مەملەكەت باسشىسى «جاڭا ادامدار» جاستار قوزعالىسىن قۇرۋ تۋرالى باستامانى قۇپتاپ, بەلسەندى جاس قازاقستاندىقتارعا ءاردايىم قولداۋ كورسەتەتەتىن ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قاسىم-جومارت توقاەۆ مەملەكەتتى تۇبەگەيلى جاڭعىرتۋ جۇمىستارى جۇرگىزىلىپ, ادىلەتتى قازاقستاندى قۇرۋ جونىندەگى رەفورمالار جۇزەگە اسىرىلىپ جاتقانىن ايتتى.
– قازاقستان ازاماتتارىنىڭ, اسىرەسە جاستاردىڭ ەڭبەكقورلىق قاعيداتىن ۇستانۋى ماڭىزدى. سىرتتان كومەك كۇتۋدىڭ قاجەتى جوق. قازىر زامان باسقا, ياعني ماڭىزدى شەشىمدەردىڭ ۋاقىتى, سەرپىلىس جاسايتىن ءسات. جاستار بولماسا, مۇنىمەن كىم اينالىسادى؟ قازىر يلون ماسكتىڭ تاجىريبەسى مەن ومىرلىك ۇستانىمىن ۇلگى ەتۋ ۇردىسكە اينالدى. ءيا, ول وتباسىمەن بىرگە شالعاي پروۆينتسيادان امەريكا قۇراما شتاتتارىنا كەلدى. ءوزىنىڭ كرەاتيۆتىلىگىنىڭ, باتىلدىعىنىڭ, وزىنە ءتان ەرەكشەلىگىنىڭ ارقاسىندا «يلون ماسك فەنومەنىن» قالىپتاستىرا الدى. مۇنداي مىسالدار وتە كوپ. جاقىندا مەن نيۋ-يوركتە امەريكانىڭ جوعارى وقۋ ورىندارىن ءبىتىرىپ, امەريكالىق كومپانيالارعا جۇمىسقا ورنالاسقان جاستارىمىزبەن كەزدەستىم. مەن ولارعا: ء«بىز سىزدەردى قازاقستان ازاماتتارى دەپ بىلەمىز. سىزدەر – قازاقسىزدار. نيۋ-يورك نەمەسە ەۋروپا ەلدەرى بولسىن, الەمنىڭ دامۋشى ەلدەرى بولسىن, قاي جەردە جۇمىس ىستەسەڭىز دە, قازاق بولىپ قالاسىزدار» دەپ ايتتىم, – دەدى مەملەكەت باسشىسى.
پرەزيدەنت جاستار وكىلدەرىن تولەرانتتى, دامىعان قوعامدى بىرگە قۇرۋعا شاقىردى. مەملەكەت باسشىسىنىڭ پىكىرىنشە, جاستار ءوزىن-ءوزى ۇدايى جەتىلدىرىپ, جان-جاقتى دامىتىپ, ءتىل ۇيرەنۋى قاجەت.
مەملەكەت باسشىسى جاۋاپكەرشىلىك ماسەلەسىن دە قوزعادى. پرەزيدەنتتىڭ ايتۋىنشا, تەك جاۋاپكەرشىلىگى بار ازاماتتار عانا ءوزىنىڭ مەملەكەتى ءۇشىن مىندەتتەمە الا الادى.
– اباي كەزىندە «تولىق ادام» دەگەن تەرەڭ ۇعىمدى ەنگىزدى. اباي زامانىنان وزا تۋدى. ول «تولىق ادام» تۋرالى ءبىلىم, تۇسىنىك, قوعامنىڭ قاجەتتىلىگى تۇرعىسىنان ايتتى. قازىر اعىلشىنشا ايتىلىپ جۇرگەن «a person of integrity», ياعني بارلىق قارىم-قابىلەتى مەن ءبىلىمى توعىسقان ادام دەگەنىمىز وسى. سوندىقتان ءبىز ءبارىمىز «تولىق ادام», جاۋاپتى ازامات بولۋعا تىرىسۋىمىز كەرەك. شىن مانىندە, ءبىز قوعامىمىزدا ءتارتىپ پەن زاڭ ۇستەمدىگى كۋلتىن ورناتۋعا ۇمتىلۋىمىز كەرەك. مەنىڭ مىندەتىم – ەلىمىزدىڭ زاڭدارى ءادىل بولعانىن, ادامداردىڭ ول زاڭدارعا سەنۋىن قامتاماسىز ەتۋ. وسى زاڭ اياسىندا قوعامىمىزدا ءتارتىپ بولۋىن تالاپ ەتەمىز, – دەپ مالىمدەدى پرەزيدەنت.
قاسىم-جومارت توقاەۆتىڭ پىكىرىنشە, جاستار ەلىمىزدىڭ قوعامدىق ومىرىنە بەلسەندى تۇردە ارالاسىپ, ءوز ۇستانىمىنا بەرىك بولىپ, ءتۇرلى يدەيالار ۇسىنىپ, ولاردى ىسكە اسىرۋعا اتسالىسقانى ءجون.
– بەلسەندى ازاماتتىق ارەكەت ارقىلى سىزدەر, بىرىنشىدەن, مەملەكەتكە پايدا اكەلەسىزدەر, ەكىنشىدەن, وزدەرىڭىزدى تانىتا الاسىزدار. قالاي بولعاندا دا, ءبىز ماماندار ىرىكتەلەتىن, سايكەسىنشە ۋاقىت وتە كەلە مەملەكەتتى باسقارۋ جاۋاپكەرشىلىگىن ارقالاي الاتىن وتە قابىلەتتى ادامدار شىعاتىن اشىق قوعامعا قاراي قادام باسىپ كەلەمىز. سىزدەردىڭ ارالارىڭىزدا كەلەشەكتە دەپۋتات نەمەسە مينيستر بولاتىن, ءتىپتى مەملەكەتىمىزدىڭ پرەزيدەنتى بولاتىن ازاماتتار وتىر دەپ ويلايمىن, – دەدى مەملەكەت باسشىسى.
پرەزيدەنت ءسوز سوڭىندا «جاڭا ادامدار» جاستار ۇيىمىنا تابىس تىلەدى.
– ءبىزدىڭ كورنەكتى اقىنىمىز ماعجان جۇماباەۆتىڭ «مەن جاستارعا سەنەمىن» دەگەن ءسوزى بار. شىن مانىندە, مەن دە جاستارعا سەنەمىن. بارشاڭىزدى قولدايمىن. راسىندا, ءبىزدىڭ ەلىمىزگە سىزدەر سياقتى بەلسەندى, ءبىلىمدى, كوزى اشىق, كوكىرەگى وياۋ جاستار كەرەك. ەلىمىزدىڭ بولاشاعى جاستاردىڭ قولىندا, – دەدى قاسىم-جومارت توقاەۆ.
سونىمەن قاتار شارادا قوزعالىس جەتەكشىلەرى مەن بەلسەندىلەرى اسەل بادەنوۆا, ەلدانا كادەنوۆا, ريزابەك راشيت, كۇننۇر بولاتبەك جانە ديلناز قاپەزوۆا ءسوز سويلەدى.