ەرەۆانعا جۇمىس ساپارىمەن بارعان قر پرەمەر-ءمينيسترى ءاليحان سمايىلوۆ ەۋرازيالىق ۇكىمەتارالىق كەڭەستىڭ كەڭەيتىلگەن قۇرامداعى وتىرىسىنا قاتىستى, دەپ حابارلايدى Egemen.kz.
قازاقستاننىڭ ەاەو ەلدەرىمەن ءوزارا ساۋدا-ساتتىعى وسى جىلدىڭ 8 ايىندا $17 ملرد-تان استى, بۇل وتكەن جىلدىڭ سايكەس كەزەڭىمەن سالىستىرعاندا 5%-عا ارتىق.
بىرلەستىك قۇرىلعان ساتتەن باستاپ قازاقستان وداق ەلدەرىنە وڭدەلگەن ءونىمنىڭ ەكسپورتىن 64%-عا ۇلعايتتى, ونىڭ ىشىندە نومەنكلاتۋرادا دايىن تاۋارلاردىڭ ۇلەسى ارتىپ كەلەدى.
«ەاەو-عا مۇشە ەلدەردىڭ مەملەكەتتىك ساتىپ الۋلارىندا ۇلتتىق رەجيمدەردىڭ جۇمىس ىستەۋىنە قاتىستى ماسەلەنى شەشۋ قاجەت. «تەحنيكالىق جانە تەحنولوگيالىق تالاپتار, جەرگىلىكتى جاعداي, ءتىپتى گەوگرافيالىق شەكتەۋلەر – سەرىكتەس ەلدەردىڭ مەملەكەتتىك ساتىپ الۋلارىنا قاتىسۋ كەزىندە كاسىپورىنداردىڭ الدىنان شىعاتىن كەدەرگىلەردىڭ تولىق ءتىزىمى بۇلار عانا ەمەس», دەدى ءاليحان سمايىلوۆ.
ول 2020 جىلى تاۋارلار وندىرىسىنە قويىلاتىن جالپى تالاپتاردىڭ بىرىڭعاي ەرەجەلەرى قابىلدانعانىن, بىراق 2 جىلعا جەتەر-جەتپەس ۋاقىت ىشىندە ولار بىرنەشە رەت وزگەرتىلىپ, تولىقتىرىلعانىن ايتتى.
ءاليحان سمايىلوۆتىڭ پىكىرىنشە, مۇنداي جاعداي كوبىنە ەرەجەلەردى اينالىپ وتەتىن قوسىمشا تالاپتاردىڭ قويىلاتىنىنا بايلانىستى بولىپ وتىر.
سونىمەن قاتار پرەمەر-مينيستر ەاەو ەلدەرىن كولىك قۇرالى پاسپورتىنىڭ بىرىڭعاي فورمالارىن ەنگىزۋ جانە ەلەكتروندىق پاسپورتتار جۇيەسىن ۇيىمداستىرۋ جونىندەگى جۇمىستى جەدەلدەتۋگە, سونداي-اق وداقتىڭ ورتاق نارىعىنىڭ تيىمدىلىگىنە تىكەلەي اسەر ەتەتىن تەحنيكالىق رەگلامەنتتەردى وزەكتەندىرۋگە شاقىردى.
ەرەۆانعا جۇمىس ساپارى اياسىندا پرەمەر-مينيستر ەاەو ەلدەرى ۇكىمەت باسشىلارىنىڭ ارمەنيا پرەزيدەنتى ۆااگن حاچاتۋريانمەن بىرلەسكەن كەزدەسۋىنە دە قاتىستى.