قاڭتار-قىركۇيەك ارالىعىندا Astana Hub قاتىسۋشىلارىنىڭ جيىنتىق تابىسى 147,7 ملرد تەڭگەنى قۇرادى. بۇگىندە حالىقارالىق تەحنوپاركتە 930 ءىت-كومپانيا تىركەلگەن. ونىڭ 170-ءى – شەتەلدىك كومپانيا.
Astana Hub قاتىسۋشىلارى 12 مىڭنان استام جۇمىس ورنىن ۇسىنىپ وتىر. ال IT-قىزمەتتەر ەكسپورتىنىڭ كولەمى 82,6 ملرد تەڭگەنى قۇرادى. سونداي-اق قاتىسۋشى كومپانيالار ءوز جوبالارىنا 172 ملرد تەڭگە كولەمىندە قارجى تارتىپ, سالىقتىق جەڭىلدىكتەردىڭ ناتيجەسىندە 47,6 ملرد تەڭگە ۇنەمدەگەن.
– Astana Hub قاتىسۋشىلارىنىڭ كىرىسى دەگەنىمىز – تەحنوپاركتىڭ كىرىسى ەمەس. بۇل – تەحنوپاركتە سالىق جەڭىلدىكتەرىن الىپ وتىرعان 930 كومپانيانىڭ كىرىسى. بىزدىڭشە, بۇل – وتە جاقسى ناتيجە, ۇكىمەتتىڭ IT-سالانى ىنتالاندىرۋ باعىتىنداعى ءىس-شارالارىنىڭ وڭ كورسەتكىشى. تەحنولوگيالىق كاسىپكەرلىكتى قولداۋدىڭ ناتيجەسىندە سالا قارقىندى دامىپ جاتىر, – دەيدى Astana Hub-تىڭ باسقارۋشى ديرەكتورى باقىتجان ەشمۇحامبەتوۆ.
راسىندا دا, تەحنوپارك قاتىسۋشىلارىنىڭ سانى جىلدام ءوسىپ كەلەدى. ماسەلەن, جىل باسىنان بەرى 328 كومپانيا قوسىلعان. بۇل رەتتە ءۇشىنشى توقساندا تەحنوپارك قاتىسۋشىلارىنىڭ كىرىس كورسەتكىشى دە 42 پايىزعا وسكەن.
– 2022 جىلدىڭ باسىنان بەرى IT-ماماندار مەن IT-كومپانيالاردى كوشىرۋگە دەگەن سۇرانىس ايتارلىقتاي ءوستى. بيىل 28 اقپاننان بەرى تەحنوپارك قونىس اۋدارۋ بويىنشا 3 مىڭنان اسا كەڭەس بەردى. Astana Hub مۇشەسى رەتىندە تىركەلۋگە 142 ءوتىنىش ءتۇسىپ, ونىڭ 117-ءسى كوميسسيانىڭ وڭ قورىتىندىسىن الىپ ۇلگەردى, – دەيدى ب.ەشمۇحامبەتوۆ.
ەسكە سالا كەتەيىك, Astana Hub قاتىسۋشىسى مارتەبەسىن العاندارعا كىرىستەرىنىڭ 1 پايىزىن تەحنوپارككە اۋدارۋ مىندەتى جۇكتەلەدى. سونداي-اق تەحنوپارك قاتىسۋشىلارى تەحنولوگيالىق كاسىپكەرلىكتى ناسيحاتتاۋ جانە جاڭا باستاپ جاتقان ستارتاپشىلاردى باۋلۋ ءۇشىن شەبەرلىك سىنىپتارىن, ۆوركشوپتار مەن باسقا دا ءىس-شارالار وتكىزۋگە ءتيىس.