قازاقستان رەسپۋبليكاسى پرەزيدەنتتىگىنە كانديدات سالتانات تۇرسىنبەكوۆا ناشاقورلىق, قۇمار ويىندار, ماسكۇنەمدىك سياقتى الەۋمەتتىك ماسەلەلەردىڭ قوعامدا كەڭىنەن تارالۋىنا جول بەرۋگە بولمايدى دەپ سانايدى. بۇل تۋرالى كانديدات ەلوردادا قۇقىق قورعاۋشىلارمەن كەزدەسۋ بارىسىندا ايتتى.
كەزدەسۋگە قاتىسۋشىلار كانديداتتىڭ سايلاۋالدى باعدارلاماسى اياسىندا الەۋمەتتىك سالادا جۇزەگە اسىرۋدى جوسپارلاپ وتىرعان رەفورمالارى تۋرالى سۇراقتارىن قويدى. قۇجاتتاعى نەگىزگى بەس باعىتتىڭ ءبىرى وسى تاقىرىپقا ارنالعانىن ايتا كەتكەن ءجون. ماسەلەن, كانديدات ازاماتتىق قوعام ينستيتۋتتارىنىڭ ءتيىمدى جۇيەسىن قۇرۋعا جانە قوعامدىق باقىلاۋدى كۇشەيتۋگە دەن قويۋدى كوزدەپ وتىر.
س.تۇرسىنبەكوۆا «تۇرمىستىق زورلىق-زومبىلىقسىز قازاقستان» جوباسىمەن جۇمىس ىستەۋ بارىسىندا شالعاي اۋىلدارعا ءجيى بارعانىن اتاپ ءوتتى. «ادامدارمەن تىكەلەي سويلەسكەندە عانا ولار وزدەرىنىڭ شىنايى ماسەلەلەرى تۋرالى ايتا باستايدى. مەنىڭ ماقساتىم – وسىنداي ماسەلەلەردى شەشۋ. مىسالى, ناشاقورلىق پەن قوعامنىڭ ماسكۇنەمدىگى. سينتەتيكالىق ەسىرتكى قولداناتىندار جيىلەپ كەتتى. قازىردىڭ وزىندە 9 جاستان 12 جاسقا دەيىنگى بالالار Telegram ارنالارىندا ولاردى قايدان جانە قالاي تابۋعا بولاتىنىن تەز بىلە الادى. زەرتتەۋلەرگە سايكەس, بالا بىرنەشە ساعاتتا مەكەنجايلاردى تابا الاتىنىن ەستىگەندە تاڭعالدىق. قازىر وسى ماسەلەمەن كۇرەس وتە تومەن دەڭگەيدە جۇرۋدە», دەدى ول.