«قازاقستان» تەلەراديوكورپوراتسياسى 2022 جىلدىڭ 20 قاراشاسى مەن 18 جەلتوقسانى ارالىعىندا كاتاردا وتەتىن فۋتبولدان الەم چەمپيوناتىنىڭ ماتچتارىن كورسەتۋ قۇقىعىنا يە بولدى, دەپ حابارلايدى Egemen.kz Olympic.kz سايتىنا سىلتەمە جاساپ.
قازاقستاندىق فۋتبول سۇيەر قاۋىم چەمپيونات ماتچتارىن «Qazaqstan» جانە «Qazsport» تەلەارنالارىندا تىكەلەي ەفيردە كورە الادى. سونىمەن قاتار qazaqstan.tv جانە qazsporttv.kz سايتتارىندا تىكەلەي ونلاين ترانسلياتسيا بولادى.
XXII الەم بىرىنشىلىگى كاتاردىڭ 5 قالاسىندا 8 ستاديوندا وتەدى.
بۇل رەتتە «قازاقستان» تەلەراديوكورپوراتسياسىنىڭ ءتۇسىرىلىم توبى كاتار ستاديوندارىنان تىكەلەي قوسىلۋدى جۇزەگە اسىرۋدى جوسپارلاپ وتىر. الەم چەمپيوناتى كەزىندە «قازاقستان» كورپوراتسياسىنىڭ الەۋمەتتىك جەلىلەرىندە جانكۇيەرلەر اراسىندا فۋتبول اتريبۋتتارى ويناتىلادى.
قازاقستان اۋماعىندا فۋتبولدان ءححىى الەم بىرىنشىلىگىنىڭ ويىندارىن كورسەتۋگە تەك قانا «قازاقستان» رەسپۋبليكالىق تەلەراديوكورپوراتسياسى قۇقىلى ەكەنىن اتاپ ءوتۋ كەرەك. وسىعان بايلانىستى قازاقستاندا ماتچتاردى باسقا باق جانە پلاتفورمالار ارقىلى تاراتۋعا قاتاڭ تىيىم سالىنادى.