پالاتا توراعاسى ماۋلەن اشىمباەۆ ءىس-شاراعا قاتىسۋشىلاردى ۇلتتىق مەرەكەمەن قۇتتىقتاپ, 1990 جىلى 25 قازاندا قابىلدانعان ەگەمەندىك تۋرالى دەكلاراتسيانىڭ تاريحي ماڭىزىنا توقتالىپ ءوتتى. سونداي-اق ول ەلىمىزدە جۇرگىزىلىپ جاتقان رەفورمالارعا نازار اۋداردى, دەپ حابارلايدى Egemen.kz سەناتتىڭ ءباسپاوز قىزمەتىنە سىلتەمە جاساپ.
«مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن ەلىمىزدە اۋقىمدى ساياسي, الەۋمەتتىك-ەكونوميكالىق رەفورمالار جۇرگىزىلىپ جاتىر. ولاردىڭ بارلىعى ادىلەتتى قازاقستان قۇرۋ قاعيداسىنا تابان تىرەيدى. رەسپۋبليكا كۇنىنىڭ ۇلتتىق مەرەكە رەتىندە قايتارىلۋى دا ادىلەتتىلىك قاعيداتىنىڭ جارقىن كورىنىسى ەكەنى ءسوزسىز. وسىنداي اۋقىمدى جۇمىستاردىڭ اياسىندا پارلامەنت ەلدەگى تاريحي شەشىمدەردى زاڭنامالىق تۇرعىدان قامتاماسىز ەتەتىن بىرقاتار ماڭىزدى زاڭ قابىلداۋدا. بۇل رەتتە سەنات دەپۋتاتتارىنىڭ جانە اپپارات قىزمەتكەرلەرىنىڭ ەڭبەگىن ەرەكشە اتاپ وتكەن ءجون», دەدى ماۋلەن اشىمباەۆ.
ءىس-شارا بارىسىندا سەنات توراعاسى سەناتورلارعا, اپپارات قىزمەتكەرلەرىنە, سونداي-اق, الەمدىك جانە ءداستۇرلى دىندەر ليدەرلەرىنىڭ VII سەزىن جوعارى دەڭگەيدە وتكىزۋگە ۇلەس قوسقان بەلسەندى ازاماتتارعا مەملەكەت باسشىسىنىڭ جارلىعىمەن بەكىتىلگەن مەملەكەتتىك ناگرادالاردى سالتاناتتى تۇردە تاپسىردى.
«پاراسات» وردەنىمەن سەنات ۆيتسە-سپيكەرى ولگا پەرەپەچينا, دەپۋتاتتار رىسقالي ابدىكەروۆ, باۋىرجان قانيەۆ, دۇيسەنعازى مۋسين جانە ءلاززات سۇلەيمەن ناگرادتالدى.
سەنات اپپاراتىنىڭ قىزمەتكەرلەرى قاتارىندا ءبولىم مەڭگەرۋشىسى باقىت اعيسا «قۇرمەت» وردەنىمەن, ءبولىم مەڭگەرۋشىلەرى باقىتگۇل تولەۋوۆا, نۇربەك الماشوۆ, ءبولىم مەڭگەرۋشىلەرىنىڭ ورىنباسارلارى شولپان بەيسەمبەكوۆا, قاراشاش يسمايلوۆا, گۇلسانا تولەپبەرگەنوۆا جانە جانار تولەندينوۆا «ەرەن ەڭبەگى ءۇشىن» مەدالىمەن ماراپاتتالدى.
الەمدىك جانە ءداستۇرلى دىندەر ليدەرلەرىنىڭ VII سەزىن ۇيىمداستىرۋعا جانە وتكىزۋگە ايرىقشا ۇلەس قوسقانى ءۇشىن كونفەسسياارالىق جانە وركەنيەتارالىق ديالوگتى دامىتۋ جونىندەگى ن.نازارباەۆ ورتالىعىنىڭ باسقارما توراعاسى بولات سارسەنباەۆ «پاراسات» وردەنىمەن, اتالعان ورتالىقتىڭ باسقارما توراعاسىنىڭ ورىنباسارى ديانا ەسەنوۆا جانە «Astana Venue Management» جشس-نىڭ باس ديرەكتورى مالىك حاسەنوۆ «ەرەن ەڭبەگى ءۇشىن» مەدالىمەن ناگرادتالدى. سونداي-اق الەمدىك جانە ءداستۇرلى دىندەر ليدەرلەرى VII سەزىنىڭ رەسمي وكىلى نازىم جانعازينوۆا «شاپاعات» مەدالىمەن ماراپاتتالدى.
سەنات اپپاراتى قىزمەتكەرلەرى – ءبولىم مەڭگەرۋشىسىنىڭ ورىنباسارى ۆاديم سۇلەيمەنوۆكە جانە باس كونسۋلتانت اسەل ەرتاسقا قازاقستان رەسپۋبليكاسىنىڭ قۇرمەت گراموتاسى تاپسىرىلدى.
سونىمەن قاتار سالتاناتتى جيىندا بىرقاتار سەنات دەپۋتاتى مەن اپپارات قىزمەتكەرى تمد پارلامەنتارالىق اسسامبلەياسىنىڭ «مپا سنگ 30 لەت» مەرەيتويلىق مەدالىمەن ناگرادتالدى.