زاماناۋي سپورتتىق-ساۋىقتىرۋ كەشەنى «اتاكەنت» كورمە ورتالىعىنىڭ ساياباق بولىگىمەن شەكارالاساتىن اۋماعىندا ورنالاسپاق. «دەلفين» سپورت نىسانى قايتا جوندەۋدەن وتكەننەن كەيىن مۇندا ەرەسەكتەر مەن بالالار جىل بويى بارىنشا قولايلى جاعدايدا ءتۇرلى سپورت تۇرلەرىمەن جانە فيزيكالىق بەلسەندىلىكپەن اينالىسا الادى, دەپ حابارلايدى Egemen.kz «اتاكەنت» قىىو» اق ءباسپاسوز قىزمەتىنە سىلتەمە جاساپ.
سپورتتىق-ساۋىقتىرۋ كەشەنىنىڭ جالپى اۋدانى 23 مىڭ شارشى مەتردى قۇرايدى. جاڭارتىلاتىن سپورت ورتالىعىنىڭ ينفراقۇرىلىمىنا وليمپيادالىق ستاندارتتىڭ ەكى باسسەينى, جاتتىعۋ جانە گيمناستيكا زالدارى, جەكپە-جەك, بوكس جانە كۇرەس, حورەوگرافيا جانە بي ساباقتارىنا ارنالعان زالدار كىرەدى. سونداي-اق سپورت عيماراتىنىڭ اۋماعىندا باسكەتبول مەن ۆولەيبول ويناۋعا ارنالعان ارنايى الاڭدار دا ورىن تەبەدى.
جاڭا كەشەننىڭ كەلۋشىلەرىنە بوكس, كاراتە, دزيۋدو, تاەكۆوندو, سامبو, MMA, دجيۋ-دجيتسۋ, كۇرەس, اەروبيكا, يوگا, ءجۇزۋ, كروسسفيت, گيمناستيكا جانە حورەوگرافيا ساباقتارى قولجەتىمدى بولادى.
سپورت كەشەنىنىڭ ورتاشا كۇندەلىكتى تۇتىنۋشىلار اعىنى شامامەن 2,5 مىڭ ادامدى قۇرايدى.
ەرەكشە قاجەتتىلىكتەرى بار بالالاردىڭ سپورتپەن شۇعىلدانۋى ءۇشىن جاعدايدى ۇيىمداستىرۋ دا جاڭارتىلعان كەشەننىڭ باسىم مىندەتتەرىنىڭ ءبىرى. سوندىقتان كەشەن ەرەكشە قاجەتتىلىكتەرى بار جانە تىرەك-قيمىل اپپاراتى بۇزىلعان بالالارعا ارنالعان ارنايى جابدىقتارمەن قامتىلادى.
«كەشەننىڭ نەگىزگى ماقساتى — قوعامدىق جانە كوپفۋنكتسيونالدى سپورت ورتالىعىنا اينالۋ, سوندىقتان ءبىز كەشەنىمىزدە ەڭ تانىمال سپورت تۇرلەرىمەن اينالىسۋ مۇمكىندىگىن قاراستىردىق. ەڭ باستىسى, ءبىزدىڭ ورتالىقتا سپورتپەن اينالىسۋ جاسىنا جانە دايىندىعىنىڭ دەڭگەيىنە قاراماستان بارلىعىنا دەرلىك قولجەتىمدى بولادى. ەسكى كەشەن كوپ ادام سانىنا ارنالماعان, تەحنيكالىق تۇرعىدان ەسكىرگەن جانە بۇگىنگى كۇننىڭ تالاپتارىنا ساي ەمەس. جاڭا جوبا سپورت جانە بەلسەندى ءومىر سالتىنا ارنالعان بارلىق زاماناۋي شەشىمدەردى قامتيدى. جاڭا سپورت كەشەنى قالا تۇرعىندارى ءۇشىن كەرەمەت سىيلىق بولادى دەپ ۇمىتتەنەمىز», دەيدى جوبا جەتەكشىسى ازات جيەنباەۆ.
سپورت عيماراتىن قايتا جاڭارتۋدى 2024 جىلدىڭ ورتاسىنا قاراي اياقتاۋ جوسپارلانىپ وتىر.