ريددەردەگى جىلۋ ەلەكتر ورتالىعىندا تاعى دا اپات بولدى

«ريددەردە جاعداي قيىن. قازىر ءۇش قازاندىق جۇمىس ىستەپ تۇر. كەشە التىنشى, نەگىزگى قازاندىقتى ىسكە قوسقان ەدىك. وكىنىشكە قاراي, تۇنگى بىردە قازاندىقتى قايتادان توقتاتۋعا تۋرا كەلدى. قازىر ول سۋىپ جاتىر, سالقىنداعاننان كەيىن تەكسەرىس بولادى. ازىرگە ءۇش قازاندىق جىلۋ بەرەدى», دەپ جاۋاپ بەردى بولات اقشولاقوۆ جۋرناليستەر قويعان ساۋالعا.

ءمينيستردىڭ ايتۋىنشا, قازىر اپاتتىڭ ءمان-جايى انىقتالۋدا. مۇنىڭ ءبارى قۇرال-جابدىقتاردىڭ توزىعى جەتكەنىنە بايلانىستى.

سونىمەن قاتار ب.اقشولاقوۆ ريددەر قازاقستاننىڭ سولتۇستىك جانە شىعىس ايماقتارىن گازداندىرۋ جوسپارىنا ەنگىزىلگەنىن اتاپ ءوتتى.

مينيسترگە «ريددەردە جاڭا جىلۋ ەلەكتر ورتالىعى سالىنا ما؟» دەگەن سۇراق قويىلدى.

«ويلانىپ كورۋ كەرەك. بۇل جاي عانا ەلەكتر ەنەرگياسى ەمەس, بۇل تاريف. ەسكىرگەن ستانتسيالاردى اۋىستىرۋدى قاجەت ەتەتىن,  توزىعى جەتكەن كوپتەگەن وڭىرلەر بار. تاريفتەردىڭ ءوسۋى ءبىر مەزەتتە ەمەس, بىرتە-بىرتە بولۋى كەرەك. مەملەكەتكە شامامەن 500 ملرد تەڭگە قاجەت – بۇل جۇيەنى قالپىنا كەلتىرۋگە جانە جاڭارتۋعا جۇمسالاتىن شىعىندار (جالپى قازاقستان بويىنشا)», دەدى مينيسترلىك باسشىسى.

شىعىس قازاقستان وبلىسىنىڭ اكىمدىگى دە ريددەر جەو-دا ءۇش قازاندىق جۇمىس ىستەپ تۇرعانىن حابارلادى. №6 قازاندىق, اكىمدىكتىڭ مالىمەتىنشە, «توتەنشە جاعدايعا بايلانىستى توقتاپ قالعان». ول جوندەلىپ جاتىر.

«قۇرمەتتى تۇرعىندار, تۇندە 6-شى قازاندىق جۇمىس ىستەپ تۇرعان. بىراق ساعات 01:00-دە اپاتتى جاعدايعا بايلانىستى توقتاتىلدى. قازىرگى ۋاقىتتا ءۇش ورتاشا قىسىمدى قازاندىق جۇمىس ىستەپ تۇر. قازىر 6-شى قازاندىقتا جوندەۋ جۇمىستارى جۇرگىزىلۋدە. اياقتالعاننان كەيىن پايدالانۋعا بەرىلەدى. سابىر ەتىپ, تۇسىنىڭىزدەر!», دەدى قالا اكىمى دميتري گوركوۆ.

ەسكە سالايىق, 5 قاراشادا ريددەردەگى جەرگىلىكتى جىلۋ ەلەكتر ورتالىعىندا تاعى ءبىر اپات بولدى. 22 مىڭ ابونەنت جىلۋسىز قالدى, قالادا توتەنشە جاعداي جاريالاندى. ريددەرلىكتەر جاعدايدى باقىلاۋعا الۋدى سۇراپ, ەل پرەزيدەنتىنىڭ اتىنا پەتيتسيا جازدى.

كەيىن شىعىس قازاقستان وبلىسىنىڭ اكىمى دانيال احمەتوۆ ريددەر قالاسىنىڭ جىلۋ ەلەكتر ورتالىعىن كوممۋنالدىق مەنشىككە بەرۋ ماسەلەسى قاراستىرىلىپ جاتقانىن ايتتى.