قازاقستان رەسپۋبليكاسى پرەزيدەنتتىگىنە كانديدات مەيرام قاجىكەن شەتەلدىك ينۆەستورلارمەن جانە ءىرى كاسىپورىنداردىڭ جەكە يەلەرىمەن جاسالعان بارلىق شارتتىڭ اشىق بولۋىن تالاپ ەتىپ وتىر.
تەمىرتاۋعا ساپارى بارىسىندا ول «ارسەلور ميتتال», جەكە قۇرىلىس, كوممۋنالدىق, كۇزەت كومپانيالارىنىڭ قىزمەتكەرلەرىمەن, سونداي-اق سالالىق كاسىپوداقتاردىڭ وكىلدەرىمەن كەزدەستى.
م.قاجىكەن مەنشىكتى اتاپ ايتقاندا, جەكە شەتەلدىك ازاماتتارعا تيەسىلى كاسىپورىنداردى ۇلتتاندىرۋ تۋرالى زاڭ جوباسىن ازىرلەۋ جونىندە ايتتى. قازىرگى ۋاقىتتا كومپانيالاردىڭ, ونەركاسىپتىك كاسىپورىنداردىڭ جەكەلەگەن يەلەرىنىڭ وزدەرىنىڭ شارتتىق مىندەتتەمەلەرىن ورىنداماۋى وزەكتى ماسەلەگە اينالىپ وتىر.
«ينۆەستور نەمەسە كومپانيا يەسى ءوز مىندەتتەمەلەرىنە نازار اۋدارمايدى, ءوندىرىستى دامىتۋعا ينۆەستيتسيا سالمايدى. كوز الدىندا كاسىپورىن توزادى. كومپانيانى ۇلتتاندىرۋ كەشە-بۇگىن عانا كوتەرىلىپ وتىرعان ماسەلە ەمەس. بىراق بۇل ماسەلە قاراپايىم دا ەمەس. ۇلتتاندىرۋ تۋرالى زاڭ قابىلداۋ كەرەك. سەبەبى بۇل ماسەلە قازاقستانداعى كوپتەگەن كومپانياعا قاتىستى. ينۆەستورلار كومپانيالاردان بارلىق قاجەتتىنى سىعىپ الادى. بىراق بۇلاي جالعاستىرا بەرۋگە بولمايدى. ولاردىڭ ينۆەستيتسيالار, جۇمىس ورىندارىن قۇرۋ جونىندەگى مىندەتتەمەلەرىن قايتا قاراۋ قاجەت», دەدى م.قاجىكەن.