باس پروكۋراتۋرا قاڭتار ايىنداعى تارتىپسىزدىكتەرگە قاتىسقان بەس ازاماتقا راقىمشىلىق جاساۋ ارقىلى قىلمىستىق قۋدالاۋ توقتاتىلعانىن حابارلادى. قالعاندارىنا قاتىستى سوت شەشىم قابىلدايدى, دەپ حابارلايدى Egemen.kz.
«الدىن الا مالىمەتتەر بويىنشا, راقىمشىلىق جاساۋعا جاتاتىن ادامداردىڭ جالپى سانى شامامەن ءبىر جارىم مىڭ ادامدى قۇرايدى», دەدى وكق بريفينگىندە باس پروكۋراتۋرانىڭ ءبىرىنشى قىزمەتى باستىعىنىڭ ورىنباسارى ەلدوس قيلىمجانوۆ.
ول باس پروكۋراتۋرا جەرگىلىكتى پروكۋرورلارعا «راقىمشىلىق تۋرالى» زاڭ نورمالارىنىڭ زاڭدىلىعىن جانە بىركەلكى قولدانىلۋىن قاتاڭ قامتاماسىز ەتۋدى تاپسىرعانىن ءتۇسىندىردى.
«بۇگىنگى تاڭدا جازانى ورىندايتىن ورگاندارعا 878 سوتتالۋشىعا قاتىستى جازانى قىسقارتۋ جانە جازادان بوساتۋ تۋرالى ۇسىنىستار جىبەرىلدى. تەرگەۋ ورگاندارى سوتقا دەيىنگى كەزەڭدە اۋىرلىعى ورتاشا قىلمىس جاساعان 5 كۇدىكتىگە قاتىستى قۋدالاۋدى توقتاتتى», دەپ ءتۇسىندىردى ە.قيلىمجانوۆ.