الدىمىزدا تۇرعان كەزەكتەن تىس پرەزيدەنتتىك سايلاۋ – مەملەكەت تاعدىرىنا تىكەلەي اسەر ەتەتىن ماڭىزدى وقيعا. ساناۋلى كۇننەن كەيىن سالتانات قۇراتىن ساياسي ناۋقانعا قاتىستى سايلاۋشىلاردىڭ ەڭ كوپ بولىگىن قۇرايتىن الماتى جۇرتشىلىعى ءۇشىن قانداي ماڭىزدى جاڭالىقتار بار؟ مەگاپوليستىڭ سايلاۋعا دايىندىق پروتسەسىن پىسىقتاعان اۋماقتىق سايلاۋ كوميسسياسىنىڭ توراعاسى جاننا اسانوۆا تىلشىلەر ساۋالىنا جاۋاپ بەردى.
الماتى قالاسىندا 4 قاراشادان بەرى 531 سايلاۋ ۋچاسكەسى اشىلعان. سايلاۋ ۋچاسكەلەرىنىڭ مەكەنجايلارى كورسەتىلگەن تولىق ءتىزىم «ۆەچەرني الماتى» جانە «الماتى اقشامى» گازەتتەرىنىڭ باسپا نۇسقالارىندا, ولاردىڭ سايتتارىندا, سونداي-اق الماتى قالاسى اكىمدىگىنىڭ سايتىندا جاريالانعان. سونىمەن قاتار قالا تۇرعىندارى مەن قوناقتارى ءوز سايلاۋ ۋچاسكەسىن تەكسەرۋى ءۇشىن «1315» بىرىڭعاي ءنومىر قۇرىلعان. بارلىق ۇيالى بايلانىس وپەراتورلارىنىڭ ابونەنتتەرى ءۇشىن قوڭىراۋ شالۋ تەگىن. Call-ورتالىقتار دەمالىس كۇندەرىن قوسقاندا كۇن سايىن 8.00-دەن 20.00-گە دەيىن ۇزدىكسىز جۇمىس ىستەيدى.
جاننا اسانوۆا الماتىلىقتاردىڭ سايلاۋ ۋچاسكەلەرىنە 2گيس جانە Yandex Maps كارتاسى قوسىمشالارىنىڭ كومەگىمەن بارا الاتىنىن, داۋىس بەرۋ ورىندارى كارتادا بەلگىلەنەتىنىن اتاپ ءوتتى.
– قالا اكىمدىگىنىڭ «Open Almaty» قوعامدىق قابىلداۋ سايتىندا جانە ءبىلىم باسقارماسىنىڭ مەملەكەتتىك قىزمەتتەر پورتالىندا سايلاۋشىلار تىزىمدەرىنەن ءوزىڭىزدى تەكسەرۋگە مۇمكىندىك بەرەتىن سەرۆيس قولجەتىمدى. سايلاۋشىلار ءتىزىمى تۇراقتى تىركەۋ قاعيداسى بويىنشا جاسالعان. قازىرگى مالىمەت بويىنشا الماتى قالاسىنداعى سايلاۋشىلار سانى 1 ميلليون 170 مىڭنان استى. سايلاۋ ۋچاسكەلەرىنە بارلىعى 11 مىڭنان استام ەسەپتەن شىعارۋ كۋالىكتەرى تاپسىرىلدى, – دەيدى ج.اسانوۆا.
ج.اسانوۆانىڭ ايتۋىنشا, بارلىق سايلاۋ ۋچاسكەسى سايلاۋ جاشىكتەرىمەن, مەملەكەتتىك رامىزدەرمەن جابدىقتالعان. ۋچاسكەلىك كوميسسيالار دا كانديداتتار تۋرالى اقپاراتتىق ماتەريالدارمەن, سونداي-اق سايلاۋشىلاردى قىزىقتىراتىن ادىستەمەلىك قۇرالدارمەن تولىقتاي قامتاماسىز ەتىلگەن. بۇل رەتتە كانديداتتار تۋرالى اقپاراتتىق ماتەريالداردى ۇگىت ماتەريالدارىمەن شاتاستىرىپ الماعان ءجون. بارلىق سايلاۋ ۋچاسكەسىندە ۇمىتكەرلەر تۋرالى اقپارات بىرىڭعاي فورماتتا ۇسىنىلعان.
اۋماقتىق سايلاۋ كوميسسياسىنىڭ جەتەكشىسى زاعيپ سايلاۋشىلار ءۇشىن ارنايى ترافارەتتەردىڭ دايىندالاتىنىن ايتتى. سونداي-اق ول ەرەكشە قاجەتتىلىكتەرى بار ادامدارعا ارنالعان بەينەروليكتەر, اقپاراتتىق ماتەريالدارى بار اۋديوجازبالار ازىرلەنىپ, مۇگەدەكتەر ارباسىنا ارنالعان كەڭەيتىلگەن ورىندار دايىندالاتىنىن جەتكىزدى.
الماتى