حقو-دان دايىن قۇجاتتاردى الۋعا ەندى ۇيدەن تاپسىرىس بەرۋگە بولادى. ونى ياندەكس جەتكىزۋ قىزمەتىنىڭ كۋرەرلەرى اكەپ بەرەدى. جەتكىزۋ ۋاقىتى ورتا ەسەپپەن ءبىر ساعاتتى قۇرايدى. وسىلايشا, تانىمال مەملەكەتتىك قىزمەتتەردىڭ 150 ءتۇرى بويىنشا قۇجاتتاردى الۋعا بولادى. قىزمەت قازاقستاننىڭ 17 قالاسىندا قولجەتىمدى.
پايدالانۋشىنىڭ سمارتفونىنا 1414 نومىرىنەن قۇجاتتاردىڭ دايىن بولعانى تۋرالى, سونداي-اق express.gov4c.kz پورتالىندا دايىن قۇجاتتاردى جەتكىزۋدى رەسىمدەۋگە ۇسىنىس بىلدىرەتىن SMS-حابارلاما جولدانادى. بۇدان ءارى فورمانى تولتىرىپ, جەتكىزۋ مەكەنجايى مەن تەلەفونىن كورسەتىپ, جەتكىزىلىم اقىسىن تولەۋ كەرەك.
كۋرەر بىردەن تاعايىندالادى. ال جەتكىزۋدىڭ ناقتى ۋاقىتى تاپسىرىس بەرىلگەن كەزدە بەلگىلى ءبىر ايماقتاعى كۋرەرلىك قىزمەتتەرگە سۇرانىستىڭ بولۋىمەن, مەجەلى جەرگە دەيىنگى قاشىقتىققا جانە جولداعى جاعدايعا بايلانىستى انىقتالادى. ورتاشا العاندا, بۇل ءبىر ساعاتتى قۇرايدى. جەتكىزۋ مارتەبەسىن ياندەكس Go قوسىمشاسىندا نەمەسە SMS-حابارلامادا كورسەتىلگەن سىلتەمە بويىنشا كارتا ۆيدجەتى ارقىلى باقىلاۋعا بولادى.
حقو-دان قۇجاتتاردى جەتكىزۋ ازاماتتاردى ورتالىققا قايتا بارۋدان بوساتادى, سونىمەن بىرگە ۋاقىتتى ۇنەمدەيدى. بۇل جۇمىس ىستەيتىن ادامدارعا, قالدىرىپ كەتۋگە بولمايتىن كىشكەنتاي بالالارى نەمەسە باسقا تۋىستارى بار ازاماتتارعا قولايلى.
«ازاماتتارعا ارنالعان ۇكىمەت» مەملەكەتتىك كورپوراتسياسى» كەاق باسقارما توراعاسى سۇيەنىش ءابدىلدين ءوزارا جاسالعان ىنتىماقتاستىقتى بىلاي دەپ تۇسىندىرەدى: ء«بىز بۇعان دەيىن ءبىر جۇمىس كۇنى ىشىندە قۇجاتتاردى جەتكىزۋ قىزمەتىن ىسكە قوسقان بولاتىنبىز. ەندى تسيفرلىق دامۋ مينيسترلىگىنىڭ باستاماسى بويىنشا ياندەكسپەن بىرلەسىپ جەتكىزۋدىڭ نەعۇرلىم جىلدام ءارى ىڭعايلى بالامالى ءتاسىلىن ىسكە اسىردىق. كوبىنەسە قۇجات بىزگە شۇعىل قاجەت بولۋى مۇمكىن. مۇنداي ساتتەردە ياندەكس جەتكىزۋ قىزمەتىن پايدالانۋ ىڭعايلى. ادامداردا ءاردايىم جۇمىستان كەتۋگە, قايتىپ كەلۋگە نەمەسە بالالاردى ۇيدە قالدىرۋعا مۇمكىندىك بولا بەرمەيدى. قۇجاتتاردى جەتكىزۋ سەرۆيسى ۋاقىت پەن اقشانى ايتارلىقتاي ۇنەمدەيدى».
بۇگىندە قازاقستاندىقتارعا 150 مەملەكەتتىك قىزمەت بويىنشا قۇجاتتاردى جەتكىزۋگە بولادى. ونىڭ ىشىندە تۋ, نەكەگە تۇرۋ جانە نەكەنى بۇزۋ تۋرالى انىقتامالار, اسكەري بيلەتتەردىڭ تەلنۇسقالارى, جىلجىمايتىن م ۇلىككە مەنشىك قۇقىعىن مەملەكەتتىك تىركەۋ, ءبىلىم تۋرالى «اپوستيل» ءمورتاڭباسى قويىلعان قۇجاتتار بار. بۇل رەتتە جەكە كۋالىكتى, پاسپورتتى نەمەسە جۇرگىزۋشى كۋالىگىن كۋرەر ارقىلى الۋعا بەرمەيدى, ونى الۋ ءۇشىن ءوزىڭىز كەلۋىڭىز قاجەت.
17 قالانىڭ تۇرعىندارى قۇجاتتاردى جەتكىزۋ قىزمەتىن پايدالانا الادى. بۇل – استانا, الماتى, كوكشەتاۋ, وسكەمەن, تاراز, قىزىلوردا, پەتروپاۆل, اقتاۋ, پاۆلودار, شىمكەنت, سەمەي, اتىراۋ, قاراعاندى, ورال, تالدىقورعان, قوستاناي جانە اقتوبە قالالارى. جاقىن ارادا قىزمەتتەردى قامتۋ ايماعىنا تۇركىستان, ەكىباستۇز جانە قوناەۆ قالالارى قوسىلماق.