كەشە ەلورداداعى اسپان سپورت كەشەنىندە تاەكۆوندو GTF بويىنشا جاسوسپىرىمدەر مەن جاستار اراسىندا قازاقستان رەسپۋبليكاسىنىڭ كۋبوگى باستالدى دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
شارانىڭ اشىلۋ سالتاناتىنا استانا قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەركەعالي داۆلەتحان ۇلى, «Sport Qory» باس ديرەكتورى اسحات سەيسەمبەك جانە قازاقستان جەكپە-جەك ونەرى قاۋىمداستىعى فەدەراتسياسىنىڭ ۆيتسە-پرەزيدەنتى سارسەن قۇرانبەك قاتىسىپ, جارىس قاتىسۋشىلارىنا ساتتىلىك تىلەدى.
«وزدەرىڭىزدى بۇگىنگى تاەكۆوندو GTF بويىنشا جاسوسپىرىمدەر مەن جاستار اراسىندا قازاقستان رەسپۋبليكاسى كۋبوگىنىڭ اشىلۋ سالتاناتىمەن قۇتتىقتايمىن! استانا قالاسىندا داستۇرگە اينالعان بۇل جارىستىڭ اۋقىمى كەڭەيىپ كەلەدى. بۇگىنگى جارىسقا ەلىمىزدىڭ بارلىق وڭىرىنەن 400-گە تارتا جاس ورەندەر قاتىسىپ وتىر. مەملەكەت باسشىسىنىڭ تاپسىرماسى بويىنشا بۇقارالىق سپورتقا ەرەكشە كوڭىل بولۋدەمىز. بۇگىنگى جارىس – بۇقارالىق سپورتتى دامىتۋداعى ۇلكەن قادام. وسى ورايدا, بۇگىنگى جارىستى ۇيىمداستىرعان بارشا ازاماتتارعا ەلىمىزدىڭ سپورت سالاسىن دامىتۋعا قوسقان ۇلەستەرى ءۇشىن زور العىسىمدى بىلدىرەمىن. رەسپۋبليكالىق تۋرنيردە ۇزدىكتەردىڭ ۇزدىكتىگى انىقتالىپ, ەڭ مىقتىلار جەڭىس تۇعىرىنان كورىنەدى دەگەن سەنىمدەمىن», دەدى قالالىق دەنە شىنىقتىرۋ جانە سپورت باسقارماسى باسشىسىنىڭ ورىنباسارى ەركەعالي كوربوزوۆ.
ءدۇبىرلى دوداعا ەلىمىزدىڭ بارلىق وبلىسى مەن قالالارىنان 400-دەن استام سپورتشى قاتىسۋدا. ولار ەكى كۇن بويى وزدەرىنىڭ باقتارىن سىنايتىن بولادى.
«رەسپۋبليكالىق GTF تاەكۆوندو فەدەراتسياسىنىڭ ۇيىمداستىرۋىمەن چەمپيونات ەكى سانات بويىنشا وتۋدە. جارىستا ءارتۇرلى دەڭگەيدەگى بەلبەۋ يەلەرى حەنگي – بازالىق سوققى مەن بلوكتاردان تۇراتىن ءفورمالدى كەشەن جانە ماسسوگي-سپاررينگتەر بويىنشا سىنعا تۇسۋدە. بۇگىن جارىسقا 15-17 جاس ارالىعىنداعى سپورتشىلارىمىز شىعىپ جاتىر. ەرتەڭ كىشى جاس ياعني, 12-14 جاستاعى تاەكۆوندوشىلار دويانگاعا شىعادى. سايىسقا 40 سالماق دارەجەسىندە 400-دەن استام سپورتشى باعى مەن بابىن سىناپ كورىپ جاتىر. اتالمىش جارىستا تەك ءبىرىنشى ورىن يەلەنگەن سپورتشى كەلەر جىلى ۇلتتىق قۇراماعا الىنادى. سونىمەن قاتار بۇل قازاقستان كۋبوگى الداعى جارىستار مەن چەمپيوناتتاردا سپورتشىلارىمىزدىڭ دايىندىعىن شىڭداي تۇسۋگە مۇمكىندىك بەردى», دەيدى قالالىق GTF تاەكۆوندو فەدەراتسياسىنىڭ ديرەكتورى سۆياتوسلاۆ جانوۆيچ.
ەستەرىڭىزگە سالا كەتەيىك, اتالعان ءىس-شارا ەلوردامىزدا 2-4 قاراشا ارالىعىندا وتۋدە. قازاقستان رەسپۋبليكاسىنىڭ كۋبوگى ەكى جاس ساناتىندا ياعني, 12-14 جاس جانە 15-17 جاس ارالىعىندا وتۋدە. سونىمەن قاتار بۇل تۋرنيردە ۇزدىك تەحنيكا مەن اسەرلى جەكپە-جەكتەرگە كۋبوكتار بەرىلەدى دەپ جوسپارلانۋدا.