كاسىپوداق جۇمىسى ماڭىزدى

ۇمىتكەر اۋەلى ۇجىم قىزمەتكەرلەرىنە ءوزىنىڭ سايلاۋالدى تۇعىرناماسىنىڭ نەگىزگى بولىمدەرىن ءتۇسىندىردى. جيىنعا قاتىسقان جۇمىسكەرلەردىڭ تاراپىنان ەكونوميكالىق رەفورمالار مەن ازاماتتىق قوعامدى دامىتۋعا قاتىستى سۇراقتار تۋىندادى. ءوز كەزەگىندە كاسىپورىن باسشىسى سەيىلجان سايلاۋباەۆ ينفلياتسيانىڭ ءوسۋى, حالىق پەن بيزنەستىڭ نەسيەگە باتۋى, ەڭ تومەنگى جالاقى كورسەتكىشى سياقتى پروبلەمالىق ماسەلەلەر بويىنشا پىكىر ءبىلدىردى.

م.قاجىكەن ايتىلعان پىكىرلەرمەن كەلىسىپ, بۇل تاقىرىپتاردىڭ باسىم بولىگى سايلاۋالدى باعدارلاماعا ەنگىزىلگەنىن ايتتى. «بۇگىنگى تاڭدا ەڭ تومەنگى جالاقىنىڭ قالاي انىقتالاتىنى بەلگىسىز. مەن ونى يندەكستەۋدى اشىق ەتىپ قانا قويماي, ەىدۇ (ەكونوميكالىق ىنتىماقتاستىق جانە دامۋ ۇيىمى) دامىعان ەلدەرىنىڭ دەڭگەيىنە جەتكىزۋدى ۇسىنامىن. تيىسىنشە ەتج 60 مىڭ ەمەس, كەم دەگەندە 150 مىڭ تەڭگەنى قۇرايتىن بولادى», دەدى كانديدات.

ول الداعى ۋاقىتتا ەڭبەك سالاسىندا الەۋمەتتىك ارىپتەستىكتى دامىتۋدى جوسپارلاپ وتىرعانىن جەتكىزدى. «كاسىپكەرلەر مەن كاسىپوداقتار كەز كەلگەن ماسەلەلەردى بىرگە شەشۋگە ءتيىس. ال كوشباسشى زاڭ بولۋى كەرەك. ءبىز اركىمنىڭ مۇددەسى ەسكەرىلەتىن جانە ءار ازامات ءوزى ءۇشىن شەشىم قابىلداۋعا, ءوز مۇددەلەرىن قورعاۋعا قۇقىعى بار مەملەكەت قۇرىپ جاتىرمىز», دەپ اتاپ ءوتتى كانديدات.