قاسىم-جومارت توقاەۆ 2025 جىلعا قاراي كەربۇلاق اۋدانىنان تالدىقورعان قالاسىنىڭ ماڭىنا دەيىن بارلىق ەلدى مەكەندى گازبەن تولىق قامتاماسىز ەتۋدى تاپسىردى, دەپ حابارلايدى Egemen.kz.
«قازىر كوگىلدىر وتىن وبلىس تۇرعىندارىنىڭ 10 پايىزىنا عانا قولجەتىمدى. «الماتى – تالدىقورعان» ماگيسترالدى گاز قۇبىرى سالىنىپ, وبلىس ورتالىعىنا گاز تولىق بەرىلدى. 2025 جىلعا قاراي كەربۇلاق اۋدانىنان تالدىقورعان قالاسىنىڭ ماڭىنا دەيىن بارلىق ەلدى مەكەندى گازبەن تولىق قامتاماسىز ەتۋدى تاپسىرامىن», دەدى ق.توقاەۆ.
پرەزيدەنت سونىمەن قاتار, «تالدىقورعان – ءۇشارال» باعىتىندا گاز قۇبىرىن تارتۋ كەرەكتىگىن ايتتى.
«بۇل 180 مىڭ ادام تۇراتىن اقسۋ, سارقان, الاكول اۋداندارىنا گاز جەتكىزۋگە مۇمكىندىك بەرەدى. ۇكىمەتكە وسى جوبانى قارجىلاندىرۋدى تاپسىرامىن», دەدى مەملەكەت باسشىسى.
سونداي-اق ق.توقاەۆ جىل سوڭىنا دەيىن, اپاتتى جاعدايداعى كوپىرلەر مەن تاس جولداردىڭ قۇرىلىسىن اياقتاۋدى تاپسىردى.
«جەتىسۋ ايماعىنىڭ ترانزيتتىك الەۋەتى وتە جوعارى. ءوڭىردىڭ بۇل الەۋەتىن تولىق پايدالانۋ ءۇشىن كولىك ينفراقۇرىلىمىن دامىتۋ كەرەك. الدىمەن اپاتتى جاعدايدا تۇرعان 15 كوپىردى جاقىن ارادا رەتكە كەلتىرۋ قاجەت.جولداردى كۇتىپ ۇستاۋ جانە جوندەۋ ماسەلەسى قۇزىرلى مەملەكەتتىك ورگانداردىڭ ايرىقشا باقىلاۋىندا بولۋعا ءتيىس. «تالدىقورعان – قالباتاۋ – وسكەمەن» جانە ء«ۇشارال – دوستىق» تاس جولدارى سالىنىپ جاتىر. وسى جىلدىڭ سوڭىنا دەيىن جولدىڭ اسفالتتى قاباتىن سالىپ ءبىتىرۋ قاجەت. قۇزىرلى ورگاندارعا جۇمىس بارىسىن قاتاڭ باقىلاۋعا الىپ, كەلەسى جىلى تولىق پايدالانۋعا بەرۋدى تاپسىرامىن», دەدى مەملەكەت باسشىسى.