بۇگىن ەلوردالىقتار بەرگامو قالاسىنان جەڭiسپەن ورالعان پارا كاراتەشىلەردى حالىقارالىق اۋەجايدان قارسى الدى, دەپ حابارلايدى Egemen.kz استانا اكىمدىگىنىڭ ءباسپاسوز قىزمەتىنە سىلتەمە جاساپ.
جانكۇيەرلەر قوس التىن يەلەنگەن استانالىق پارا سپورتشىلاردى قۇشاق جايا قارسى الىپ, ەرەكشە قۇرمەت كورسەتتى.
«ەڭ الدىمەن قولداۋ بىلدىرگەن جاقىندارىما, دوستارىما, جانكۇيەرلەرىمە العىس بىلدىرەمىن. بۇل ۇلكەن جەڭىستەرگە جول اشاتىن جەتىستىك دەپ بىلەمىن. ارمان-ماقساتىمىز قاشاندا وسىنداي ءىرى حالىقارالىق جارىستاردىڭ ارەنالارىندا كوك بايراعىمىزدى جەلبىرەتىپ, بيىكتەن كورىنۋ», دەدى الەم چەمپيوناتىنىڭ جەڭىمپازى ديدار مۇحامەدجانوۆ.
دۇنيەجۇزىلىك دودا يتاليانىڭ بەرگامو قالاسىندا وتكەن ەدى. جارىسقا الەمنىڭ 16 ەلىنىڭ سپورتشىلارى قاتىستى.
جارىس قورىتىندىسى بويىنشا, كاراتەنىڭ كاتا تۇرىنەن كورۋ قابىلەتى زاقىمدانعان سپورتشىلار ساناتىندا جەرلەسىمىز ءلاززات ءجۇسىپوۆا قارسىلاستارىنان وزىق بولدى. ال تىرەك-قيمىل اپپاراتى زاقىمدانعان سپورتشىلار ساناتىندا وتانداسىمىز ديدار مۇحامەدجانوۆ الەم چەمپيونى اتاعىن يەلەندى.
ەندى ۇلتتىق قۇراما سپورتشىلارى جەلتوقسان ايىندا وتەتىن تاشكەنت قالاسىنداعى ازيا چەمپيوناتىندا باق سىنايدى.