قالالىق اكىمدىكتىڭ جانە حالىقتى جۇمىسپەن قامتۋ ورتالىعىنىڭ قولداۋىمەن الماتى قالاسىندا بوس جۇمىس ورىندارىنىڭ جارمەڭكەسى ءوتتى.
جارمەڭكەدە جاستار مەن وقۋ ورىندارىن تامامداعان تۇلەكتەردى, سونداي-اق جۇمىسشىلاردى كوپتەپ كەزدەستىرۋگە بولادى. ولاردىڭ دەنى ونەركاسىپ, ءوندىرىس ورىندارى, ساۋدا جەلىلەرى, ازىق-ت ۇلىك, مەديتسينا, ءبىلىم بەرۋمەن اينالىساتىن كاسىپورىندار مەن ۇيىمداردىڭ ماماندارى تاراپىنان قاجەتتى اقپارات السا, ەندى ءبىرى ساۋالدامادان ءوتىپ, جاڭا جۇمىس ورىندارىنىڭ مۇمكىندىگىمەن تانىستى.
حالىقتى جۇمىسپەن قامتۋ ورتالىعى ديرەكتورىنىڭ ورىنباسارى نۇرجان اۋتاليەۆتىڭ ايتۋىنشا, بۇگىندە قىزمەت كورسەتۋ سالاسىندا ماماندار جەتىسپەيدى. قالالىق دەڭگەيدە ۇيىمداستىرىلعان جارمەڭكەگە 160 جۇمىس بەرۋشى قاتىسىپ, 3 مىڭنان اسا بوس جۇمىس ورىندارى ۇسىنىلعان. ازاماتتاردىڭ جەكەلەگەن ساناتتارى بويىنشا جۇمىس ىزدەپ كەلگەن مۇگەدەكتەر, پروباتسيالىق ەسەپتە تۇرعاندار, باس بوستاندىعىنان ايىرۋ ورىندارىنان بوساتىلعاندار, اليمەنت بويىنشا بورىشكەرلەر جۇمىسپەن قامتۋ شارالارىمەن تانىستى. جارمەڭكەگە ازاماتتاردىڭ جەكەلەگەن ساناتتارىنا ارنالعان جۇمىس ورىندارى بويىنشا كۆوتالارى بار جۇمىس بەرۋشىلەر قاتىستى. وسى ورايدا بۇگىندە قارىزى 3 ملرد تەڭگەدەن اساتىن جۇمىسسىز بورىشكەرلەردىڭ جارمەڭكە الاڭىنان بوس جۇمىس ورىندارىن قاراستىرۋعا مۇمكىندىگى دە ەسكەرىلىپ وتىر.
الماتى قالاسىندا تۇراقتى تىركەۋدەگى جۇمىسسىز ازاماتتاردىڭ قىسقامەرزىمدى كۋرستاردان ءوتۋ مۇمكىندىگى بار. حالىقتى جۇمىسپەن قامتۋ ورتالىعىنا جۇمىسسىزدىق بويىنشا تىركەلگەننەن كەيىن كاسىپتىك باعدار الۋعا جولداما بەرىلەدى. وسى جولى جارمەڭكەگە 3 مىڭنان اسا ادام جۇمىس ىزدەپ كەلسە, مىڭنان استامى جۇمىسقا ورنالاسۋعا جولداما الدى. رەسمي دەرەك بويىنشا قالادا جۇمىس ىزدەپ جۇرگەندەردىڭ سانى 50 مىڭنان اسادى.
«كازلەگپروم» جشس مامان جونىندەگى مەنەدجەرى دينا يسكاكوۆا كاسىپورىندا تىگىنشىلەر, اسىرەسە اياقكيىم تىگەتىن ەر ادامداردىڭ جەتىسپەيتىنىن العا تارتتى. مەكتەپ فورماسى, اسكەري جانە ارنايى كيىمدەر, اياقكيىم تىگۋگە ماماندانعان كاسىپورىن جىلىنا 1,5 ملن ءتۇرلى تىگىن بۇيىمدارى مەن 500 مىڭ جۇپ اياقكيىم شىعارادى. مۇندا جۇمىسشىنىڭ ايلىق جالاقىسى – 250-350 مىڭ تەڭگە ارالىعىندا. جۇمىسشى ماماندارىن وقىتاتىن كوللەدجدەر الماتى تەحنولوگيالىق ۋنيۆەرسيتەتىمەن كەلىسىمشارتقا تۇرعان. الايدا وقۋ ورنىن بىتىرگەن تۇلەكتەر كاسىپورىنعا جۇمىسقا تۇرۋعا اسا قىزىعۋشىلىق تانىتا قويمايدى ەكەن. قازىرگى جاعدايدا كاسىپورىنعا جۇزگە جۋىق جۇمىسشى كەرەك. وسى ورايدا كاسىپورىن باسشىلىعى جۇمىس ىستەۋگە كەلىسىمى بولسا, ارنايى وقىتىپ, بىلىكتىلىكتەن وتكىزۋ مۇمكىندىكتەرىن ۇسىنىپ وتىر.
جارمەڭكەدە «كازاتومپروم», «قازتەلەكوم», قالالىق توتەنشە جاعدايلار دەپارتامەنتى, «پوليگرافكومبينات», دەمالىس ورىندارى, بانكتەر, وقۋ ورىندارىنىڭ ماماندارى جۇمىس ىزدەۋشىلەرمەن سۇحباتتاسىپ, سۇراقتارىنا جاۋاپ بەردى. مامانداردىڭ پىكىرىنشە, جۇمىس بەرۋشىلەرمەن تىكەلەي بايلانىس ورناتىپ, جۇمىس تابۋعا سەپتىگىن تيگىزگەن جارمەڭكە ەڭبەك نارىعىنداعى احۋالدى زەرتتەۋگە دە ىقپال ەتەدى.
الماتى