوسالقى بولشەكتەر ءوندىرىسىن ۇلعايتىپ, «كيروۆەتس», «Essil», «Lovol», «Pottinger» برەندتەرىنە قاجەت بولشەكتەردى شىعارۋعا كوشۋ.
لوكاليزاتسيالىق ورتالىقتىڭ كەڭسە عيماراتتارى, زاماناۋي قۇرىلعىلارمەن جابدىقتالعان امبەباپ تسەحتارى, سونىمەن قاتار ارنايى وقۋ ورتالىعى, 100 ورىندىق جايلى جاتاقحاناسى بار. زاۋىت باسشىلارىنىڭ ايتۋىنشا, مۇنىڭ ءبارى جۇمىسشىلارعا قولايلى جاعداي تۋعىزىپ, وتاندىق ءوندىرىستى جاڭا دەڭگەيگە كوتەرۋگە مۇمكىندىك بەرەدى.
لوكاليزاتسيالىق ورتالىق, بىرىنشىدەن, تۇتىنۋشىلاردىڭ ارزان ءارى جوعارى ساپالى ءونىمدى ساتىپ الۋىنا مۇمكىندىك بەرەدى, ەكىنشىدەن, كاسىپورىن جۇمىسشىلارىنىڭ قولايلى جاعدايدا ەڭبەك ەتۋىنە قول جەتكىزەدى. ماماندار كەشەندى جوبا الداعى ۋاقىتتا يمپورت كولەمىنىڭ ەداۋىر كەمي تۇسۋىنە ىقپال ەتە باستايدى دەگەن پىكىردە.
لوكاليزاتسيالىق ورتالىقتاعى وندىرىستىك جوبالار قازىردىڭ وزىندە Pöttinger, Deutz-Fahr, PKF Luidor سەكىلدى الەمگە تانىمال كومپانيالارمەن جانە قوستاناي تراكتور زاۋىتىمەن بىرلەسە وتىرىپ جۇزەگە اسىرىلۋدا. بىرلەسكەن جوبا جەرگىلىكتى ءونىم سانالاتىن «Lovol تراكتورلارى» مەن «Essil» كومبايندارىنىڭ وتاندىق ۇلەسىن ارتتىرۋعا مۇمكىندىك بەرىپ وتىر.
– ەشقاشان تەك ءىرى توراپتى قۇراستىرۋمەن عانا اينالىسامىز دەگەن ماقسات قويعان ەمەسپىز. وسىعان وراي, ءبىز بىرىنشىدەن, ءوندىرىس اۋقىمىن كەڭەيتۋ كەرەكتىگىن, ەكىنشىدەن, لوكاليزاتسيانى تەرەڭدەتۋ قاجەتتىگىن تۇسىندىك. لوكاليزاتسيالىق ورتالىقتىڭ اشىلۋى ءبىزدىڭ كاسىپورىننىڭ قىزمەت كورسەتۋ اياسىن بىرنەشە ەسە كەڭەيتەدى. ءبىز جاڭا جوبا جاساۋ ارقىلى اۋىلشارۋاشىلىق تەحنيكاسىنىڭ وتاندىق ءوندىرىسىن تۇبەگەيلى وزگەرتەتىن جارقىن كەلەشەككە قادام باستىق, – دەيدى «اگروماشحولدينگ KZ» اق پرەزيدەنتى دينارا شۋكيجانوۆا.
زاۋىتتىڭ كوممەرتسيالىق ديرەكتورى نيكولاي پارحومەنكونىڭ ايتۋىنشا, جەرگىلىكتى اۋىلشارۋاشىلىق تاۋارلارىن وندىرۋشىلەر تاراپىنان وتاندىق تەحنيكاعا دەگەن سۇرانىس جىل ساناپ ارتىپ كەلەدى.
– سۇرانىستىڭ جوعارى بولۋىنىڭ باستى سەبەبى – ءبىز ءوزىمىز شىعارىپ جاتقان تراكتور-كومباينداردىڭ تەحنيكالىق مۇمكىندىكتەرىن جەتىلدىرىپ, مودەرنيزاتسيالاۋعا باسا كوڭىل بولە باستادىق. بۇگىندە ءبىزدىڭ ونىمدەر ساپاسى جاعىنان شەتەلدىك تەحنيكالارعا باسەكە بولا الاتىن جاعدايعا جەتىپ قالدى. مۇنىڭ سىرتىندا, قوستانايلىق تەحنيكا مەن وسىندا ءوندىرىلىپ جاتقان قوسالقى بولشەكتەر يمپورتتى تەحنيكا مەن شەتەلدەن كەلەتىن قوسالقى بولشەكتەرگە قاراعاندا 2-2,5 ەسە ارزان, – دەدى ن.پارحومەنكو.
نارىقتا جوعارى سۇرانىسقا يە «Essil» كومباينى مەن «Lovol» تراكتورلارىن بىلاي قويعاندا, بۇگىندە شارۋاشىلىقتاردىڭ كوبى قوستاناي زاۋىتىنان ەندى عانا شىعا باستاعان «Deutz-Fahr» ماركالى جاڭا تراكتورلار مەن كومبايندارعا قىزىعۋشىلىق تانىتىپ وتىر. بىلتىردان بەرى «اگروماشحولدينگ KZ» اق مەن «SDF Group» كومپانياسى بىرلەسىپ ىسكە اسىرا باستاعان ىلكىمدى جوبانىڭ اياسىندا بيىل اۋىلشارۋاشىلىق تەحنيكالارىن قۇراستىراتىن قوستاناي زاۋىتى 68 «Deutz-Fahr» تراكتورى مەن وسى ساۋدا بەلگىسىندەگى 14 كومباين جاساپ شىعارعان.
قوستاناي وبلىسى