سەنات دەپۋتاتتارى پالاتانىڭ جالپى وتىرىسىندا «پروكۋراتۋرا تۋرالى» زاڭدى قابىلدادى. قۇجات مەملەكەت باسشىسىنا قول قويۋعا جىبەرىلدى, دەپ حابارلايدى Egemen.kz.
قۇجاتتى قر باس پروكۋرورىنىڭ ورىنباسارى اسەت شىنداليەۆ ۇسىندى. ونىڭ ايتۋىنشا, زاڭ جوباسىنىڭ نەگىزگى ماقساتى - پروكۋراتۋرانىڭ قۇقىق قورعاۋ قىزمەتىن جۇيەلى تۇردە كۇشەيتۋ, ەلدەگى جوعارى قاداعالاۋ مەن زاڭدىلىق قۇرالدارىن نىعايتۋ.
سەناتتىڭ بەيىندىك كوميتەتىنىڭ قورىتىندىسىندا زاڭ جوباسىنىڭ ەرەجەلەرى پروكۋراتۋرا ورگاندارىنىڭ قۇزىرەتىن, قىزمەتىن ۇيىمداستىرۋ مەن ءتارتىبىن ايقىندايدى:
پروكۋراتۋرا ورگاندارى قىزمەتىنىڭ قۇقىقتىق نەگىزى جانە ولاردىڭ قۇرىلىمى; پروكۋراتۋرا ورگاندارىنىڭ قىزمەتى مەن ۇيىمداستىرۋ قاعيداتتارى; پروكۋرورلاردىڭ وكىلەتتىكتەرى; جوعارى قاداعالاۋدىڭ, مەملەكەت مۇددەلەرىن سوتتا ۇسىنۋدىڭ, قىلمىستىق قۋدالاۋدىڭ, وتىنىشتەردى قاراۋدىڭ شەكتەرى مەن نىساندارى; پروكۋرورلار قىزمەتىنىڭ قۇقىقتىق كەپىلدىكتەرى.زاڭ جوباسى اياسىندا باس پروكۋراتۋرا ءوز قۇزىرەتىندەگى ماسەلەلەر بويىنشا مەملەكەتتىڭ مۇددەلەرىن شەتەلدىك جانە حالىقارالىق سوتتاردا (تورەلىكتەردە) بىلدىرەدى.
پروكۋرورلاردىڭ قاداعالاۋ فۋنكتسيالارىن كۇشەيتۋ ماقساتىندا پروكۋرورلىق قاداعالاۋدىڭ جاڭا اكتىسى – زاڭ بۇزۋشىلىقتارعا جول بەرمەۋ تۋرالى ءتۇسىندىرۋ ەنگىزىلدى.
«پروكۋراتۋرا تۋرالى» كونستيتۋتسيالىق زاڭ رەسپۋبليكالىق رەفەرەندۋمنىڭ قورىتىندىلارى بويىنشا كونستيتۋتسياعا ەنگىزىلگەن وزگەرىستەردى ىسكە اسىرۋ ماقساتىندا ازىرلەندى. پروكۋراتۋرانىڭ نەگىزگى مىندەتتەرى - ادامدى, ونىڭ ءومىرىن, قۇقىقتارى مەن بوستاندىقتارىن مەملەكەتتىڭ ەڭ جوعارى قۇندىلىقتارى رەتىندە قورعاۋ, سونداي-اق ەل اۋماعىندا زاڭدىلىقتى قامتاماسىز ەتۋ. پروكۋراتۋرا ورگاندارىنىڭ قىزمەتى العاش رەت كونستيتۋتسيالىق زاڭمەن رەتتەلەتىنىن اتاپ وتكەن ءجون. بۇل قادام ەلدىڭ قۇقىق قورعاۋ جۇيەسىن جەتىلدىرۋگە ماڭىزدى ۇلەس قوسادى دەپ ۇمىتتەنەمىز», دەپ اتاپ ءوتتى ماۋلەن اشىمباەۆ.