بۇۇ دامۋ باعدارلاماسى وڭىرلەردە جاستار حاكاتوندارىنىڭ لەگىن باستادى

حاكاتون دەپ وتىرعانىمىز اعىلشىننىڭ «hacker» جانە «marathon» سوزدەرىنەن قۇرالعان, باعدارلاما جاساقتاۋشىلاردىڭ, باعدارلامالارمەن قامتاماسىز ەتۋ  سالاسىنىڭ ءتۇرلى ماماندارىن بىرىكتىرە وتىرىپ, قانداي دا ءبىر ماسەلەنى شەشۋ ماقساتىندا ورتاق ءىس ءۇشىن ۇيىمداستىرىلاتىن شارا.

بىزدەگى حاكاتوندار – ءححى عاسىر داعدىلارى مەن قۇزىرەتتەرى تۋرالى حاباردارلىقتى ارتتىرىپ, جاستاردى STEM (جاراتىلىستانۋ عىلىمدارى, تەحنولوگيالار, ينجەنەريا جانە ماتەماتيكا) ماماندىقتارىنا تارتۋدى, تسيفرلى جانە كاسىپكەرلىك ماشىقتاردى دامىتۋ ارقىلى ءومىردىڭ وڭ ستسەناريلەرىنە قۇلشىندىرۋدى كوزدەيدى.

جاھاندىق ءبىلىم يندەكسىنە سايكەس, بۇگىندە قازاقستان 154 ەلدىڭ ىشىندە 78-ءشى ورىندا تۇر. ەلدە بىلىممەن قامتۋدىڭ دەڭگەيى جوعارى بولسا دا, عزتكج مەن يننوۆاتسيالار بويىنشا كورسەتكىشتەر دە كوڭىل كونشىتپەيدى (154-تەن 124-ءشى ورىن). قازاقستانداعى ءتۇرلى سالالار مەن كومپانيالاردىڭ ماشىقتارعا دەگەن سۇرانىستارى مەن جاستاردىڭ قانداي ءبىلىمدى يگەرەتىنى اراسىنداعى الشاقتىق ايقىن كورىنەدى. قۇبىلمالى الەمدە ەڭبەك نارىعىنا قازىرگى سىن-تەگەۋرىندەردىڭ يننوۆاتسيالىق جانە تەحنولوگيالىق شەشىمدەرىن ۇسىنا الاتىن ماماندارمەن قامتاماسىز ەتۋ مىندەتى قازاقستان ءۇشىن دە وزەكتى.

«بۇگىنگى تاڭدا بىلىمگە نەگىزدەلگەن ءوسۋ ادام دامۋىنىڭ نەگىزى, جاڭالىقتار مەن يننوۆاتسيالاردىڭ قوزعاۋشى كۇشى بولىپ وتىر. سوندىقتان ۇلتتىق ارىپتەستەرىمەن بىرگە بۇۇدب باستى داعدىلاردى, تەحنولوگيالىق بەتالىس, يننوۆاتسيالاردى, سونداي-اق بىلىمگە نەگىزدەلگەن ەكونوميكانى قۇرۋ ءۇشىن ءبىلىم بەرۋ قىزمەتتەرىن ۇسىنۋدىڭ جاڭا تاسىلدەرىن تالقىلاۋ ءۇشىن ءبىلىم اپتالىعى پلاتفورماسىن قۇرىپ وتىر», دەيدى قازاقستانداعى بۇۇدب تۇراقتى وكىلىنىڭ مىندەتىن اتقارۋشى سۋحروب حودجيماتوۆ.

ال SKILLS UP جاستار حاكاتونى بيىل جەلتوقسان ايىندا بۇۇدب قولداۋىمەن وتەتىن 2022 ۇلتتىق ءبىلىم اپتالىعىنىڭ نەگىزگى كەزەڭدەرىنىڭ ءبىرى. ءبىرىنشى وڭىرلىك حاكاتون ماڭعىستاۋ وبلىسىنىڭ اقتاۋ قالاسىنداعى ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىندە وتسە, كەلەسى ۇشەۋى تۇركىستان (10 قاراشا), قاراعاندى (14 قاراشا) قالالارى مەن شىعىس قازاقستان وبلىسىندا (16 قاراشا) وتپەك. ءاربىر حاكاتوندا ءۇش جەڭىمپاز توپ انىقتالىپ, ىرىكتەلگەن 12 توپ الماتى قالاسىندا وتەتىن شەشۋشى سايىس كەزىندە باس جۇلدە – ستارتاپتى ىسكە اسىرۋعا ارنالعان گرانت ءۇشىن كۇرەسۋ مۇمكىندىگىنە يە بولماق.

وڭىرلىك حاكاتوندار قارساڭىندا تىركەلگەن 500-دەن استام قاتىسۋشى ونلاين-قارقىندى ءبىلىم بەرۋ اپتالىعىنا قاتىستى. ولار ءۇشىن يدەيالار مەن گيپوتەزالاردى تەكسەرۋدەن باستاپ بيزنەس-مودەلدەر مەن پروتوتيپتەر جاساۋعا دەيىنگى, نولدەن باستاپ ستارتاپ قۇرۋدىڭ شەبەرلىك سىنىپتارى ۇيىمداستىرىلدى. سونىمەن قاتار ينتەنسيۆ كەزىندە مونەتيزاتسيا ستراتەگيالارىن قۇرۋ, no-code ازىرلەۋ جانە Arduino-دا پروتوتيپتەۋ بويىنشا ساباقتار وتكىزىلدى.