مەملەكەت باسشىسىنىڭ جۇمىس ىستەيتىن جاستاردى تۇرعىن ۇيمەن قامتاماسىز ەتۋ تۋرالى تاپسىرماسىنا وراي يندۋستريا جانە ينفراقۇرىلىمدىق دامۋ مينيسترلىگى كەشەندى ءىس-شارالار جوسپارىن قابىلدادى. وسىعان وراي الداعى ءۇش جىلدا استانا, الماتى جانە شىمكەنت قالالارىندا جاستار ءۇشىن جالعا بەرىلەتىن 12 مىڭ پاتەر سالىنباق, دەپ حابارلايدى Egemen.kz.
«قۋاتتى وڭىرلەر – ەل دامۋىنىڭ درايۆەرى» ۇلتتىق جوباسىنا سايكەس 2025 جىلعا دەيىن جىل سايىن 3 مىڭ پاتەر سالۋ جانە ساتىپ الۋ كوزدەلىپ وتىر. بيىل وسى ماقساتتا رەسپۋبليكالىق بيۋدجەتتەن 21,6 ملرد تەڭگە قاراستىرىلعان.
ساتىپ الۋ قۇقىعىنسىز جالعا بەرىلەتىن تۇرعىن ءۇي بەس جىل مەرزىمگە بەرىلەدى. وسى كەزەڭ ىشىندە جاستاردىڭ ءوز باسپاناسىنىڭ باستاپقى جارناسىن جيناۋ مۇمكىندىگى تۋماق. ال كەيىننەن بوساعان تۇرعىن ءۇي كەلەسى ۇمىتكەرلەرگە بەرىلەدى.
جالپى العاندا, 2019 جىلدان بەرى «نۇرلى جەر» مەملەكەتتىك باعدارلاماسى شەڭبەرىندە جۇمىس ىستەيتىن جاستارعا ەلىمىزدەگى ءۇش مەگاپوليستە 7 مىڭعا جۋىق جالعا بەرىلەتىن پاتەر سالىندى.
سونىمەن قاتار بۇگىندە استانا قالاسىندا «ەلوردا جاستارى», الماتى قالاسىندا «الماتى جاستارى», قاراعاندى وبلىسىندا «قاراعاندى جاستارى», جامبىل وبلىسىندا «اۋليە اتا جاستارى», باتىس قازاقستان وبلىسىندا «ورال جاستارى», قوستاناي وبلىسىندا «قوستاناي جاستارى», الماتى وبلىسىندا «الاتاۋ جاستارى», اتىراۋ وبلىسىندا «اتىراۋ جاستارى» تۇرعىن ءۇي باعدارلامالارى ىسكە قوسىلدى. بۇدان بولەك, پاۆلودار وبلىسىندا «ەرتىس جاستارى», اباي وبلىسىندا «اباي جاستارى», اقتوبە وبلىسىندا «اقتوبە جاستارى» وڭىرلىك نەسيەلەندىرۋ باعدارلامالارى دايارلانۋدا.
وڭىرلىك باعدارلامالار جۇمىس ىستەيتىن جاستاردى تۇرعىن ۇيمەن قامتاماسىز ەتۋگە باعىتتالعان, سونداي-اق جەرگىلىكتى بيۋدجەتتەن جانە 5 پايىز مولشەرلەمەمەن جەڭىلدەتىلگەن. العاشقى جارنا كولەمى – 0-10 پايىزدى قۇرايدى. نەسيەلەندىرۋ مەرزىمى – 25 جىلعا دەيىن.
ايتا كەتەيىك, اتالعان شارالار مەملەكەت باسشىسىنىڭ قولجەتىمدى جالعا بەرىلەتىن تۇرعىن ۇيلەر سالۋ جانە جەكە باسپانا ساتىپ الۋ قۇرالدارىن دامىتۋ تۋراسىنداعى تاپسىرماسىن ىسكە اسىرۋ ماقساتىندا جۇزەگە اسىرىلۋدا.