استانادا رەسپۋبليكا كۇنىنە وراي ءۇي كەزەگىندە تۇرعان ازاماتتارعا پاتەر كىلتى تابىستالدى. جاڭا قونىستانۋشىلار اراسىندا ەرەكشە قاجەتتىلىكتەرى بار بالالاردى تاربيەلەپ وتىرعان وتباسىلار, تولىق ەمەس وتباسىلار, مۇگەدەكتەر, جەتىم بالالار, زەينەتكەرلەر, كوپبالالى وتباسىلار, بيۋدجەتتىك ۇيىمداردىڭ قىزمەتكەرلەرى بار, دەپ حابارلايدى Egemen.kz ەلوردا اكىمدىگىنە سىلتەمە جاساپ.
ەلوردا تۇرعىندارى پاتەرلەرىن «نۇرلى جەر» باعدارلاماسى («شاڭىراق» مەملەكەتتىك باعدارلاماسى) بويىنشا الدى. تۇرعىن ءۇي باعدارلاماسىن استانا اكىمدىگى وتباسى بانكىمەن بىرلەسىپ ىسكە اسىردى.
بۇگىن استانا اكىمى التاي كولگىنوۆ پەن وتباسى بانكىنىڭ باسقارما توراعاسى ءلاززات يبراگيموۆا بارشا قازاقستاندىقتاردى رەسپۋبليكا كۇنى مەرەكەسىمەن, ال جاڭا باسپانا يەلەرىن قونىس تويىمەن قۇتتىقتادى.
«رەسپۋبليكا كۇنىمەن جانە كوپتەن كۇتكەن قونىس تويىمەن قۇتتىقتايمىن! ۇيلەرىڭىز قۇرىلىس قارقىندى ءجۇرىپ جاتقان جاڭا اۋداندا (جاعالاۋ شاعىن اۋدانى, ە-20 كوشەسى) ورنالاسقان. مۇندا ءبىز جاقىندا 4 مىڭ وقۋشىعا ارنالعان 2 اۋىسىمدى مەكتەپ اشتىق. كوكتەمدە ءبىز اۋداندى اباتتاندىرۋدى جالعاستىرامىز, الەۋمەتتىك نىساندار سالامىز.
مەملەكەت تۇرعىن ءۇي ماسەلەسىنە ەرەكشە نازار اۋدارادى. جىل سايىن قولجەتىمدى جەڭىلدىكتى تۇرعىن ءۇي سالامىز. مىسالى 2018 جىلى 1800 الەۋمەتتىك پاتەر, 2019 جىلى وسىنداي 2900 پاتەر سالىنسا, سوڭعى ەكى جىلدا 17 مىڭعا جۋىق الەۋمەتتىك پاتەر قولدانىسقا بەرىلدى. سونىمەن قاتار, تۇرعىن ءۇي باعدارلامالارىنا قاتىسۋشىلار ساناتى كەڭەيدى, تۇرعىن ءۇي سەرتيفيكاتىنىڭ سوماسى 1 ميلليوننان 1,5 ملن تەڭگەگە دەيىن ۇلعايدى», دەپ اتاپ ءوتتى ەلوردا اكىمى التاي كولگىنوۆ.
جىل باسىنان بەرى استانادا بارلىعى 19 335 وسىنداي نەسيە بەرىلدى. كۇن سايىن ەلوردانىڭ 80-گە جۋىق تۇرعىنى ءوز پاتەرىن نەمەسە ءۇيىن وتباسى بانكى ارقىلى ساتىپ الۋ ءۇشىن نەسيە الادى. سول سياقتى كۇن سايىن 100-130 ادام جىلجىمايتىن م ۇلىكتى ودان ءارى ساتىپ الۋ ءۇشىن جاڭا دەپوزيتتەر اشادى.
«جاڭا قونىستانۋشىلارىمىزدىڭ بۇگىن جاڭا ءومىرى باستالدى - جاڭا پاتەرلەردە ولار ەندى جايلى ومىردە ۇرپاق تاربيەلەپ, الداعى ومىرلەرىنە جوسپار قۇرىپ, قوناق كۇتەتىن بولادى. باسپانا كىلتىن تابىستاۋ ۇلتتىق مەرەكەگە سايكەس كەلگەنى مەرەكەنىڭ ماڭىزىن ارتتىرا تۇسەدى. مەملەكەت ءوز ازاماتتارىنىڭ باسپانا ماسەلەسىن شەشۋگە ەرەكشە كوڭىل بولەتىنى ماڭىزدى. تەك «شاڭىراق» باعدارلاماسى اياسىندا ەكى جىل ىشىندە ءبىز 16 722 قازاقستاندىققا جەكە تۇرعىن ءۇي ساتىپ الۋعا كومەكتەستىك, ونىڭ ىشىندە استانادا 4 363 ادام قونىس تويىن اتاپ ءوتتى. جاقىن ارادا وتباسى بانكى مەملەكەتتىك باعدارلامالار اياسىندا ازاماتتارعا كرەديت بەرۋدى جالعاستىرۋ ءۇشىن 49,9 ملرد تەڭگە كولەمىندە قاراجات ءتۇسۋىن كۇتىپ وتىر», دەدى وتباسى بانكىنىڭ باسقارما توراعاسى ءلاززات يبراگيموۆا.
جىل باسىنان بەرى وتباسى بانكى 67 390 قازاقستاندىققا قونىس تويىن اتاپ وتۋگە كومەكتەستى.