جەمقورلىقتىڭ جولىن كەستى

دەپارتامەنت ماماندارى جىل باسىنان بەرى كولىكتىك باقىلاۋ ينسپەكتسياسى, «توبىل» اكك قىزمەتى, كوشى-قون, تكش جانە وزگە دە ماڭىزدى سالالارداعى سىبايلاس جەمقورلىق تاۋەكەلدەرىن انىقتاۋ ماقساتىندا 4 رەت سىرت­قى تالداۋ, 11 مونيتورينگ شاراسىن وتكىزگەن. ناتيجەسىندە, جەر­گىلىكتى مەملەكەتتىك ورگاندار مەن ۇيىمدارعا نورماتيۆتىك-قۇ­قىق­تىق اكتىلەردى وزگەرتۋ تۋرالى 123 ۇسىنىس ەنگىزىلدى.

انتيكور قىزمەتى وسى جىل­دىڭ ەكىنشى جارتىسىنان باس­تاپ الدىن الا ازىرلەنگەن سى­بايلاس جەمقورلىق تاۋە­كەل­دەرىنىڭ كارتاسى بويىنشا وڭىر­دەگى اۆتوجولداردىڭ ساپاسىن, اۋىز سۋعا قول جەتكىزۋ, مونو­پو­ليستەردىڭ تاريفتەرى مەن الىم­­دارى سياقتى ماسەلەلەردى زەر­دەلەپ شىقتى. بۇل باعىتتا اتقا­رىلعان جۇمىستاردىڭ ناتي­جە­سىندە اۆتوجولداردى جوندەۋ كەزىندە مەردىگەرلەرگە زاڭسىز كومەك كورسەتۋ, ساپاسىز جولداردى قابىلداۋ فاكتىلەرى, سون­داي-اق, وسى سالاعا قاتىستى قول­دانىستاعى زاڭنامادا بىر­قا­تار ولقىلىق بار ەكەنى انىق­تا­لىپ وتىر.

– سالىنىپ جاتقان جولداردى تەكسەرۋ بارىسىندا ءبىز­دىڭ قىزمەتكەرلەر جەرگىلىكتى اكىم­­دىكتەردىڭ ساپاسىز جول ۋچاس­كەلەرىن قابىلداۋىنا جول بەر­مەي قالعان جاعدايلار ءجيى كەزدەسەدى. وسىنىڭ ناتيجەسىندە, 169,5 ملن تەڭگە مەملەكەت قار­جى­سىن بوس شىعىنداۋدىڭ الدىن الدىق. حالىقتى اۋىز سۋمەن قامتاماسىز ەتۋگە قاتىستى ماسەلەلەر دە از ەمەس. بۇل سالادا بيۋدجەت قاراجاتىنىڭ ۇتىمسىز جۇمسالۋى, بىركەلكى بولىن­بەۋى, مەردىگەرلەردىڭ وزدە­رىنە سەنىپ تاپسىرىلعان جۇ­مىس­تى ۋاقتىلى ورىنداي الماۋى نەمەسە ساپاسىز ورىنداۋى ورىن العانى انىقتالدى. سىبايلاس جەمقورلىققا قارسى قىزمەت وكىلدەرىنىڭ ارالاسۋىمەن جەكەلەگەن سۋمەن جابدىقتاۋ نىساندارىندا توقتاپ قالعان جۇمىستار قايتا جاندانىپ, ون­دا­عى كەمشىلىكتەردى جويۋ بو­يىن­شا شارالار قابىلداندى. ولار­عا نەگىزسىز تولەنگەن 26 ملن تەڭگە مەملەكەتكە قايتا­رىل­دى. سۋ قۇبىرلارىن سالۋ جوس­پار­لارى قايتا پىسىق­تالدى, – دەدى وبلىستىق سىباي­لاس جەمقورلىققا قارسى ءىس-قي­مىل دەپار­تامەنتىنىڭ باسشىسى باۋىرجان ۇزىنجاس.

جەمقورلىققا قارسى قىزمەت قتج كومپانيالارىنىڭ جۇك ۆاگوندارى قىزمەتىن ۇسىنۋ تار­تىبىنە دە تالداۋ جاساعان. ويت­كەنى بۇعان دەيىن كاسىپكەرلەر اتال­عان سالاعا قاتىستى بىرنە­شە رەت شاعىم ءتۇسىرىپتى. جەدەل كەڭەستە كاسىپكەرلەردەن ۆاگونداردى كەزەكتەن تىس بەرگەنى ءۇشىن اقشا العان قتج فيليالى – «قازتەمىرترانس» اق-نىڭ باسشىسى ب.ۋسابەكوۆكە قاتىستى قىلمىستىق ءىس تۋرالى اڭگىمە بولدى. سوت ب.ۋسابەكوۆتى 6 جىل مەرزىمگە باس بوستاندىعىنان ايىرۋ تۋرالى ۇكىم شىعارعان. انتيكور قىزمەتكەرلەرى مۇنداي قىلمىستىڭ العىشارتتارىن زەردەلەي كەلىپ, تەمىر جول سالاسىندا ون شاقتى سىبايلاس جەمقورلىق تاۋەكەلدەرىنىڭ ورىن العانىنا كوز جەتكىزىپ, ۆاگونداردى ءبولۋ كەزىندە كاسىپكەرلەرگە توسقاۋىل كەلتىرەتىن جاساندى كەدەرگىلەردى انىقتاعان.

وسىلايشا, انىقتالعان جەم­قورلىق تاۋەكەلدەرى تۋرالى دەرەك «قازاقستان تەمىر جولى «ۇك» اق باسشىلىعىنا جەتكىزىلەدى. بۇگىندە اكتسيونەرلىك قوعام باس­شىلىعى قۇرامىنا قتج ماماندارى مەن قوعام بەلسەندىلەرى ەنگەن ارنايى جۇمىس توبىن قۇرىپ, انتيكوردان كەلىپ تۇسكەن ەسكەرتۋلەردى جويۋ جونىندە جۇمىس جۇرگىزىپ جاتىر.

سونىمەن قاتار جەدەل كە­ڭەس­تە دەنيسوۆ اۋدانىندا پو­لي­­تسەيلەردىڭ اۋىل­شارۋا­شى­لىق تاۋارىن ون­دىرۋ­شىلەردى بوپ­سالاۋ فاكتىلەرى انىق­تال­عا­نى تۋرالى دا ءسوز بولدى. مۇن­­­داي كەلەڭسىزدىكتىڭ جو­لىن كەسۋ ماقساتىندا وبلىس­تىڭ 5 اۋدا­نىنداعى پوليتسيا بولىم­دەرىندە باسشىلىق قۇ­رام­دى روتاتسيالاۋ جۇرگىزىلىپ, كۇزگى جيىن-تەرىم ناۋقانىندا اۋىل­شار­ۋاشىلىق تەحنيكالارىن تەكسە­رۋ­گە جانە نەگىزسىز توقتاتۋعا تى­يىم ­سا­لىندى.

سونداي-اق انتيكور قىز­مەت­كەرلەرى وبلىستاعى قانت ءدۇمپۋى كەزىندە قانت باعاسىن ار­زانداتۋعا كۇش سالۋدىڭ ورنىنا, جەكە قۇلقىننىڭ قامىمەن استىرتىن كەلىسىمگە بارعان بىر­­نەشە جاۋاپتى تۇلعانىڭ زاڭ­سىز ارەكەتتەرىن اشكەرەلەگەن. تۇراقتاندىرۋ قورىنا 3 توننا قانت قايتارىلىپ, قوستاناي قا­لاسى اكىمىنىڭ ورىنباسارى, «توبىل» اكك باسقارما تور­اعا­سىنىڭ ورىنباسارى, قامىس­تى اۋدانىنىڭ اكىمى جازالاندى. «توبىل» اكك مەنەدجەرى مەن سكلاد مەڭگەرۋشىسى جانە قوستاناي قالاسى اكىمدىگى كاسىپ­كەرلىك ءبولىمىنىڭ باسشىسى قىز­مەتتەرىنەن بوساتىلدى.

«توبىل» اكك-گە جۇرگىزىلگەن تالداۋ جۇمىستارىنىڭ ناتي­جە­سىندە قوستاناي جانە رۋدنىي قالالارىندا ون شاقتى جەر ۋچاسكەسىنىڭ زاڭسىز بەرىلگەنى انىقتالدى. بۇل ماسەلەنى رەتتەۋگە باقىلاۋشى ورگاندار تارتىلىپ, ناتيجەسىندە رۋدنىي قالاسىندا الەۋمەتتىك-كاسىپ­كەرلىك كورپوراتسيا تاراپىنان زاڭسىز بەرىلگەن 6 جەر ۋچاس­كە­سى قايتارىلعان. قوستاناي قالا­سىندا 18 ۋچاسكەگە قاتىستى تەكسەرۋ جۇمىستارى ءجۇرىپ جاتىر.

كەڭەس وتىرىسىندا مەملە­كەت­تىك ساتىپ الۋ سالاسىندا دا جەمقورلىق تاۋەكەلدەرىنىڭ بار ەكەنى ءسوز بولدى. انتيكور ماماندارى بىرنەشە مەملەكەتتىك مەكەمەگە ساتىپ الۋ باعاسىن قاي­­تا قاراۋ تۋرالى ۇسىنىم جى­بەر­­گەن. وسىنىڭ ناتيجەسىندە, 201 ملن تەڭگە قازىنا قاراجاتى ۇنەم­دەلدى.

دەپارتامەنت باسشىلىعىنىڭ مالىمەتىنشە, بيىل سىبايلاس جەمقورلىق وقيعالارى تۋرالى حابار جەتكىزگەن 3 ادامعا جالپى كولەمى 1 ملن 290 545 تەڭگە سىياقى بەرىلگەن.

قوستاناي وبلىسى