جىلى جاققا بەت العان ۇيىرىنەن قالىپ قويعان سۇڭقىلداق اققۋ بۋراباي كەنتىندەگى زوولوگيالىق باقتا قىستاپ شىعاتىن بولدى. «قىزىل كىتاپقا» ەنگەن قۇس تورەسىن كەلەر كوكتەمگە دەيىن پرەزيدەنتتىڭ ءىس باسقارماسىنا قاراستى «بۋراباي دامۋ» سەرىكتەستىگى باعىپ-قاعادى.
السىرەپ ۇشا الماي قالعان قۇستى كوكشەتاۋ قالاسىنىڭ تۇرعىندارى كورىپ, جەرگىلىكتى پوليتسيانى شاقىرىپتى. پوليتسەيلەر تابيعات قورعاۋشى ارىپتەستەرىنە حابارلاعان. ءسويتىپ, وقا جاعالىلار مەن اقمولا وبلىسىنىڭ ورمان شارۋاشىلىعى جانە جانۋارلار دۇنيەسى ينسپەكتسياسىنىڭ قىزمەتكەرلەرى اققۋدى بۋرابايداعى زوولوگيالىق باققا اكەلدى.
– بالاپان اققۋدى ۆەتەريناريالىق تەكسەرۋدەن وتكىزىپ, قابىلداپ الدىق. قاتتى قورقىپ قالعانى بولماسا, زاقىمدانعان جەرى جوق. سۇيەگى ساۋ, بۇلشىقەتى ءبۇتىن. بيىل بىزدە قىستاپ شىقسا, كوكتەمدە ەركىنە جىبەرەمىز, – دەيدى باقتىڭ ۆەتەرينارى يلدار فايزۋلين.
«بۋراباي» مەملەكەتتىك ۇلتتىق پاركىندە قۇستىڭ 197 ءتۇرى بار, ونىڭ ىشىندە 14-ءى «قىزىل كىتاپقا» ەنگەن. سۇڭقىلداق اققۋ دا – سيرەك كەزدەسەتىن قاناتتىلاردىڭ ءبىرى. بۇل اق ماقتاداي اپپاق, تەك تۇمسىعىنىڭ ۇشى عانا سارعىلت بولىپ كەلەتىن عاجاپ سۇلۋ قۇس. بۋرابايداعى زووباققا اكەلىنگەن اققۋ تولىق ەسەيمەگەندىكتەن, قانات-قاۋىرسىندارى ءالى تولىق اعارا قويماپتى, سۇرعىلت ءتۇستى. سەرىگىنە ادال قۇستار ءومىر بويى ءبىر عانا جۇپپەن ءومىر سۇرەتىنىن دە ايتا كەتكەن ءجون.