قارالى قاڭتار وقيعاسىنداعى تارتىپسىزدىكتەرگە قاتىسىپ, ءىستى بولعان جەتى پاۆلودارلىق ازامات راقىمشىلىققا ىلىكتى. ولاردىڭ بىرەۋى تۇزەۋ مەكەمەسىندە جازاسىن وتەپ جاتسا, وزگەسى – پروباتسيا قىزمەتىنىڭ ەسەبىندە تۇرعاندار.
وڭىرلىك قىلمىستىق-اتقارۋ جۇيەسى دەپارتامەنتىنىڭ حابارلاۋىنشا, قاڭتار وقيعاسىنا قاتىسقانى ءۇشىن سوتتالعان جەتى جەرلەسىمىزگە راقىمشىلىق جاسالاتىن بولدى.
– سوتتالعان ازاماتتاردىڭ بىرەۋى №45 تۇزەۋ مەكەمەسىندە جازاسىن وتەۋدە. زاڭعا سايكەس ول جاقىندا بوساتىلادى دەپ كۇتىلۋدە. تاعى التى ادام پروباتسيا قىزمەتىنىڭ ەسەبىندە تىركەلگەن. ونىڭ ەكەۋى تاعايىندالعان جازادان تولىقتاي قۇتىلسا, وزگەلەرىنە بەلگىلەنگەن جازا مەرزىمى قىسقارتىلادى. بارلىق سوتتالۋشى بويىنشا ماتەريالدار سوتقا جىبەرىلدى, ولاردىڭ ءىسى جاقىندا قارالادى, – دەيدى جاۋاپتى دەپارتامەنتتىڭ باستىعى ادىلەت مۇستافينوۆ.
راقىمشىلىق تۋرالى زاڭ تالاپتارىنا سايكەس, سوتتالۋشىلار سوت پروتسەسىنەن سوڭ بىردەن بوساتىلادى. وڭىردەگى قاڭتار وقيعاسىنداعى تارتىپسىزدىككە قاتىسقانى ءۇشىن ۇستالىپ, جازاسىن وتەپ جاتقانداردىڭ جاس شامالارى 22-دەن 33 جاسقا دەيىن. ولاردىڭ بەسەۋى – وبلىس ورتالىعىنىڭ, قالعاندارى اۋدانداردىڭ تۇرعىندارى. ۇشەۋىنىڭ وتباسى بار. قىلمىستىق كودەكستىڭ 272-بابىنا سايكەس, بۇل ازاماتتارعا ءارتۇرلى مەرزىم تاعايىندالعان.
پاۆلودار