قازاقستان رەسپۋبليكاسى پرەزيدەنتتىگىنە جالپىۇلتتىق سوتسيال-دەموكراتيالىق پارتياسى اتىنان كانديدات نۇرلان اۋەسباەۆ ورال قالاسىنداعى گاگارين اتىنداعى كينوتەاتردا سايلاۋشىلارمەن كەزدەستى.
ءىس-شارا بارىسىندا كانديدات جينالعان قاۋىمعا ءوزىنىڭ سايلاۋالدى باعدارلاماسىنىڭ نەگىزگى باعىتتارى جونىندە ايتىپ بەردى. كانديدات سىرتقى ساياسات ماسەلەلەرىنە كەلگەندە قازاقستان اسكەري بلوكتارعا قاتىسپايتىن, قولدامايتىن مەملەكەت رەتىندە بەرىك پوزيتسياسىن ساقتاۋى كەرەك دەپ ەسەپتەيدى. بۇل – بۇگىندە ورىن الىپ وتىرعان گەوساياسي جاعدايدا وتە وزەكتى.
ن.اۋەسباەۆتىڭ پىكىرىنشە, باسقا مەملەكەتتەر ءوز وندىرۋشىلەرىنىڭ قىزىعۋشىلىقتارىن قورعايتىن كەزدە قاتاڭ ويىن ەرەجەلەرىن ورناتۋ كەرەك. كانديداتتىڭ پايىمداۋىنشا, ستراتەگيالىق سالالاردا قازاقستان پروتەكتسيونيزم پوزيتسياسىن ۇستانۋى قاجەت.
نۇرلان اۋەسباەۆ سايلاۋالدى باعدارلاماسىندا ساياسي رەفورمالارعا باسا نازار اۋدارىلعانىن اتاپ ءوتتى. ۇمىتكەردىڭ پىكىرىنشە, «الدىمەن – ەكونوميكا, كەيىن – ساياسات» ستراتەگياسى ءتيىمسىز بولىپ شىقتى. «پارتيالىق-ساياسي ءورىستى تولىققاندى رەفورمالاۋ قاجەت. كەزەك كۇتتىرمەيتىن تاعى ءبىر وزەكتى ماسەلە – ەكونوميكاعا تۇساۋ بولىپ وتىرعان جەمقورلىق», دەدى ول. بۇل جاعىمسىز قۇبىلىستى جويۋ ءۇشىن كانديدات پاراقورلارعا قاتىستى جازانى بارىنشا كۇشەيتۋدى ۇسىنىپ وتىر. ن.اۋەسباەۆتىڭ پىكىرىنشە, سىبايلاس جەمقورلىق قىلمىس ءۇشىن سوتتالعانداردى مەرزىمىنەن بۇرىن بوساتۋ قۇقىعىنان ايىرۋ قاجەت.