قوستانايدا قازاق ادەبيەتىنىڭ اپتالىعى ءوتتى. توبىل تورىندە كوپتەن بەرى بولىپ كورمەگەن اۋقىمدى رۋحاني ءىس-شارانى ادەبيەتسۇيەر قاۋىم ءوڭىردىڭ مادەني ومىرىندەگى ۇلكەن وقيعا رەتىندە قابىلدادى. اپتالىق اياسىندا ۇلت ۇستازى احمەت بايتۇرسىن ۇلىنىڭ ادەبي مۇراسىنا ارنالعان عىلىمي كونفەرەنتسيا, جەرگىلىكتى قالامگەرلەردىڭ كىتاپ كورمەسى, سىرشىل اقىن سىرباي ماۋلەنوۆتىڭ 100 جىلدىعىنا ارنالعان ادەبي كەش, كەمەل جازۋشى تولەن ابدىكپەن كەزدەسۋ, سونداي-اق الدىڭعى اعا بۋىن مەن قاۋلاپ ءوسىپ كەلە جاتقان كەيىنگى جاس اقىنداردىڭ شىعارماشىلىعىنا ارنالعان پوەزيا فەستيۆالى ءوتتى.
«جىرلايدى جان جۇرەگىم جاقسىلىقتى» اتتى فەستيۆالدى وبلىستىق مادەنيەت باسقارماسى مەن جازۋشىلار وداعىنىڭ جەرگىلىكتى فيليالى بىرلەسىپ ۇيىمداستىردى. ءى.وماروۆ اتىنداعى قازاق دراما تەاترىندا وتكەن پوەزيا كەشىندە قوستاناي, ارقالىق قالالارى مەن شالعاي اۋىل-اۋدانداردان كەلگەن ەكپىنى ەرەك جاس شايىرلار سەرىكباي وسپانوۆ, اقىلبەك شاياحمەت سىندى بەلگىلى اقىندارمەن قاتار تۇرىپ جىر وقىدى. جاستاردىڭ اراسىندا ەسىمدەرى بۇگىندە ەل كولەمىنە تانىلىپ قالعان ابىلاي ماۋدانوۆ, جاننا ەرەكينا, جاندوس جۇسىپبەك, داۋلەت جادىراسىن, باتىرلان ساعىنتاەۆ سىندى تالانتتى اقىندار بار.
– بيىل قوستانايدىڭ قوڭىر كۇزىندە باستالعان ادەبي اپتالىقتىڭ اياسىندا ادەبيەت عىلىمىنىڭ ۇستىنىن قالىپتاستىرىپ, سارا جول سالىپ بەرگەن ۇلت ۇستازى احمەت بايتۇرسىن ۇلىنىڭ مۇراسىنا كوبىرەك كوڭىل ءبولىندى. ادەبي اپتالىق اياسىنداعى ءىس-شارالاردىڭ ءبارى نەگىزىنەن بيىلعى بالالار جىلىنا ورايلاستىرىلىپ, مەكتەپ وقۋشىلارى مەن ستۋدەنت-جاستارعا ارنالىپ وتىر. باستى ماقسات – اسىل ءسوزدىڭ قادىر-قاسيەتىن جاستارعا ۇعىندىرۋ, ۇلت ادەبيەتىنىڭ ءىنجۋ-مارجاندارىن كەيىنگى ۇرپاققا ناسيحاتتاۋ, ولاردىڭ كوركەم دۇنيەگە دەگەن ىقىلاس-پەيىلىن وياتۋ. ال ەندى بۇگىنگى پوەزيا كەشىنە جاس بۋىن, ورتا بۋىن جانە اعا بۋىن قاتىسۋدا جانە نەگىزگى باسىمدىق جاس بۋىنعا بەرىلىپ وتىر. وسى كەشتىڭ نەگىزگى لەيتموتيۆى دە جاستار پوەزياسى. كەشە تولەن ابدىكتىڭ شىعارماسى جەلىسىمەن «وتەلمەگەن پارىز» سپەكتاكلى قويىلىپ, قالامگەردىڭ «ادالدىق الاڭىنداعى بايتەرەك» اتتى شىعارماشىلىق كەشى ءوتتى, – دەدى قازاقستان جازۋشىلار وداعى فيليالىنىڭ توراعاسى جانۇزاق ايازبەك ۇلى.
پوەزيا مەرەكەسىنە ەشبىر رەسمي شاقىرۋسىز-اق كەلگەن جۇرتتىڭ كوپتىگى كوڭىل ءسۇيسىنتتى. تەاتردىڭ ۇلكەن زالى لىق تولىپ كەتتى. كەش بارىسىندا جاس اقىندار وقىعان ولەڭدەرگە ەلتىپ, بىرنەشە ستۋدەنت وزدىگىنەن سۇرانىپ ساحناعا كوتەرىلىپ, جىر وقىدى.
جىر فەستيۆالىن حالىق اقىنى ءاسيا بەركەنوۆانىڭ «تابالدىرىق» اتتى ولەڭىن ناقىشىنا كەلتىرىپ جاتقا وقىپ بەرگەن وبلىستىق مادەنيەت باسقارماسىنىڭ باسشىسى ەرلان قالماقوۆ تۇيىندەدى.
– جالپى, ءبىزدىڭ وڭىردە قاي كەزدە بولماسىن, جەكە اقىن-جازۋشىلاردىڭ شىعارماشىلىق كەشتەرىن, مەرەيتويلارىن ۇيىمداستىرىپ, كەزدەسۋلەر وتكىزىپ تۇرۋ اينىماس داستۇرگە اينالعان. بىراق مۇنداي ادەبي اپتالىق توبىل-تورعاي وڭىرىندە تۇڭعىش رەت ءوتىپ وتىر. وسى ءبىر اپتانىڭ توڭىرەگىندە احمەت بايتۇرسىن ۇلى, مۇحامەتجان سەرالين, سىرباي ماۋلەنوۆ, تولەن ابدىك سىندى الىپ تۇلعالارىمىزدىڭ شىعارماشىلىعىنا ارنالعان كەشتەردى, ءىس-شارالاردى وتكىزدىك. بۇگىنگى پوەزيا كەشى دە ەندى جىل سايىن ءوتىپ تۇراتىن ءداستۇرلى ءىس-شارالارىمىزدىڭ تىزىمىنە ەنەتىن بولادى, – دەدى باسقارما باسشىسى.
قوستاناي وبلىسى