مەملەكەت باسشىسى ماڭعىستاۋ وبلىسىنا جۇمىس ساپارى بارىسىندا اقتاۋ قالاسىنداعى «كاسپي» سۋ تۇشىتۋ زاۋىتىنىڭ جۇمىسىمەن تانىستى, دەپ حابارلايدى Egemen.kz اقوردانىڭ رەسمي پاراقشاسىنا سىلتەمە جاساپ.
پرەزيدەنتكە زاۋىتتى كەڭەيتۋ جوباسىنىڭ ورىندالۋ بارىسى تۋرالى باياندالدى. تاۋلىگىنە 20 مىڭ تەكشە مەتر تازا سۋ وندىرەتىن زاۋىتتىڭ قۋاتىن ەكى ەسەگە دەيىن ارتتىرۋ جۇمىستارى جۇرگىزىلىپ جاتىر.
وبلىس باسشىلىعىنىڭ ايتۋىنشا, قازىردىڭ وزىندە مۇنايلى اۋدانىنىڭ ەلدى مەكەندەرى مەن قاراقيا اۋدانىنا قاراستى قۇرىق اۋىلىندا سۋ تاپشىلىعى قاتتى سەزىلىپ وتىر. وڭىردە حالىق سانىنىڭ ارتۋىنا جانە تۋريستىك كلاستەردىڭ دامۋىنا بايلانىستى «كاسپي» سۋ تۇشىتۋ زاۋىتىنىڭ ونىمدىلىگىن تاۋلىگىنە 40 مىڭ تەكشە مەترگە دەيىن ارتتىرۋ قاجەتتىگى تۋىنداعان.
قاسىم-جومارت توقاەۆ ءوڭىردى اۋىزسۋمەن قامتاماسىز ەتەتىن كاسىپورىننىڭ ماڭىزى زور ەكەنىن اتاپ ءوتىپ, زاۋىتتى جاڭعىرتۋ جۇمىسى ساپالى ورىندالاتىنىنا سەنىم ءبىلدىردى.
«بۇل – وتە قاجەتتى, كەرەك جوبا. مەن بۇگىنگى جيىندا ناقتى ماسەلەلەردى ايتتىم. مۇنداي جوبالارسىز قيىن بولادى. يزرايل, ساۋد ارابياسى, سينگاپۋر سياقتى تازا اۋىزسۋى جوق ەلدەر كوپ. سوندىقتان ءبىز دە مىندەتتى تۇردە وزىق تەحنولوگيالاردى ەنگىزۋىمىز قاجەت. ۇكىمەتكە تاپسىرما بەرىلدى. كاسپيدىڭ دە دەڭگەيى ءتۇسىپ بارادى. مۇنى دا ويلانۋىمىز كەرەك», دەدى پرەزيدەنت.
بۇدان كەيىن مەملەكەت باسشىسى زاۋىت جۇمىسشىلارىمەن اڭگىمەلەسىپ, ولاردىڭ حالىق ءۇشىن پايدالى ءىس اتقارىپ جاتقانىن اتاپ ءوتتى.