جانار-جاعارماي باعاسى ەڭ جوعارى قالالار انىقتالدى, دەپ حابارلايدى Egemen.kz energyprom.kz پورتالىنا سىلتەمە جاساپ.
بەنزيننىڭ ەڭ قىمبات باعاسى قوستاناي, پەتروپاۆل جانە الماتى قالاسىندا تىركەلگەن.
كەلتىرىلگەن دەرەكتەر بويىنشا, بيىلعى قاڭتار–قىركۇيەك ايلارىندا قازاقستاندا اۆيابەنزيندى قوسقاندا 3,7 ملن توننادان استام بەنزين وندىرىلگەن. بۇل وتكەن جىلمەن سالىستىرعاندا 5,6%-عا ارتىق.
موتور وتىنىنىڭ ەكسپورتى, كەرىسىنشە, 2022 جىلعى قاڭتار–تامىزدا 24 مىڭ توننانى قۇراپ, 4,2 ەسە قىسقارعان. ال ىشكى ساۋدا كولەمى 8,4% ءوسىپ, 3,3 ملن توننانى قۇراعان.
جىلدىق باعانىڭ ءوسۋى - 4% قۇرادى. وڭىرلەر ىشىندە باعانىڭ ايتارلىقتاي ءوسۋى سولتۇستىك قازاقستان (5,5%), پاۆلودار (5,1%) جانە باتىس قازاقستان (4,8%) وبلىستارىندا, سونداي-اق الماتى قالاسىندا (4,8%-عا) بايقالعان.
باعانىڭ ەڭ از ءوسۋى اقمولا ء(بىر جىلدا 2,2%) جانە ماڭعىستاۋ (2,6%) وبلىستارىندا تىركەلگەن.
2022 جىلدىڭ قىركۇيەگىندە قازاقستاندا اي-92 ماركالى بەنزيننىڭ ءبىر ءليترىنىڭ ورتاشا بولشەك ساۋدا باعاسى 179 تەڭگەنى قۇرادى. اي-95/96 ماركالى بەنزيننىڭ ءليترى 211 تەڭگە, اي-98 232 تەڭگە بولدى.
قازاقستان قالالارىنىڭ ىشىندە ەڭ قىمبات اي-92 ماركالى بەنزين پەتروپاۆلدا (ليترىنە 184 تەڭگە), استانادا (ليترىنە 182 تەڭگە), جەزقازعاندا (ليترىنە 182 تەڭگە) جانە قوستانايدا (ليترىنە 182 تەڭگە) ساتىلدى.
ەڭ قىمبات اي-95/96 بەنزينى قوستاناي (ليترىنە 222 تەڭگە), پەتروپاۆل (ليترىنە 217 تەڭگە) جانە الماتى (ليترىنە 215 تەڭگە) قالالارىندا ساتىلدى.
اي-98 ماركالى بەنزين پاۆلودار (ليترىنە 242 تەڭگە), قوستاناي (ليترىنە 238 تەڭگە) جانە الماتى (ليترىنە 235 تەڭگە) قالالارىندا قىمباتتادى.