ەنەرگەتيكا مينيسترلىگى «ريددەر جەو» اق-داعى جاعدايعا قاتىستى رەسمي تۇسىنىكتەمە بەردى, دەپ حابارلايدى Egemen.kz ۆەدومستۆونىڭ ءباسپاسوز قىزمەتىنە سىلتەمە جاساپ.
7 قاراشادا ساعات 3:40-تا ريددەر جەو-دا №2 قازاندىق ىسكە قوسىلدى, №1 قازاندىق ىسكە قوسۋعا دايىندالۋدا. جىلۋ جەلىلەرىندەگى جەتكىزۋ تەمپەراتۋراسى كەستە بويىنشا – 70 گرادۋس, ءىس جۇزىندە 30 گرادۋسقا دەيىن تومەندەدى.
«2022 جىلعى 3 قاراشادا ريددەر جەو-نى شلاكتان تازارتۋ ءۇشىن №3 قازاندىق توقتاتىلدى. 4 قاراشادا №2 قازاندىق, 6 قاراشادا قوسالقى جابدىق بويىنشا اقاۋلاردى جويۋ ءۇشىن №1 قازاندىق جانە قىزدىرۋ بەتىندەگى اقاۋلاردى جويۋ ءۇشىن №6 قازاندىق توقتاتىلدى», دەلىنگەن مينيسترلىك حابارلاماسىندا.
ايتا كەتسەك, «ريددەر جەو» اق-داعى توتەنشە جاعدايعا بايلانىستى قۇرىلعان جەدەل شتابقا ەنەرگەتيكا مينيسترلىگىنە قاراستى اتوم جانە ەنەرگەتيكالىق قاداعالاۋ مەن باقىلاۋ كوميتەتىنىڭ اۋماقتىق دەپارتامەنتىنىڭ وكىلدەرى كىردى.
«قازىرگى ۋاقىتتا جەرگىلىكتى اۋقىمدا جاريالانعان توتەنشە جاعدايدىڭ رەجيمى شەڭبەرىندە وسكەمەن جانە سوگرا جەو ەنەرگەتيكتەرىن تارتا وتىرىپ, جوندەۋ-قالپىنا كەلتىرۋ جۇمىستارى ۇيىمداستىرىلدى, سونداي-اق مازۋت قورلارىن جەدەل تولىقتىرۋ جۇزەگە اسىرىلۋدا», دەپ قوستى ۆەدومستۆونىڭ ءباسپاسوز قىزمەتى.