Jibek Joly تەلەارناسىنىڭ ديرەكتورى كونستانتين حارلاموۆ الداعى جۇمىس جوسپارىمەن ءبولىستى, دەپ حابارلايدى Egemen.kz.
كونستانتين حارلاموۆ جاقىندا تەلەارنانىڭ ءبىرىنشى ماۋسىمى باستالعانىن ەسكە سالدى.
ء«بىز وتە قۇندى مۇرامەن جۇمىس ىستەپ جاتىرمىز. ءبىز ءومىر ءسۇرىپ جاتقان تاريحي كەزەڭ ءبىزدىڭ الدىمىزعا ءبىرشاما وزگەشە مىندەتتەر قويىپ وتىر. ويتكەنى جاڭا قازاقستان - مەملەكەتتىڭ جاڭا ءيميدجى», دەدى كونستانتين حارلاموۆ Astana Media Week الاڭىندا.
تەلەارنا ديرەكتورى Jibek Joly كومانداسىنىڭ الدىنا قويعان ءۇش نەگىزگى مىندەتتى اتادى.
ء«بىرىنشى مىندەت - داۋىستى كۇشەيتۋ. بۇل اقپاراتتاردىڭ اۋقىمىن كەڭەيتۋدى بىلدىرەدى. الەمدە ورىن الىپ جاتقان وقيعالار مۇنىڭ قاجەتتىلىگىن انىق كورسەتتى. مەملەكەت باسشىسى قاسىم-جومارت توقاەۆ ەلىمىزدە جانە بۇكىل الەمدە بەيبىتشىلىكتى نىعايتۋعا كۇش سالۋدا. گيبريدتى سوعىستار داۋىرىندە دايەكتى حابار تاراتۋ وتە ماڭىزدى. سونىمەن قاتار ءبىزدىڭ ەلىمىزدىڭ ۇستانىمى الەمدىك قوعامداستىققا كوبىرەك قىزىعۋشىلىق تانىتۋدا. ءبىز وزگەرىس جولىمەن نەعۇرلىم بەلسەندى جۇرسەك, سونداي-اق اينالامىزداعى الەم قانشالىقتى كۇردەلى بولسا, سۇرانىس سوعۇرلىم كۇشتى بولادى. ءبىز تەك قازاقستاننىڭ عانا ەمەس, ورتالىق ازيانىڭ دا داۋىسىنا اينالا وتىرىپ حابار تاراتۋعا دايىنبىز. بۇل رەتتە ءبىز باسقا دا بۇقارالىق اقپارات قۇرالدارىمەن ىنتىماقتاستىق پەرسپەكتيۆالارىن قاراستىرۋدى ءجون سانايمىز», دەدى سپيكەر.
كونستانتين حارلاموۆتىڭ ايتۋىنشا, ەكىنشى مىندەت - «اڭگىمەلەر سيقىرى».
«ەجەلگى داۋىردەن باستاپ تاريح ءبىلىم مەن اقپاراتتى ۇرپاقتان ۇرپاققا جەتكىزۋدىڭ نەگىزگى قۇرالى بولدى. بۇرىن ادامدار ەڭ جارقىن وقيعالار اعىنىن ءبىلۋ ءۇشىن جارقىلداعان وتتىڭ اينالاسىنا جينالىپ اڭگىمەلەسەتىن. بۇگىنگى تاڭدا ءبىزدىڭ تەلەفوندارىمىزدىڭ, باسقا گادجەتتەردىڭ, كومپيۋتەرلەردىڭ, تەلەديدارلاردىڭ ەكراندارىنىڭ جىپىلىقتايتىن جارىعى - كوپتەگەن تىڭداۋشىلاردى جيناپ جاتىر. بىراق ءبىز ءوز تاريحىمىزدى جانە كەيىپكەرلەرىمىزدى بىلەمىز بە؟ ماسەلەن, ءنازيرا - ەۋروپادا ۇلكەن سۇرانىسقا يە قازاقستاندىق دي-دجەي, ول تۋرالى The New York Times گازەتى دە بىرەگەي مۋزىكالىق قوزعالىس مەدياسىن جاساۋشى رەتىندە ماقالا شىعارعان. ماتەماتيك تيمۋر رىسپەكوۆ شە؟ ول ءوز كومانداسىمەن بىرلەسىپ ۇلكەن دەرەكتەردى وڭدەۋگە قابىلەتتى بىرەگەي الگوريتم جاساعان. ونىڭ الگوريتمى جەر سىلكىنىسى مەن بانكتىك الاياقتىقتى بولجاۋ ماقساتىندا قولدانىلىپ كەلەدى. مۇنداي كەيىپكەرلەر وتە كوپ. بىراق ءبىز ولار تۋرالى شەتەلدىك باق-تان ەستيمىز», دەدى ول.
سپيكەر بولىسكەن ءۇشىنشى مىندەت - الەۋمەتتىك وپتيميزم. بۇل رەتتە كونستانتين حارلاموۆ جاڭا تەلەارنا قازاقستاننىڭ ەڭ ماڭىزدى باستامالارىن زەرتتەپ, بايانداۋعا نيەتتى ەكەنىن جەتكىزدى.
ەسكە سالا كەتسەك, 1 قىركۇيەكتەن باستاپ ەلىمىزدە QazaqTV ارناسى Jibek Joly اتاۋىن الىپ حابار تاراتا باستادى. ارنا كورەرمەندەرگە قوعامدىق-ساياسي وقيعالار, قوعامدى تولعاندىراتىن ماسەلەلەر, مادەني جانە سپورتتىق جاڭالىقتاردى ۇسىنادى.